Templuta shäritsiyaptin chikiqkuna michäyanqan
4
Judá trïbuta y Benjamín trïbuta chikiq runakunami musyayarqan juklächo täyanqanpita chaykamur Tayta Diospa templunta yapay shäriykätsiyanqanta. 2 Tsaymi Zorobabel kaqman y mayor runakuna kaqman aywaykur niyarqan: “Noqakunapis templuta arur yanapayäshayki. Qamkunanömi noqakunapis Diosnikikunaman yärakuyä. Unay castäkuna kaycho täyänanpä Asiria runakunapa mandaqnin rey Esar-hadón kayman churanqanpita sacrificiukunata Tayta Diospä rupatsiyashqä”.a3 Tsaynö niyaptinmi Zorobabel, Josué y mayor runakuna niyarqan: “Tayta Diosnïpa templunta shäritsiyaptï yanapayämänayki manami conviënintsu. Persia nacionpa mandaqnin rey Ciro ordenayämanqannöllami kikilläkuna Tayta Diosnïpa templuntaqa shäritsiyäshä”.
4 Tsaynö niyaptinmi tsay runakuna ajanarnin Judá runakuna arur mana sïguiyänanpä desanimatsiyta munayarqan. 5 Templu shäritsiqkunata michäyänanpämi autoridäkunatapis wakintaqa sobornuyarqan. Tsaynö michäyarqan Persia nacionpa mandaqnin rey Ciro mandanqan witsanpita hasta rey Darío mandanqanyaqmi.b
Jerusalén markata allitsayaptin chikiqkuna michäyanqan
6 Persia nacioncho rey Asuero† mandayta qallaykunqan witsanpisc Judácho taq runakunata y Jerusaléncho taq runakunata desanimatsiyänanpämi manakaqkunata tumpar reyman cartata apatsiyarqan.
7 Tsaynöllami Persia nacionpa mandaqnin rey Artajerjes† kanqan witsanpisd Bislam, Mitrídates, Tabeel y mandaq mayinkuna manakaqkunata tumpar cartata apatsiyarqan. Tsay cartata arameo idiömachömi qellqayarqan. Rey kaqman chaptinmi Persia runakuna parlayanqan idiömaman traduciyarqan.
8 Tsaypitanami Jerusaléncho taq runakunata manakaqkunata tumparnin gobernador Rehum y secretariu Simsai rey Artajerjesman juk cartata apatsiyarqan. 9 Gobernador Rehum y secretariun Simsaimi tsay cartata qellqayarqan juezkunawan, gobernadorkunawan y autoridäkunawan willanakuskir. Tsay autoridäkunami Persiapita, Erecpita, Babiloniapita y Elamcho kaykaq Susapita kayarqan. 10 Cartacho ninqantami awniyarqan Samaria markakunacho taq runakuna y wakin provinciakunacho taq runakunapis. Tsay provinciakunaqa Éufrates mayupita hasta lamaryaqmi karqan. Tsaycho taq runakunapa unay castankunataqa rey Asnapar wakin nacionkunapita prësu aparmi tsaycho täyänanpä churarqan. 11 Gobernador Rehum y secretariu Simsai apatsiyanqan cartachömi nirqan:
Tayta rey Artajerjes, Éufrates mayu kay tsimpa provinciacho taq sirviqnikikuna karmi kay cartata apaykätsiyämü. 12 Qam kaqpita kayman shamuq Israel runakunami Jerusalén markata allitsaykäyan. Tsay markachöqa mana wiyakuq mana alli runakunallami imaypis täyarqan. Tsay markatami entëru kuchunpa cimientunkunata allitsaskir pirqa murällata shäriykätsiyan.
13 Tsay markata allitsar murällata jiruruypa shäritsir usharqa impuestukunatapis manami pägayanqanatsu. 14 Qampa sirviqnikikuna kaykarqa manami rikaräkuyämantsu tsay runakuna contrayki shäriyänanta. Tsaymi musyanaykipä kay cartata apaykätsiyämü.
15 Taytay, niyanqä rasunpaypa kanqanta shumaq musyanaykipä unay acta librukunata rikaykullay. Tsaykunata liyirmi musyanki Jerusaléncho taqkuna mana cäsukuq kayanqanta. Paykunaqa reypa y ñöpan provinciacho taq runakunapa contran shäriyaptinmi tsay markata ushakätsiyarqan.
16 Jerusalén markata allitsar murällanta shäritsiyta ushayaptinqa Éufrates mayu kay tsimpacho taq llapan runakunapis manami munaynikichönatsu kayanqa. Tayta rey, tsayta musyanaykipämi kay cartata apaykätsiyämü.
17 Tsaypitanami rey Artajerjes cartata contestar nirqan:
Gobernador Rehum, secretariu Simsai, Samariacho taq runakuna y Éufrates mayu tsimpan provinciacho taq runakuna, qamkunatami winchikamü.
18 Apatsiyämunqayki cartatami parlanqä idiömaman traducir liyipämashqa. 19 Cartacho niyämanqaykinöllami Jerusaléncho taq runakuna imanö kayanqantapis musyanäpä churaraykaq acta librukunata liyitsishqä. Niyanqaykinöllami qellqaraykan tsay runakuna reykunapa contran imaypis shäriyanqan. 20 Tsaynöpis musyashqämi Jerusaléncho munayyuq reykuna unay kayanqanta, entëru Éufrates mayu tsimpa provinciata munaynincho tsararäyanqanta y tsay provinciacho taq runakunata impuestukunata pägatsiyanqanta.
21 Kananqa tsay aruqkunata niyay manana aruyänanpä. Arur sïguiyänanpä ninqäyaq Jerusalén markata amana shäritsiyätsunnatsu. 22 Mandanqätaqa juklla paykunata niyay. Mana niyaptikiqa mandanqä provinciakunacho conträmi shäriyanqa.
23 Rey Artajerjes apatsinqan cartata chaskirmi Rehumta, secretariu Simsaita y mandaq mayinkunatapis liyiparqan. Tsay cartacho ninqanta musyaskirmi Jerusalénman aywarnin Israel runakunata niyarqan Jerusalén markata manana shäritsiyänanpä.
Templuta shäritsiyta yapay qallaykuyanqan
24 Jerusaléncho templuta shäritsiyänanpä michäyaptinmi† arur sïguiyarqannatsu Persia nacionpa mandaqnin rey Darío ishkay wata rey kanqan witsanyaq.