Nehemíasta chikiqninkuna atacayta munayanqan
6
Sanbalat, Tobías, Arabia runa Gesem y wakin chikimaqnï runakunami musyayarqan Jerusalén markapa murällan juk uchkullatapis mana kachaypa allitsatsinqäta. Punkukunatami itsanqa manarä churatsirqärätsu. 2 Ushaykäyanqäta musyaskirmi Sanbalatwan Gesem willakatsimurqan: “Ono pampacho kaykaq mayqan markamanpis qorikäshun” nir.Tsaynö niyaptinmi maliciaskirqä niq tumpalla atacayämänanpä tsaynö qayaykätsiyämanqanta. 3 Tsaymi kachayämunqan runakunata nirqä: “Mas väliq aruycho aruptïmi tiempü kantsu shamunäpä. Shamuptïqa aruynïmi jitapakanqa”.
4 Tsaynö nikaptïpis chusku kutimi willakuqta kachayämurqan puntata niyämanqannölla niyämänanpä. Noqapis puntata ninqänöllami nirqä.
5 Pitsqa kutichönami yanapaqninwan cartata apatsimurqan. Tsay cartachöpis punta kaq cartakunacho ninqannöllami nirqan. Llapanpis liyiyänanpämi kichayllata apatsimurqan. 6 Tsay cartachömi nirqan:
“Reypa contran shärir murällata shäriykätsinqaykitami maytsaychöpis runakuna parlaykäyan. Tsaynöpis nikäyan Jerusalén runakunapa mandaqnin rey kanaykipä yarpaykanqaykitami. Gesempis tsaynöllami nikan. 7 Tsaynöllashi Jerusaléncho rey kanqaykita willakuyänanpä profëtakunatapis churashqayki. Paykunashi niyanqa: ‘¡Judácho mandamaqnintsik rey kaykannami!’ Tsaykunata rey Artajerjes manarä musyanqanyaq juklla shamuy parlanantsikpä”.
8 Tsaymi Sanbalatta willananpä willakuqninta noqapis nirqä: “Tsay ninqaykiqa manami rasunpaypatsu. Tsaytaqa yarpayllaykipitami nikanki”.
9 Paykunaqa aruykäyanqäta kacharinäta munarmi imaykanöpapis mantsaritsiyämayta munayarqan. Tsaynö kaptinpis noqaqa Tayta Diostami mañakurqä aruyanqächo mana kachaypa yanapayämänanpä.
10 Tsaypitanami Dalaíaspa tsurin y Mehetabelpa willkan Semaíasta watukaq aywarqä. Payqa wayinchömi pakaraykarqan. Chaykuptïmi nimarqan: “Wanutsishunaykipämi juraykäyan. Mana wanutsiyäshunaykipä Tayta Diospa templuncho kaykaq mas ruri kaq cuartuman yaykuskir punkuta trancamushun. Mana pakakuptikiqa kanan paqasmi wanutsiyäshunki”.
11 Niptinmi nirqä: “Noqaqa manami wanuyta mantsätsu. Tayta Diosman yärakuq runakunaqa manami ni templumanpis pakakuyantsu. Imata nimaptikipis manami pakakushätsu”.
12 Tsaymi tantiyarqä Semaías Tayta Diospa profëtan mana kanqanta. Payqa profëta tukurqan Sanbalatwan Tobías pägashqa kaptillanmi. 13 Payta tsaynö pägayarqan mantsaritsimänanpä y yätsimanqanta rurar jutsata ruranäpämi.a Tsaynö ruraptïqa conträ parlar pasaypa penqakuymanmi churayämanman karqan.
14 “¡Tayta Dios, Sanbalatwan Tobías tsaynö rurayämanqanpita castigaykullay! ¡Tsaynölla profetïsa tukuq Noadíastapis castigaykullay! ¡Wakin profëta tukuqkunatapis mantsaritsiyämanqanpita castigaykullay!”
15 Elul killacho ishkay chunka pitsqa (25) junaqchömib murällata pirqayta ushayarqä. Pitsqa chunka ishkay (52) junaqmi tsay aruycho kayarqä. 16 Llapan chikimaqkunami musyayarqan wallka junaqllacho aruyta ushayanqäta. Ñöpä nacionkunacho taq runakunapis pasaypa mantsakäyaptin runa tukuyanqanpis mayparä awarqan. Paykuna tantiyayarqan Tayta Diosnintsik yanapayämaptin aruyta ushayanqätami.
17 Tsay witsanmi respitashqa Judá runakuna Tobíaswan atska kuti cartanakuyarqan. 18 Judácho taq atska runakunami Tobíaswan alli rikanakuyarqan. Tsaynö rikanakuyarqan Arapa tsurin Secaníaspa mashan Tobías kaptinmi. Tsaynöpis Tobíaspa tsurin Johanánmi Mesulampa mashan karqan.c Mesulam Berequíaspa tsurinmi karqan. 19 Tobíaspäqa pïmaypis alli runa kanqantami niyämaq. Tsaynöllami ima ninqallätapis payta juklla willayaq. Tobíasqa mantsaritsimänan raykuqmi cartata noqapä kutin kutin apatsimuq.