Jerusalén murällata allitsayta qallaykuyanqan
3
Tsaypitanami mandaq sacerdöti Eliasib sacerdöti mayinkunawan qorikaykur allitsayarqan Üsha jutiyuq punkuta. Marcunkunata churaskirnami punkukunata churayarqan. Murällatanami allitsayarqan Pachak jutiyuq törripita hasta Hananeel törriyaq.2 Tsaypita sïguiq murällatanami Jericó marka runakuna allitsayarqan.
Tsaypita kaqtanami Imripa tsurin Zacur allitsarqan.
3 Senaapita aywaraq runakunanami Pescädu jutiyuq punkuta allitsayarqan. Marcunkunata churaskirmi punkukunata churayarqan. Tsaypitanami cerröjunkunata y trancankunata churayarqan.
4 Pescädü jutiyuq punkupitanami Meremot allitsarqan. Payqa Uríaspa tsurin y Cospa willkanmi karqan.
Tsaypita kaqtanami Mesulam allitsarqan. Payqa Berequíaspa tsurin y Mesezabeelpa willkanmi karqan.
Tsaypita sïguiq murällatanami Baanapa tsurin Sadoc allitsarqan.
5 Tsaypita kaqtanami Tecoa marka runakuna allitsayarqan. Respitashqa mayor Tecoa runakunaqa yanapayta manami munayarqantsu.
6 Jesaná punkutanami Paseahpa tsurin Joiada y Besodíaspa tsurin Mesulam allitsayarqan. Marcunkunata churaskatsirmi punkukunata churatsiyarqan. Churaskatsirmi cerröjunkunata y trancankunata churayarqan.
7 Tsaypita sïguiq murällatanami Gabaón runa Melatías y Meronot runa Jadón allitsayarqan. Paykunawanmi Gabaón runakunawan Mizpa runakunapis aruyarqan. Gabaón y Mizpa markakunami kayarqan Éufrates mayu kay tsimpan provinciapa gobernadornin mandakunqancho.
8 Tsaypita sïguiq murällatanami Harhaíapa tsurin Uziel allitsarqan. Payqa yuraq qellay fundiqmi karqan.
Tsaypita sïguiq kaqtanami Hananías allitsarqan. Payqa perfümi ruraqmi karqan. Tsaynöpami Jerusalén murällata hasta Anchu Pirqa ninqanyaq allitsayarqan.
9 Tsaypita sïguiq murällatanami Hurpa tsurin Refaías allitsarqan. Payqa pullan Jerusalén distrïtupa gobernadorninmi karqan.
10 Tsaypita sïguiq murällatanami Harumafpa tsurin Jedaías allitsarqan. Allitsanqan murällaqa wayin ñöpanpami karqan.
Tsaypita sïguiq murällatanami Hasabníaspa tsurin Hatús allitsarqan.
11 Tsaypita sïguiq murällatanami Harimpa tsurin Malquías y Pahat-moabpa tsurin Hasubna allitsayarqan. Paykunami allitsayarqan Jornu jutiyuq törritapis.
12 Tsaypita sïguiq murällatanami Halohespa tsurin Salum allitsarqan. Salumqa pullan Jerusalén distrïtupa gobernadorninmi karqan. Payqa warmi tsurinkunawanmi murällata allitsayarqan.
13 Raqra jutiyuq punkutanami Zanoa runakunawan Hanún allitsarqan. Punkukunata churaskirnami cerröjunkunatawan trancankunata churayarqan. Murällatanami pirqayarqan chusku pachak pitsqa chunka (450) metru larguta hasta Qanra Jitakuna punkuyaq.
14 Recabpa tsurin Malquíasnami Qanra Jitakuna jutiyuq punkuta allitsarqan. Malquíasqa Bet-haquerem distrïtupa gobernadorninmi karqan. Punkukunata churaskatsirmi cerröjunkunatawan trancankunata churarqan.
15 Colhozipa tsurin Salumnami Pukyu jutiyuq punkuta allitsatsirnin qatatsirqan. Salumqa Mizpa distrïtupa gobernadorninmi karqan. Punkunkunata churaskatsirmi cerröjunkunatawan trancankunata churarqan. Tsaypitanami tsay punku jananta qatayarqan. Tsaynöllami reypa jardinnin ñöpancho kaykaq Siloé estanqui lädunpa päsaq murällantapis allitsarqan. Tsay murällata Davidpa Markan niyanqan partipita urämuna grädayaqmi allitsarqan.
16 Tsaypita sïguiq murällatanami Azbucpa tsurin Nehemías allitsarqan. Payqa pullan Bet-sur distrïtupa gobernadorninmi karqan. Pay allitsarqan hasta David casta kaqkuna pamparaykanqan panteón frentinyaqmi. Tsaychömi yaku qorikuna pözu y soldädukunapa cuartelninpis kaykan.
Jerusalén murällata levitakuna allitsayanqan
17 Tsaypitanami levitakuna murällata allitsayarqan. Tsay levitakunami kayarqan:
Banipa tsurin Rehum,
Hasabías (Payqa Rehum allitsanqanpita sïguiq murällatami allitsarqan. Hasabíasqa pullan Keila distrïtupa gobernadornin karmi tsay distrïtu runakunapa jutincho allitsarqan);
18 Henadadpa tsurin Bavai (Payqa Hasabías allitsanqanpita sïguiq murällatami allitsarqan. Bavaiqa karqan pullan kaq Keila distrïtupa gobernadorninmi);
19 Josuépa tsurin Ezer (Payqa Bavai allitsanqanpita sïguiq murällatami allitsarqan. Ezerqa Mizpa markapa gobernadorninmi karqan. Paymi allitsarqan guërra armakuna churaränan wayiman witsänan frentinpa. Tsaychömi murällapa esquïnan kaykan);
20 Zabaipa tsurin Baruc (Payqa Ezer allitsanqanpita sïguiq murällatami kushishqa allitsarqan. Tsay karqan esquïnapita hasta mandaq sacerdöti Eliasibpa wayin punkuyaqmi);
21 y Uríaspa tsurin Meremot (Payqa Baruc allitsanqanpita sïguiq murällatami Eliasibpa wayin punkunpita hasta wayin esquïnayaq allitsarqan. Meremotqa Cospa willkanmi karqan).
Jerusalén murällata sacerdötikuna allitsayanqan
22 Tsaypita sïguiq murällatanami Jerusalén ñöpankunacho taq sacerdötikuna allitsayarqan. Tsay sacerdötikunami karqan:
23 Benjamín y Hasub (Paykunaqa wayin ñöpanpa sïguiq murällatami allitsayarqan);
Maasíaspa tsurin Azarías (Payqa Ananíaspa willkanmi karqan. Payqa kikinpa wayin ñöpanpami allitsarqan);
24 Henadadpa tsurin Binúi (Payqa Azaríaspa wayinpita murälla esquïnanyaqmi allitsarqan);
25 Uzaipa tsurin Palal (Payqa allitsarqan esquïnapitami. Tsaynöpis allitsarqan reypa wayincho kaykaq jatun törritami. Tsay törriqa karqan cárcel punku ñöpanchömi);
Faruspa tsurin Pedaías
26 y Ofel barriucho taq runakuna (Paykunami murällata allitsayarqan hasta Yaku jutiyuq punku frentinyaq. Tsay punkuqa rupay yarqamun kaqlächömi karqan. Tsaynöllami allitsayarqan tsaycho kaykaq jatun törrita. Tsay allitsaq runakunaqa templucho aruq runakunami kayarqan).
Jerusalén murällata wakin runakuna allitsayanqan
27 Tsaypita sïguiq murällatanami Tecoa runakunana jatun törri frentinpita hasta Ofel murälla tinkuqyaq allitsayarqan.
28 Cawallukuna jutiyuq punkupita qallaykurnami sacerdötikuna cada ünunkuna wayin ñöpankunapa kaykaq murällata allitsayarqan.
29 Tsaypita sïguiqtanami Imerpa tsurin Sadoc allitsarqan. Pay allitsanqanqa wayin ñöpanpami karqan.
Tsaypita sïguiq murällatanami Secaníaspa tsurin Semaías allitsarqan. Payqa kaykan templu punku täpaqmi. Täpanqan punkuqa rupay yarqamunan kaqlächömi kaykan.
30 Tsaypita sïguiq kaqtanami Selemíaspa tsurin Hananíaswan Hanún allitsayarqan. Hanúnqa Salafpa soqta kaq tsurinmi karqan.
Tsaypita sïguiq kaqtanami Berequíaspa tsurin Mesulam allitsarqan. Pay allitsanqanqa wayin frentinchömi karqan.
31 Tsaypita sïguiq murällatanami qellay fundiq Malquías allitsarqan hasta templucho aruqkunapa y negociantikunapa wayin kaykanqanyaq. Tsay wayiqa Qorikäyänan jutiyuq punku frentinchömi karqan. Tsaynöpis rikachakuna wayi kanqan esquïnachömi karqan.
32 Tsaypita sïguiq murällatami qellay fundiqkuna y negociantikuna hasta Üshakuna jutiyuq punkuyaq allitsayarqan.