Altarta shäriskatsir Tayta Diosta adorayta qallaykuyanqan
3
Unay castankunapa markankunacho yachakashqa karmi Israel runakuna tsay yarpaylla Jerusalénman qorikäyarqan. Tsay karqan chäyanqan wata qanchis kaq killachömi.a † 2 Tsaymi Josadacpa tsurin Josué y Salatielpa tsurin Zorobabel Tayta Diospa altarninta rurar qallaykatsiyarqan. Paykunatami yanapayarqan Josuépa castan sacerdötikuna y Zorobabelpa castankunapis. Tayta Diosta sirviq Moisés qellqanqan leykunacho ninqannöllami sacrificiukunata rupatsiyänanpä tsay altarta rurayarqan.† 3 Vecïnun marka runakuna atacayänanta mantsariykarpis ñöpa kanqallanchömi altarta shäritsiyarqan. Tsaychömi tutapapis tardipapis Tayta Diospä sacrificiukunata rupatsiyarqan.†4 Ramäda fiestatapis† leykunacho ninqannöllami rurayarqan. Tsay fiestachömi aykata rupatsiyänanpäpis leykunacho ninqannölla qoyay qoyay sacrificiukunata rupatsiyarqan. 5 Fiesta ushakaskiptinnami Tayta Dios mandanqannölla sacrificiukunata qoyay qoyay rupatsiyarqan. Tsaynöllami llullu killachöpis y fiestakunachöpis sacrificiukunata rupatsiyarqan. Runakuna llapan voluntäninwan apayämunqantapis Tayta Diospämi altarcho rupatsiyarqan.† 6 Qanchis kaq killa qallaykunan junaqpitami Tayta Diospä sacrificiukunata rupatsir qallaykuyarqan. Tsaynö rupatsiyarqan templuta shäritsiyänanpä cimientuta manarä churarmi.
Templuta shäritsir qallaykuyanqan
7 Tsaypitanami templuta shäritsiyänanpä albañilkunata y carpintërukunata pägayarqan. Tiro y Sidón runakunatapis mikuywan, aceitiwan y vïnuwan pägayaptinmi lamar janallanpa Líbano nacionpita Jope markayaq cedru qeruta apapäyämurqan. Israel runakuna llapanta rurayarqan Persia nacionpa mandaqnin rey Ciro mandanqannöllami. 8 Tsaynöpami Salatielpa tsurin Zorobabel y Josadacpa tsurin Josué Diospa templunta shäritsir qallaykuyarqan. Paykunatami yanapayarqan sacerdöti mayinkuna, levitakuna y Babiloniapita Jerusalénman llapan chämuq runakuna. Tsaynö shäritsir qallaykuyarqan Jerusalénman chäyämunqanpita juk watata cumpliskir ishkay killachömi.
Levitakunatanami ishkay chunka (20) watayuqpita janaman kaqkunata churayarqan Tayta Diospa templunta aruyaptin capataz kayänanpä. 9 Tsay capatazkunami kayarqan Jesúa, Cadmiel, tsurinkuna y castankunapis. Paykunaqa Hodavíaspita aywaraqkunami kayarqan. Tsaynöllami paykunata yanapayarqan Henadadpita aywaraqkuna.
10 Tayta Diospa templunpa cimientunta pirqayta qallaykuyaptinmi sacerdötikuna chäyarqan sagrädu sotänan jatishqa y cornëtan aptashqa. Tsaynöllami levitakuna churanakuyarqan platïllunkunata tukar Tayta Diosta alabayänanpä. Tsay levitakunaqa Asafpita aywaraq runakunami kayarqan. Paykunami churanakuyarqan Israel runakunapa mandaqnin rey David ordenanqannö.† 11 Tayta Diosta agradëcikurmi alabar niyarqan:
“¡Tayta Diosqa allillata ruraqmi!
¡Kuyakuq kayninqa Israel runakunapä imaypis manami ushakantsu!”†
Tsaynö nirmi cimientu churayta llapan runakuna pasaypa kushikurnin Tayta Diosta alabayarqan.
12 Tsaycho kaykaq atska sacerdötikuna, levitakuna y mayor runakuna awkin karmi unay kaq templu imanö kanqanta yarparäyarqan. Paykunaqa mushuq templuta shäritsiyänanpä cimientu churayanqanta rikarmi punta kaq templupä yarpaskir pasaypa waqayarqan. Wakinnami cimientuta churayaptin pasaypa kushikuyarqan. 13 Tsaynö büllata rurayaptinmi mayqan kushikuypita o llakikuypita qayaraykäyanqantapis tantiyayarqantsu. Tsaynö büllata rurayanqanqa karuyaqmi wiyakarqan.