Chikiqninkuna Israel runakunata penqakuyman churayanqan
4
(3.33) Juchushqa kaykaq murällata allitsaykäyanqäta musyaykurmi Sanbalatqa pasaypa ajanar manakaqman churayämarqan. 2 (3.34) Tsaymi mandaq mayinkunapa y Samaria soldädukunapa ñöpancho niyämarqan: “¡Imatatä ruraykäyan mana väliq Israel runakuna! ¿Allitsayta ushaskir sacrificiuta rupatsiyänanpä kanqantatsurä yarpäyan? ¿Juk junaqlla ushayänanpä kanqantatsurä yarpäyan? ¿Pasaypa rupashqa qoturaykaq rumikunawantsurä pirqayta yarpäyan?”3 (3.35) Tsaynöllami Sambalatpa ñöpacho amonita Tobíaspis nirqan: “Paykuna pirqayanqantaqa atuqllami lanqur juchuratsinqa”.
4 (3.36) Tsaynö niyaptinmi Tayta Diosta mañakur nirqä: “Tayta Diosllä, wiyaykullay paykuna manakaqman churayämanqanta. Maldicionayämanqan kikinkunaman chaykullatsun. Chikiqninkunapa makinkunaman entregaykullay juklä nacionman prësu apayänanpä. 5 (3.37) Jutsankunatapis ama perdonaytsu. Paykunaqa marka murällata shäritsiyaptïmi ashlliyäman”.
6 (3.38) Tsaynö mañakuskirmi mana qelanaypa arur murällata pullanyaqna shäritsiyarqä. 7 (1) Jerusalén murällata altutana shäriykätsiyanqäta y llapan juchushqa kaqkunata allitsaykäyanqäta musyaskirmi Sanbalat, Tobías, Arabia runakuna, amonita runakuna y Asdod runakuna pasaypa ajanäyarqan. 8 (2) Tsaymi willanakuyarqan Jerusalénman shamuykur atacayämänanpä. 9 (3) Tsaynö willanakuyaptinpis Tayta Diosnintsikta mañakuskirmi churanakuyarqä paqaspapis junaqpapis atacayämaptin washäkuyänäpä.
10 (4) Tsaypitanami Judá runakunaa desanimarnin niyarqan:
“Murälla juchunqan rumikuna alläpami qoturaykan.
Ashtamuqkunapa kallpanpis manami kannatsu.
Murällata shäritsiyta manami kamäpakushunnatsu”.
11 (5) Chikimaqnïkunashi willanakur nikäyan: “Aruyta kachariyänanpä illaqpita yaykur chipyaq wanutsishun”.
12 (6) Tsaynöllami chikimaqnïkuna täyanqanlächo taq Israel mayïkuna kutin kutin willayämarqan wakpita kaypita atacayämänanpä willanakuyanqanta. 13 (7) Tsaymi runakunata castanpa castanpa churarqä espädankunawan, lanzankunawan y flëchankunawan cuidayänanpä. Paykunatami churarqä murälla waqtankunaman, ras yaykuyänanpä kaqkunaman y pipis mana cuidanqan kaqkunaman. 14 (8) Runakuna mantsariyanqanta rikarmi mayor runakunata, mandaqkunata y llapan runakunatapis nirqä: “Paykunata ama mantsashuntsu. Llapanpä munayyuq Tayta Diosman yärakur castaykikunata, tsurikikunata, warmikikunata y wayikikunata defiendiyay”.
15 (9) Pelyayänäpä shuyaraykäyanqäta musyaykur y Tayta Dios tsapata churapanqanta tantiyaskirmi conträkuna atacayämarqannatsu. Tsaymi murälla allitsayta llapäkuna sïguiyarqä.
16 (10) Tsaypitanami munaynïcho kaykaq pullan soldädukuna aruyarqan y pullan kaqkunanami bronci chalëcun jatishqa pelyayänanpä shuyaräyarqan lanzankunawan, escüdunkunawan y flëchankunawanpis. Capitankunapis Judá runakunata yanapayänanpä listumi kayarqan.
17 (11) Murällata allitsaqkuna y rumi ashtaqkunapis jukaq makinwanmi aruyaq y jukaq makinwannami armankunata aptaräyaq. 18 (12) Paykunaqa llapanmi espädanta tseqllancho tsararäyarqan. Imapis kaptin juklla tukananpä cornëta tukaqpis ñöpächömi kaykarqan.
19 (13) Mayor runakunata, mandaqkunata y wakin runakunatapis kaynömi nirqä: “Arunantsikpäqa atskami kaykan. Noqantsikqa murällata pirqar alläpa karu karumi kaykantsik. 20 (14) Tsaymi atacamaptintsik cornëtata tukamunqanta wiyar washäkunantsikpä tsayman llapantsik jinan höra qorikäshun. Tayta Diosnintsikmi noqantsikpa favornintsik pelyanqa”.
21 (15) Tsaynöpami patsa waranqanpita tsakanqanyaq aruyaptï pullan kaq runakuna lanzan aptashqa kaykäyarqan. 22 (16) Mastami runakunata nirqä: “Yanapashuqnikikunawan Jerusalénllacho quëdayay. Tsaynöpami paqaspa cuidayanki y junaqpana aruyanki”.
23 (17) Noqapis, castäkunapis, yanapamaqnïkunapis y wallkiykämaq soldädukunapis latsapäkunata manami jipikuyarqätsu. Tsaynöpami atacayämaptin pelyayänäpäpis juknï juknïpis listu kayarqä.