Israel runakuna jutsata rurayanqanpita Tayta Diosta Esdras mañakunqan
9
Tsaypitanami Israel runakunapa mandaqninkuna shamuykur niyämarqan: “Kaycho taq jäpa runakunapa costumbrinkuna mana alli kanqanta musyaykarmi sacerdötikuna, levitakuna y wakin Israel mayintsikkunapis tsay jäpa runakunawan takukashqa kaykäyan. Tsay jäpa runakunami kaykäyan cananeo runakuna, heteo runakuna, ferezeo runakuna, jebuseo runakuna, amonita runakuna, moabita runakuna, Egipto runakuna y amorreo runakuna. 2 Paykunawan takukarmi kikinkunapis y tsurinkunapis paykunapa warmi tsurinkunawan tätsinakuykäyan. Tayta Dios kuyanqan santu runakuna kaykarmi jäpa runakunawan takukashqa kaykäyan. Tsaynö jutsata rurayänanpäqa autoridäkuna y wakin mandaq mayïkunami qallaykuyashqa”.3 Tsaynö willayämaptinmi pasaypa llakikur latsapätapis rachirqä. Aqtsätapis shaprätapis llukir usharqä. 4 Babiloniapita Jerusalénman puntata shamuq runakuna tsaynö jutsata rurayanqanpitami Diosta cäsukuq Israel mayïkuna noqawan qorikäyarqan. Tardi kaq sacrificiuta altarcho rupatsiyanqan hörayaqmi llapäkuna pasaypa llakishqa kayarqä.
5 Tsay höra llakikuynï qallquskiptinmi latsapäpis rachishqalla qonqurikuykur Tayta Diosta mañakur nirqä: 6 “Tayta Diosllä, pasaypa penqakushqami kaykä. Manami musyätsu imata ruranäpä kanqantapis y imanö mañakamunäpä kanqantapis. Noqakunaqa pasaypami jutsata rurayashqä. Jutsata rurayanqäkunaqa yupaytapis mana atipaypämi kaykan. 7 Unaypita patsami jutsata rurallar kawayashqä. Jutsata rurayanqänö unay castäkunapis jutsata rurayaptinmi mandaqnin reykunata y sacerdötikunata pasaypa castigarqayki. Tsaymi juklä nacionpa mandaqnin reykuna vincir munaynincho tsarararqan. Tsay runakunami unay castäkunata pasaypa maqayarqan y markankunapitapis karuman apakuyarqan. Imaykankunatapis qechuskirmi manakaqman churayarqan. Paykunanöllami kananyaqpis ñakaykäyä.
8 “Tayta Diosllä, kuyapäyämaptikimi wallkaqllapis kaycho libri kaykäyä. Tsaymi kay akranqayki particho wayïkunatapis rurayashqä. Tsaynöpami juklä nación runakunapa munaynincho kayanqäpita salvayämarnin alli kawayta qarayämashqayki. 9 Jäpa runakunapa munaynincho kayaptïpis manami kachariyämashqaykitsu. Kuyapäyämaptikimi Persia nacionpa mandaqnin reykunapis kuyapäyämashqa. Qammi kallpata qarayämashqayki raqällana kaykaq templuykita allitsayänäpä. Judáchöpis y Jerusalénchöpis qammi chikimaqnïkunapita tsapäyämashqayki.
10 “Tayta Diosllä, pasaypa jutsayuq karmi ima niytapis kamäpakuyätsu. Mandamientuykikunatapis shumaqllaqa manami cumpliyashqätsu. 11 Tsay mandamientuykikunataqa sirvishuqniki profëtakunawan willakatsirmi niyämarqayki: ‘Yaykuyänaykipä kaq nacionkunacho taq runakunaqa maytsaychöpis jutsata ruraptinmi nacionninkuna impüru kaykan. 12 Tsaynö kaykaptinqa tsurikikunata paykunapa tsurinkunawan ama majatsakätsiyankitsu ni imachöpis ama yanapayankitsu. Kay ninqäta cäsukurmi chakraykicho wayuqkunata mikur kushishqa kawayanki. Tsaynöllami chakraykikuna tsurikikunapä imayyaqpis kanqa’.†
13 “Tsay ninqaykita mana cäsukuypa jutsata rurayaptinmi unay castäkunata pasaypa castigarqayki. Tsaynö castigarpis manami jutsata rurayanqanman tuputsu castigarqayki, tsaypa trokinqa wallkaqllapis kayman shayämunäpämi yanapayämashqayki. 14 Tsaynö kuyaykäyämaptikipis jutsasapa runakunapa warmi tsurinkunawan majatsakarmi mandamientuykikunata yapay manakaqman churayashqä. Tsaynö rurayanqätaqa manami imanöpapis tantiyayta kamäpakütsu. Tsaynö ruraykäyaptïqa ajanar rasuntachi llapäkunata ushakätsiyämankiman.
15 “Tayta Dios, kuyapämarmi yanapayämashqayki wallkaqllapis kaycho kayänäpä. Tsaynö kaptinpis jutsayuqmi rikakuyä. Manami ñöpaykicho kaytapis merëciyätsu”.