Moisés qellqanqan leykunata runakunata liyipanqan
8
Tsaypita juk junaqchönami llapan Israel runakuna Yaku jutiyuq pläzaman qorikäyarqan. Tsaychömi yachatsikuq Esdrasta mañakuyarqan Moisés qellqanqan leykunata apapänanpä. Tsay leykunatami Israel runakunata Tayta Dios entregashqa karqan.2 Tsaynö mañakuyaptinmi sacerdöti Esdrasqa leykuna qellqaranqan rölluta aparqan llapan runakuna, warmikuna y tantiyayta puëdiq wamrakunapis qoriraykäyanqan kaqman. Tsay junaq qanchis kaq killa punta kaq junaqmi karqan.a 3 Yaku jutiyuq punkucho kaykaq pläzachömi tsay runakunata tutapita pullan junaqyaq röllupita liyiparqan. Liyipaptinmi llapan runakuna shumaq wiyaräyarqan.
4 Parlamunanpä armayanqan tablachömi yachatsikuq Esdrasqa runakuna rikayänanpä ichiraykarqan. Tsay tablaqa tsay junaqpä rurashqami karqan. Derëcha kaqläninchömi ichiräyarqan Matatías, Sema, Anías, Urías, Hilcías y Maasías. Itsuq kaqläninchönami ichiräyarqan Pedaías, Misael, Malquías, Hasum, Hasbadana, Zacarías y Mesulam.
5 Runakuna rikaykaptin rölluta Esdras kichaptinmi runakuna ichïyarqan. 6 Tsaymi Esdrasqa munayyuq Tayta Diosta alabarqan. Runakunapis makinkunata joqarirkurmi niyarqan: “¡Amén! ¡Tsaynö kaykullätsun!” Nirkurmi Tayta Diosta adorar qonqurikuykuyarqan urkunkunapis patsaman töpanqanyaq.
7 Levitakunami Esdras imata liyinqantapis runakunata shumaq tantiyatsiyarqan. Tantiyatsiyaptinmi runakunaqa mana kuyukuypa wiyaräyarqan. Tsay levitakunami kayarqan Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán y Pelaía. 8 Tayta Diospa leyninkunata röllupita jinchi liyirkurmi shumaq tantiyatsiyarqan.
9 Liyipäyanqanta wiyaykurmi llakikurnin llapan runakuna waqayarqan. Tsaymi gobernador Nehemías, yachatsikuq sacerdöti Esdras y leykunata tantiyatsiq levitakunapis niyarqan: “Kanan junaqqa Tayta Diosnintsikta adorana sagrädu junaqmi kaykan. Ama llakikuyaytsu ni waqayaytsu”.
10 Mastami Esdras nirqan: “Alli allillata kusinaskir mikuyay. Mishkiq vïnutapis llapaykikuna upuyay. Mikuyniynaq kaqkunatapis qarayay. Kanan junaqqa Tayta Diosnintsikta adorana sagrädu junaqmi kaykan. Ama llakikuyaytsu. Tayta Dios kushikuyta qomashqami kallpayuq rikakuntsik”.
11 Tsaynöllami levitakunapis runakunata shoqar niyarqan: “Sagrädu junaq kaykaptinqa ama waqayaytsu”.
12 Tsaymi llapan runakuna aywayarqan mikuq y upuq. Liyipäyanqanta tantiyarninmi kushikuypita jukninpis jukninpis mikuyta rakipänakur jatun fiestata rurayarqan.
Ramäda fiestata rurayanqan
13 Waraynin junaqnami leykuna ima ninqantapis shumaq musyayänanpä mayor runakuna, sacerdötikuna y levitakuna yachatsikuq Esdraswan yapay qorikäyarqan. 14 Liyirninmi tantiyayarqan qanchis kaq killacho fiestata rurar Israel runakuna ramädallacho täyänanpä Moiséswan willakatsir Tayta Dios mandanqanta.† 15 Tsaymi jinan höra willakatsiyarqan Jerusaléncho y llapan markakunacho runakuna jirkapa aywar olïvupa, arrayanpa, palma jachapa y wakin jachakunapa llimllankunatapis qorimur leykuna ninqannö ramädata rurayänanpä.
16 Tsaymi jirkapa aywar llimllakunata apayämurqan. Tsaykunawanmi ramädata rurayarqan wayin janankunacho,b patiunkunacho Tayta Diospa templun patiucho, Yaku jutiyuq punku pläzacho y Efraín jutiyuq punku pläzachöpis. 17 Juklä nacioncho taykäyanqanpita chämuq llapan Israel runakunapis ramädata ruraskirmi tsaycho patsakuyarqan. Nunpa tsurin Josué kawanqan witsanpita patsa fiestata rurar ramädacho manami punuyashqatsu kayarqan. Tayta Dios mandanqannö fiestata rurarmi runakuna pasaypa kushikuyarqan.
18 Tsay fiestata qanchis junaqmi rurayarqan. Qallaykunan junaqpita ushanan junaqyaqmi Tayta Diospa leyninkunata qoyay qoyay Esdras liyiparqan. Puwaq kaq junaqchönami leycho ninqannölla Tayta Diosta adorayänanpä llapan qorikäyarqan.