5
Templuta arur sïguiyänanpämi Iddupa tsurin profëta Zacarías† y profëta Hageo† Jerusaléncho y Judácho taq Israel runakunata Tayta Dios revelanqanta willayarqan. 2 Tsaymi Salatielpa tsurin Zorobabel† y Josadacpa tsurin Josué Tayta Diospa templunta Jerusaléncho yapay arutsir qallaykatsiyarqan. Tayta Diospa profëtankunapis arushirmi tsaycho kayarqan.†3 Tsayta musyaskirmi tsay provinciapa gobernadornin Tatnai, Setar-boznai y mandashiqninkuna aywaykur Israel runakunata niyarqan: “¿Pitä qamkunata ordenayäshushqayki kay templuta yapay shäritsiyänaykipä?”
4 Mastapis niyarqanmi: “Templuta yapay shäriykätsiq runakunapa jutinkunata willayämay”.
5 Tsaynö niyaptinpis Israel mayor runakunata mana michäyänanpämi gobernador Tatnaita Tayta Dios tantiyatsirqan. Tsaymi Tatnai, Setar-boznai y mandashiqninkuna niyarqan: “Puntataqa rey Daríuman cartata apatsishun imata ninqantapis musyanantsikpä”.
6 Kaychömi qellqaraykan rey Daríuman cartakuyanqan. Kay cartatami gobernador Tatnai, Setar-boznai y mandashiqninkuna cartakuyarqan. 7 Tsay cartachömi nirqan:
Tayta mandaq Darío, qamtami winchikayämü.
8 Noqakunami Judá provinciaman aywayashqä munayyuq Tayta Diospa templun kanqan kaqman. Tsaychömi rikayashqä Israel runakuna jatusaq rumikunawan templunta yapay shäriykätsiyaqta. Tsaynöpis rikayashqämi templuta pirqaskir tablakunawan entablaykäyaqta. Aruqkunaqa juklla ushayta munarmi ras aruykäyan.
9 Tsayta rikaskirmi Israel mayor runakunata tapuyashqä: “¿Pitä ordenayäshushqayki templuta yapay shäritsiyänaykipä? 10 Reyta willayänäpä arutsiqkunapa jutinkunata willayämay” nir.
11 Tsaymi niyämashqa: “Noqakunaqa ciëluta y kay patsata kamaq Tayta Diostami adorayä. Payta adorayänäpämi kay juchutsiyanqan templuta yapay shäriykätsiyä. Kay templutaqa kay nacionpa mandaqnin reyshi unay shäritsinä. Payshi kay nacioncho wakin reykunapitapis mas munayyuq kanä.† 12 Tsaypita atska watakuna päsaskiptinnashi unay castäkuna ciëlucho kaykaq Tayta Diosta pasaypa ajanätsiyänä. Tsaynö ajanätsiyaptinshi Tayta Dios paykunata kachariykunä Babiloniaa nacionpa mandaqnin rey Nabucodonosorpa munayninman. Tsay reyshi kay templuta juchuskatsir unay castäkunata Babiloniaman prësu apanä.†
13 “Tsaypita qepatanami rey Ciro Tayta Diospa templunta yapay shäritsiyänäpä ordenayämarqan.† Tsaynö ordenayämarqan Babilonia nacionpapis mandaqnin rey juk wata kaykarmi. 14 Tsayshi Babiloniacho kaykaq templupita jipiskir qoripita y qellaypita rurashqa manëjukunata Jerusalén templuman kutitsiyänanpä rey Ciruqa Sesbasarta entreganä. Payta entreganä Judácho gobernador kananpä churaskirshi. Tsay manëjukunataqa Babiloniapa unay mandaqnin rey Nabucodonosorshi Tayta Diospa templunpita Babiloniacho kaykaq templunman apanä.
15 “Manëjukunata Sesbasarta qoykurshi rey Ciro ninä: ‘Llapan manëjukunata Jerusaléncho templuman kutitsiyay. Tsaynöpis punta kanqallancho Tayta Diospa templunta yapay shäritsiyay’. 16 Tsaynö niptinshi Sesbasarqa Jerusalénman chaykamur Tayta Diospa templunpa cimientunta churatsinä. Tsaynö shäritsirpis manarämi aruyta ushayärätsu”.
Tsaynömi paykuna niyämashqa.
17 Tayta rey, paykuna niyanqan rasunpaypa kanqanta musyanaykipä Babilonia nacionpa acta libruncho ashiykatsiy. Mä rasunpaypakush rey Ciro ordenanä Jerusaléncho Diospa templunta yapay shäritsiyänanpä. Tsay acta librucho imanö qellqaranqantapis liyiskir imata yarpanqaykitapis willaykatsiyämay.