Rey Darío ordinta apatsinqan
6
Cartakuyanqanta liyiskirmi rey Darío Babilonia nacionpa väliq documentukuna churaräkunancho actata ashitsirqan. 2 Media provinciacho Acmeta markacho kaykaq palaciuchömi ashinqan actata tariyarqan. Tsay actachömi qellqararqan:3 Persia nacionpa mandaqnin rey Ciro juk watana mandaq kaykarmi ordenar nirqan:
Tayta Diospä sacrificiukunata rupatsiyänaykipä cimientuta shumaq churaykur Jerusaléncho Tayta Diospa templunta yapay shäritsiyay. Tsay templu katsun altunpis anchunpis ishkay chunka qanchis (27) metru. 4 Cada kimsa fïla jatusaq llaqllashqa rumikunata pirqarkur juk fïla allinnin mushuq tablakunawan entablatsiyay. Llapan gastukunataqa tesorërümi päganqa. 5 Qoripita y qellaypita rurashqa manëjukunata Tayta Diospa templunpita Babiloniaman Nabucodonosor apamunqantapis Jerusalénman kutitsir Tayta Diospa templunman churayätsun.
6 Tsaynö liyiskirmi rey Daríuqa Éufrates mayu tsimpan provinciapa gobernadornin Tatnaita, Setar-boznaita y mandashiqninkunata ordenar nirqan:
Jerusalénpita witikuyay. 7 Tayta Diospa templun ñöpata kanqancho yapay shäritsiyänanpä Israel runakunapa gobernadorninta y mayor runakunatapis ama michäyaytsu.† 8 Israel mayor runakuna Tayta Diospa templunta yapay shäritsiyänanpämi nï: Éufrates mayu tsimpan provinciacho noqapä qoriyanqayki impuestukunapita llapan gastunkunapä qellayta kamaripäyay. Tsaynöpami ushayanqanyaq arutsiyanqa. 9 Tsaynölla Jerusaléncho kaykaq sacerdötikunata qoyay qoyay llapan ministiyanqanta kamaripäyay. Tayta Diospä sacrificiukunata rupatsiyänanpäpis torïtukunata, carnërukunata y carnishkunatapis kamaripäyay. Tsaynölla trïguta, kachita, vïnuta y aceitita kamaripäyay. 10 Tsaynöpami ciëlucho kaykaq Tayta Diospä sacrificiukunata rupatsir noqapäpis tsurïkunapäpis Tayta Diosta mañakuyanqa.
11 Noqa ninqäta pipis mana cäsukuptinqa wayinpa vïganta jipiskirnin tsaypa puntanman ayanta toqriyanki. Nirkur wayintapis chipyaq juchutsiyanki. 12 Tayta Diosmi Jerusalénta akrashqa tsaycho tänanpä. Tsaynö kaykaptinqa mayqan nacionpa mandaqnin rey tsapata churapaptin Tayta Dios ushakätsitsun. Noqa Daríumi rey kar tsaynö kananpä ordenä. Ninqänölla llapantapis cumpliyay.
13 Tsaymi rey Darío apatsinqan cartacho ninqannölla tsay provinciapa gobernadornin Tatnai, Setar-boznai y mandashiqninkunapis cumpliyarqan. 14 Tsaymi Israel mayor runakuna Tayta Dios ninqannölla templu ruratsiyta ushayarqan. Tsaynöpami profëta Hageo y Iddupa tsurin profëta Zacarías willakuyanqanta cumpliyarqan.† Tsaynöllami cumpliyarqan Persia nacionpa mandaqninkuna rey Ciro, rey Darío y rey Artajerjes ordenayanqanta. 15 Rey Darío soqta watana Persia nacionpa mandaqnin kaykaptinmi Adar killa kimsa kaq junaqchoa templu shäritsiyta ushayarqan.
16 Ushaskiyaptinmi sacerdötikuna, levitakuna y Babiloniapita Judáman chämuq llapan Israel runakuna Diospa templunta inaugurar fiestata kushishqa rurayarqan. 17 Tsay fiestachömi Tayta Diospä sacrificiuta rupatsiyarqan juk pachak (100) torïtukunata, ishkay pachak (200) carnërukunata, chusku pachak (400) carnishkunata y chunka ishkay chïvukunata. Tsay chïvukunataqa purificatsina sacrificiu kananpämi Israel runakunapa cada trïbunpä jukta rupatsiyarqan.
18 Tsaypitanami Moisés qellqanqancho ninqannölla Tayta Diosta Jerusaléncho sirviyänanpä sacerdötikunata según turnun töcayanqanman churayarqan. Tsaynöllami levitakunatapis churayarqan.†
19 Tsaynömi Babiloniapita Judáman chämuqkuna Pascua fiestata rurayarqan wata qallaykunan killa chunka chusku junaqcho.b † 20 Tsay fiestapäqa sacerdötikuna y levitakuna purificakushqanami kayarqan. Tsaymi Pascua fiestapä carnishta pishtar sacrificiuta rupatsiyarqan Babiloniapita Judáman chämuq Israel mayinkunapä, sacerdöti mayinkunapä y kikinkunapäpis. 21 Babiloniapita chämuq Israel runakunawanmi wakin mana Israel runakunapis tsay carnishkunata Pascua fiestacho mikuyarqan. Tsay runakunaqa jutsa ruraq runakunapa mana alli costumbrinkunata kacharishqana karmi Israel runakunata kuyaq Tayta Diosta ashiyarqan.
22 Tsaypitanami qanchis junaqyaq Levadüraynaq Tanta Mikuna fiestata kushishqa rurayarqan. Tsaynö kushikuyarqan templunta yapay sharkatsiyänanpä Asiriac nacionpa mandaqnin reyta Tayta Dios yarpayta qoshqa kaptinmi.