Babiloniapita Jerusalénman aywaq cada castapa mandaqnin pï kanqanpis
8
Kay listachömi qellqaraykan Babiloniapita Jerusalénman shamuq cada castapa mandaqninpa jutinkuna. Paykunami noqawan shayämurqan Artajerjes rey kaykanqan witsan:2 Fineespita aywaraq Gersón;
Itamarpita aywaraq Daniel;
Paruspita aywaraq Zacarías (paywanmi juk pachak pitsqa chunka (150) runakuna padronakuskir shayämurqan);
4 Pahat-moabpita aywaraq Zeraíaspa tsurin Elioenai (paywanmi ishkay pachak (200) runakuna shayämurqan);
5 Zatupita aywaraq Jahazielpa tsurin Secanías (paywanmi kimsa pachak (300) runakuna shayämurqan);
6 Adínpita aywaraq Jonatánpa tsurin Ebed (paywanmi pitsqa chunka (50) runakuna shayämurqan);
7 Elampita aywaraq Atalíaspa tsurin Isaías (paywanmi qanchis chunka (70) runakuna shayämurqan);
8 Sefatíaspita aywaraq Micaelpa tsurin Zebadías (paywanmi puwaq chunka (80) runakuna shayämurqan);
9 Joabpita aywaraq Jehielpa tsurin Abdías (paywanmi ishkay pachak chunka puwaq (218) runakuna shayämurqan);
10 Banípita aywaraq Josifíaspa tsurin Selomit (paywanmi juk pachak soqta chunka (160) runakuna shayämurqan);
11 Bebaipita aywaraq Bebaipa tsurin Zacarías (paywanmi ishkay chunka puwaq (28) runakuna shayämurqan);
12 Azgadpita aywaraq Hacatánpa tsurin Johanán (paywanmi juk pachak chunka (110) runakuna shayämurqan);
13 Elifelet, Jeiel y Semaías (paykunaqa Adonicampita aywaraqkunami kayarqan. Tsay castacho paykuna mas chölullarämi kayarqan. Paykunawanmi soqta chunka (60) runakuna shayämurqan);
14 Utaiwan Zabud (paykunaqa Bigvaipita aywaraqkunami kayarqan. Paykunawanmi qanchis chunka (70) runakuna shayämurqan).
Jerusalénman shayämunanpä kamarikuyanqan
15 Noqa Esdrasmi llapan tsay runakunata qorirqä Ahava markapa päsaq mayu kuchunman. Tsaychömi kimsa junaq llapäkuna qoyäyarqä. Sacerdötikunata y mana sacerdötikunata listata qayaptïmi levitakuna ni jukllayllapis kayarqantsu. 16 Tsaymi qayatsirqä Eliezerta, Arielta, Semaíasta, Elnatánta, Jaribta, Elnatánta, Natánta, Zacaríasta y Mesulamta. Paykunaqa mayor runakunami kayarqan. Tsaynöllami qayatsirqä Joiaribta y Elnatánta. Paykunami leykunata yachatsiq runakuna kayarqan. 17 Llapan tsay runakunatami Casifia markacho taq mayor runa Idduwan parlayänanpä kacharqä. Iddo y castankunaqa templucho sirviq levitakunami kayarqan.
Manarä kacharmi yätsirqä paykunata rugar niyänanpä: “Tayta Diosnintsikpa templuncho sirviyänanpä levitakunata kachaykallämuy”.
18 Chaykur yätsinqänö rugakuptinmi Serebíasta, tsurinkunata y wawqinkunata kachayämurqan. Paykunami kayarqan chunka puwaq runakuna. Serebíasqa imaykatapis yachaq runami kaykan. Payqa Levípa tsurin Mahli casta runami kaykan. Kuyapäkuq Tayta Diosnintsiktami agradëcikü tsaynö kachamunqanpita. 19 Tsaynöllami Merari casta Hasabíasta y Jesaíasta kachayämurqan. Paykunami tsurinkunawan y wawqinkunawan ishkay chunka (20) runakuna kayarqan.
20 Levitakunata templucho yanapayänanpämi ishkay pachak ishkay chunka (220) runakunata kachayämurqan. Paykunapa unay castankunatami rey David y mandashiqninkuna templucho sirviyänanpä churayarqan. Tsay kachamunqan runakunatami padronayarqä.
21 Tsaypitanami Ahava mayu kuchuncho llapan runakunata nirqä: “Jutsata ruranqantsikpita Tayta Diosnintsikta perdonta mañakur llapantsik ayunashun. Ayunar payta mañakushun shumaq pushamänantsikpä, tsurintsikkunata imapis mana päsananpä y apanqantsikkunata pipis mana qechumänantsikpä. 22 Suwakunapita tsapämänantsikpä soldäduntsikkunapis manami kantsu. Reytapis maynami nishqä: ‘Tayta Diosnïta ashiyaptï kikinmi tsapäyäman. Jutsata rurayaptïqa ajanarmi castigayäman’. Reyta tsaynö nishqa karmi cawallun muntashqa soldädukunawan yanapamänantsikpä mañakuyta penqakü”.
23 Israel mayïkunata tsaynö willaskirmi Tayta Diosnintsik tsapäyämänanpä ayunar payta mañakuyarqä. Tsaynö mañakuyaptïmi viäjicho shumaq yanapayämarqan.
24 Tsaypitanami chunka ishkay mandaq sacerdötikunata akrarqä. Paykunami kayarqan Serebías, Hasabías y chunka sacerdöti mayinkuna. 25 Paykunatami qellayta, qorita y manëjukunatapis pësaparqä. Tsaykunatami rey, yätsiqninkuna, mandashiqninkuna y Babiloniacho taq llapan Israel runakunapis Tayta Diosnintsikpa templunpä kamaripäyämarqan. 26 Pësapaptïmi karqan ishkay chunka juk waranqa chusku pachak pitsqa chunka (21,450) kïlu qellay y kimsa waranqa kimsa pachak (3,300) kïlu qori. Tsaynöllami karqan qellaypita rurashqa juk pachak (100) manëjukuna 27 y qoripita rurashqa ishkay chunka (20) tazonkuna. Tsay tazonkunami lasarqan puwaq kïlu. Tsaynöllami karqan allinnin broncipita rurashqa kuyayllapä ishkay väsukuna. Tsay väsukunami qoripita rurashqanö chanin kayarqan.
28 Entregaskirnami tsay mandaq sacerdötikunata nirqä: “Sirviqnin sacerdöti kayänaykipämi Tayta Dios akrayäshushqayki. Tsay manëjukunapis Tayta Diospä sagrädumi. Tsay qellay y qoripis llapan voluntäninkunawan runakuna churayämunqan ofrendami. Tsaynö churayämurqan unay castantsikkuna yärakuyanqan Tayta Diospämi. 29 Mandaq sacerdötikunata, levitakunata y Israel autoridäkunata Jerusaléncho entregayänaykipä shumaq següru apayay. Paykunami pësaskir Jerusalén templucho kaykaq depösituman churayanqa”.
30 Tsaynö nir entregaskiptïmi Tayta Diosnintsikpa templunman apayänanpä pësanqan qellayta, qorita y kuyayllapä kaqkunatapis sacerdötikuna y levitakuna chaskiyarqan.
Jerusalénman chäyanqan
31 Punta kaq killa chunka ishkay junaqchömi Ahava mayu kuchuncho qoriraykäyanqäpita Jerusalénman shayämurqä. Shayämuptïmi Tayta Diosnintsik tsapäyämarqan chikimaqnïkunapita y asaltantikunapitapis.
32 Jerusalénman chaykamurmi kimsa junaq jamayarqä. 33 Chusku kaq junaqchönami apayämunqan qellayta, qorita y kuyayllapä kaqkunata Tayta Diosnintsikpa templuncho pësaskatsir Uríaspa tsurin sacerdöti Meremotta entregayarqan. Paywanmi kaykäyarqan Fineespa tsurin Eleazar, Josuépa tsurin Jozabad y Binúipa tsurin Noadías. Jozabad y Noadíasqa levitakunami kayarqan. 34 Tsay junaqllami llapanta pësaskir yupayarqan. Nirkurmi aykata chaskiyanqantapis acta libruman qellqayarqan.
35 Tsaypitanami Jerusalénman noqawan shamuqkuna Israel runakunapa jutincho sacrificiuta rupatsiyänanpä sacerdötikunaman entregayarqä chunka ishkay torïtukunata, isqun chunka soqta (96) carnërukunata y qanchis chunka qanchis (77) carnishkunata. Tsaynöllami purificatsina sacrificiupä chunka ishkay chïvukunata entregayarqä. Tsaykunatami Tayta Diosta adorar llapanta rupatsiyarqan. 36 Tsaypitanami rey Artajerjes apatsimanqan cartata tsaycho taq autoridäkunaman y gobernadorkunamanpis apatsirqä. Cartacho rey ordenanqannöllami runakunapä y Tayta Diospa templunpä imaykatapis kamaripäyämarqan.