Jerusalénman Esdras chanqan
7
Tsaypita watakuna päsaskiptinnamia Artajerjesna Persia nacionpa mandaqnin rey karqan. Tsay witsanqa Babilonia provinciachömi Esdras tarqan. Payqa Seraíaspa tsurinmi karqan. Seraíasqa Azaríaspa tsurinmi karqan. Azaríasqa Hilcíaspa tsurinmi karqan. 2 Hilcíasqa Salumpa tsurinmi karqan. Salumqa Sadocpa tsurinmi karqan. Sadocqa Ahitobpa tsurinmi karqan. 3 Ahitobqa Amaríaspa tsurinmi karqan. Amaríasqa Azaríaspa tsurinmi karqan. Azaríasqa Meraiotpa tsurinmi karqan. 4 Meraiotqa Zeraíaspa tsurinmi karqan. Zeraíasqa Uzipa tsurinmi karqan. Uziqa Buquipa tsurinmi karqan. 5 Buquiqa Abisúapa tsurinmi karqan. Abisúaqa Fineespa tsurinmi karqan. Fineesqa Eleazarpa tsurinmi karqan. Eleazarqa Aarónpa tsurinmi karqan. Aarónnami karqan punta kaq mandaq sacerdöti.6 Esdrasqa Moisés chaskinqan leykunatami alli yacharqan. Tsay leykunatami Israel runakunata kuyaq Tayta Dios Moisésta entregarqan. Esdrasta Tayta Dios yanapaptinmi rey Artajerjes llapan mañakunqanta kamariparqan Babiloniapita Jerusalénman aywananpä. 7 Paywanmi aywayarqan sacerdötikuna, levitakuna, cantaqkuna, templu punkuta täpaqkuna, templucho aruqkuna y wakin Israel runakunapis. Paykunami aywayarqan Artajerjes qanchis wata rey kaykanqan witsan.
8 Rey Artajerjes qanchis watana rey kaykaptinmi pitsqa kaq killacho Jerusalénman Esdras charqan. 9 Paymi Babiloniapita yarqamurqan wata qallaykunan punta kaq killa punta kaq junaqcho. Jerusalénman charqan pitsqa kaq killacho punta kaq junaqmi.b Kuyapäkuq Tayta Dios yanapaptinmi yamaylla chäyarqan.
10 Esdrasqa llapan shonqunwan Tayta Diospa leyninkunata yachakurmi cumplirqan. Tsay leykunata y estatütunkunatami Israel mayinkunata yachatsirqan.
11 Babiloniapita manarä yarquptinmi Esdrasta rey Artajerjes cartata entregarqan. Tsay cartachömi nirqan:
12 Ciëlucho kaykaq Tayta Diospa leyninkunata yachaq sacerdöti Esdras, noqa rey Artajerjesmi qampä winchikuynïta apaykätsimü. 13 Levita o sacerdöti kaptinpis llapan mandanqä nacionkunacho taq Israel runakunatami ordenä qamwan aywayta munarqa Jerusalénman aywayänanpä.
14 Noqami qanchis yätsimaqnïkunawan Judáman y Jerusalénman qamta kachaykä Diosnikipa leyninkunata tsaycho cumplitsinaykipä. 15 Yätsimaqnïkunawan qoriyanqä qellayta y qorita Jerusalénman aywar apanki. Llapan voluntänïkunawanmi qoriyashqä Jerusaléncho taykaq Diosnikipä. 16 Tsaynölla apanki Babilonia provinciacho qoriyanqayki qellayta y qorita. Tsay jananman apanki runakuna y sacerdötikuna voluntäninpita ofrenda qoriyanqantapis. Llapan tsaykunata Jerusalén templuman churanki.
17 Tsaykunawannami rantinki torïtukunata, carnërukunata, carnishkunata, tsaki mikuyta y vïnutapis. Tsaykunata Diosnikipa templuncho kaykaq altarcho sacrificiupä rupatsinki. 18 Sobraq kaq qellayta y qorita Tayta Diosniki tantiyatsishunqaykinölla gastanki.
19 Tsaynölla Diosnikita templuncho adorayänaykipä kutitsishunqayki manëjukunata templuman churanki. 20 Diosnikipa templunpä imapis pishiptinqa churakunä almacenpita jipinki.
21 Éufrates mayu tsimpan provinciacho kaykaq tesorërukunatami noqa rey Artajerjes ordenar nï: Esdras mañakushunqaykitaqa imatapis kamaripäyanki. Payqa ciëlucho kaykaq Tayta Diospa leyninkunata yachatsiq sacerdötimi kaykan. 22 Entregayänaykipä autorizädumi kaykäyanki hasta kimsa waranqa kimsa pachak (3,300) kïlu qellayta, ishkay chunka ishkay waranqa (22,000) kïlu trïguta, ishkay waranqa ishkay pachak (2,200) litru vïnuta y ishkay waranqa ishkay pachak (2,200) litru aceitita. Kachitaqa aykatapis ministinqanman tupu entregayanki.
23 Ciëlucho kaykaq Tayta Dios ordenanqannö Jerusalén templunpä llapanta juklla entregayanki. Tsaynöpami tsurïkunatapis ni mandanqä nacionkunatapis Tayta Dios castiganqatsu. 24 Sacerdötikunata, levitakunata, cantaqkunata, punku täpaqkunata, templucho sirviqkunata ni pï runatapis Diospa templuncho aruq kaqtaqa imapitapis impuestuta ama cobrayankitsu.
25 Esdras, Diosniki tantiyatsishunqaykinö Éufrates mayu tsimpan provinciacho juezkunatapis y gobernadorkunatapis churay. Paykunami arreglayanqa Israel mayikikuna kikinpura quejakuyanqanta. Tsaynöpis Diosnikipa leyninkunata mana yachaq kaqta yachatsinki.
26 Tayta Diosnikipa leyninkunata y noqapa leynïkunata mana cumpliq runakunaqa wanutsiypa karpis, markanpita qarquypa karpis, multata pägatsiypa karpis o carcelman wichqatsiypa karpis juklla castigashqa kayätsun.
Tayta Diosta Esdras mañakunqan
27 Tsaypitanami Tayta Diosta mañakur Esdras nirqan: “Unay castäkuna adorayanqan Tayta Dios, qamtami agradëcikü reyta alli yarpayta qonqaykipita. Paymi Jerusalén templuykicho qamta sirviyänäpä kamakaykätsin. 28 Tsaynöpis agradëcikümi kuyapämarnin reytapis, yätsiqninkunatapis y mandashiqninkunatapis yanapayämänanpä yarpayta qonqaykipita. Tsaynö yanapamaptikimi Israel mayor runakunata qorishqä Jerusalénman noqawan aywayänanpä”.