3 Tsaynöllami wakinpis niyarqan: “Mikuyänäpä imäkunapis mana kaptinmi chakräkunata, üva chakräkunata y wayïkunatapis prenda churayashqä”.

4 Wakinkunanami niyarqan: “Reyta impuestuta pägayänäpämi üva chakräkunata y wakin chakräkunata prenda churaykur qellaytapis mañakuyashqä. 5 Noqakunapis y jaqa tukunqä runakunapis tsay castanöllami kayä. Tsurïkunapis y paykunapa tsurinkunapis tsay castallami kaykäyan. Tsaynö kaptinmi impuestuta pägayänäpä warmi tsurïkunata y ollqu tsurïkunatapis wätay kayänanpä rantikuykäyä. Wakin warmi tsurïkunata maynami rantikuyashqä. Üva chakräkuna y wakin chakräkunapis prenda kaptinmi imäkunapis kantsu tsurïkunata wätay kayanqanpita jipiyänäpä”.

6 Tsaynö parlaykäyanqanta wiyarmi pasaypa ajanarqä. 7 Tsaypita shumaq yarpachakuskirmi mayor runakunata y mandaqkunata ollqutupar nirqä: “¡Imanirtä tsay castanölla kaykarqa mañayanqayki qellaynikipa wachayninta cobraykäyanki!”

Tsaypitanami llapan runakunata qayatsirqä shumaq willanakuyänäpä. 8 Qorikaskiyaptinnami nirqä: “Israel mayintsikkunata juklä nación runakunaman rantikuyanqantami päga pägaykur jipimushqantsik. ¿Tsaynö jipiykämushqaku qamkunaqa tsurinkunata rantikuyänanpä muchuqyaykätsiyanki?”

Tsaynö niptïmi paykunaqa ima niytapis mana kamäpakur upällakuyarqan. 9 Tsaymi mastapis nirqä: “Tsaynö rurayanqaykiqa pasaypa penqakuypämi kaykan. Tayta Diosnintsikpita mantsapakurqa runa mayintsikta ama muchuqyätsishunnatsu. Tsaynöpami chikimaqnintsik jäpa runakunapis asipämarnintsik manakaqman churamäshunnatsu. 10 Qamkunanömi castäkunapis, mandashiqnïkunapis y hasta kikïpis trïguta y qellayta mañayashqä. ¡Mañanqantsikta ama cobrashunnatsu! 11 Tsaynö kaykaptinqa chakrankunata, üva chakrankunata, olïvus chakrankunata y wayinkunata juklla kutitsiyay. Qellayta, trïguta, vïnuta y aceitita mañayanqaykipita wachaynintapis ama cobrayaynatsu”.

12 Tsaynö niptïmi niyämarqan: “Taytay, niyämanqaykinömi llapantapis kutitsiyäshä. Mañayanqäpa wachaynintapis mananami cobrayäshänatsu”.

Tsaynö awniyaptinmi sacerdötikunata qayaskatsir ñöpancho runakunata juratsirqä awniyanqanta cumpliyänanpä. 13 Nirkurmi latsapäta tapsir nirqä: “Awninqanta mana cumpliq kaqtaqa latsapäta tapsinqänö wayinpita Tayta Dios qarqutsun. Imaykankunatapis Tayta Dios qechutsun”.

Tsaynö niptïmi llapan runakuna “tsaynö kaykullätsun” niyarqan. Tsaypitanami Tayta Diosta alabarnin awniyanqanta llapan cumpliyarqan.

14 Judá particho gobernador karqä rey Artajerjes ishkay chunka (20) wata rey kanqanpita hasta kimsa chunka ishkay (32) wata rey kanqanyaqmi. Tsay chunka ishkay wata päsanqanyaq noqapis ni mandar yanapamaqnïkunapis manami cobrayarqätsu gobernador cobrananpä kaq impuestuta. 15 Noqapita punta kaq gobernadorkunami itsanqa impuestuta cobrayarqan. Mikuyta y vïnuta rantiyänanpämi chusku chunka (40) qellayta qoyay qoyay kamaripäyänanpä obligayarqan. Tsay gobernadorkunapa mandashiqninkunapis runakunata ñakatsiyarqanmi. Noqaqa Tayta Diospita mantsapakurmi tsaykunata rurarqätsu. 16 Tsaypa trokinqa noqapis y mandar yanapamaqnïkunapis murälla aruyman churakashqa karmi chakralläkunapis rantiyashqätsu.

17 Wayïchöqa juk pachak pitsqa chunka (150) runakunami mikuyaq. Paykunaqa Israel runakuna y soldädukunapa capitanninkunami kayarqan. Juklä nacionpita watukamaq shamuq runakunataqa manami yuparqänapistsu. 18 Paykunata qaranäpämi cada junaq pishtatsiq kä juk töruta, allinnin soqta üshata y wallpakunatapis. Cada chunka junaqmi atska vïnuta apayämuq. Tsaynö qaraykarpis runakuna pishïpakuptinmi gobernador kay derëchütapis cobrarqätsu. 19 ¡Tayta Dios, kay runakuna alli kawayänanpä yanapanqäta yarpaykullay! ¡Noqatapis yanapaykallämay!