Mana Israel warmipita rakikäyänanpä willanakuyanqan
10
Tayta Diospa templun punkucho waqarnin Esdras lätakaykur perdonta mañakuptinmi atska runakuna, warmikuna y wamrakunapis paypa ñöpanman qorikaskir pasaypa llakikurnin waqayarqan. 2 Tsaynö kaykäyaptinmi Elampita aywaraq Jehielpa tsurin Secanías Esdrasta nirqan: “Noqakunami mana Israel warmikunawan majatsakar Tayta Diosnintsikta cäsukuyashqätsu. Tsaynö kaptinpis Tayta Dios manarämi ushakätsimashqantsikrätsu.3 “Tayta Diosnintsikwanmi pactuta rurayäshä jäpa warmïkunawan rakikar wamrantinta qarquriyänäpä. Ninqaykinömi Tayta Diosnintsikpa leyninkunata cäsukuyäshä. Tsaynöllami llapanpis Diosnintsikta cäsukuqkuna nikäyan. 4 Sharkur llapäkunata yätsiykayällämay. Noqakunaqa ninqaykita rurayänäpä listumi kaykäyä. Imata rurayänäpäpis juklla niykayällämay”.
5 Tsaynö niptinmi Esdras ichiykur mandaq sacerdötikunata, levitakunapa mandaqninkunata y llapan Israel mayinkunata juratsirqan Secanías ninqanta cumpliyänanpä. Tsaynö niptinmi llapan jurayarqan.
6 Tsaymi Tayta Diospa templunpita Esdras aywarqan Eliasibpa tsurin Johanánpa wayinman. Tsaychömi llakikurnin imatapis mana mikuypa ni mana upuypa wararqan. Tsaynö llakikurqan Babiloniapita Jerusalénman punta shamuqkuna Tayta Diosta mana cäsukuyanqanpitami.
7 Tsaypitanami entëru Judápa y Jerusalénpa willakatsirqan Babiloniapita llapan shamuqkuna Jerusalénman qorikäyänanpä. 8 Tsaynöllami willakatsirqan kimsa junaqta mana chämuq runakunapa imaykankunatapis qechuyänanpä y Israel mayinkuna täyanqan markakunapita qarquyänanpä. Tsaynö rurayänanpämi Israel mayor runakuna y yätsiqninkuna willanakuyarqan.
9 Kimsa junaqchönami Judá trïbu runakuna y Benjamín trïbu runakuna llapanpis Jerusaléncho qorikäyarqan. Tsayqa isqun kaq killa ishkay chunka (20) junaqchömi karqan.a Templupa patiunman chaykurmi jamaykuyarqan. Tsayman qayatsinqanpita y pasaypa tamyaptinmi llapan mantsarir tsuktsukyäyarqan.
10 Tsaypitanami sacerdöti Esdras ichiykur nirqan: “Qamkunaqa mana Israel warmikunawan tätsinakurmi jutsata rurayashqayki. Tsaynöpami llapantsik jutsayuq kaykantsik. 11 Unay castantsikkuna yärakuyanqan Tayta Diospa ñöpancho jutsata rurayanqaykipita perdonta mañakuyay. Tsaynöpis Tayta Diosta cäsukur mana Israel warmikikunapita rakikäyay”.
12 Tsaynö niptinmi llapan runakuna jinchi niyarqan: “Taytay, niyämanqaykitaqa llapantami cumpliyäshä. 13 Itsanqa mana Israel warmiwan majatsakashqa kaqkuna atskaqmi kayä. Kay parlaykanqantsikqa manami juk junaq ni ishkay junaqlla arreglaypätsu kaykan. Tamya killa kaykaptinqa manami cällillacho ichiräkuyämantsu. 14 Llapäkuna kaycho kayänäpa trokinqa mandamaqnïkunalla quëdayätsun. Paykuna jitapäyämanqan junaqmi mana Israel warmiwan majatsakaqkuna mayor runakunawan y juezkunawanpis Jerusalénman kutiyämushä. Arreglayaptinmi Tayta Diosnintsik ajananqanatsu”.
15 Asaelpa tsurin Jonatán y Ticvapa tsurin Jahazíasllami tsay ninqanta chaskikuyarqantsu. Levita Mesulam y levita Sabetaipis paykunapa jananmi shäriyarqan.
16 Tsay chuskun mana chaskikuyaptinpis Babiloniapita wakin shamuq runakunaqa llapanmi chaskikuyarqan. Tsaymi sacerdöti Esdras cada castapita juk mayor runata churarqan arreglananpä. Chunka kaq killa punta kaq junaqchönami tsay runakuna qorikaskir willanakuyarqan cada runata imanö juzgayänanpä kanqantapis. 17 Wata qallaykunan punta kaq junaqmi mana Israel warmiwan majatsakashqa kaq runakuna imanö kayänanpäpis autoridäkuna willanakuyta ushayarqan.
18 Kaychömi qellqaraykan mana Israel warmiwan majatsakanqanpita rakikaq sacerdötikunapa jutinkuna:
Maasías, Eliezer, Jarib, Gedalías (paykunaqa Josadacpa tsurin Josuépita y wawqinkunapita aywaraqkunami kayarqan. 19 Makinkunata joqarirmi promitiyarqan warminpita rakikäyänanpä. Mana Israel warmiwan majatsakäyanqanpita perdonashqa kayänanpämi juk carnëruta apayämurqan),
20 Hanani, Zebadías (paykunaqa Imerpita aywaraqkunami kayarqan),
21 Maasías, Elías, Semaías, Jehiel, Uzías (paykunaqa Harimpita aywaraqkunami kayarqan),
22 Elioenai, Maasías, Ismael, Natanael, Jozabad y Elasa (paykunaqa Pasurpita aywaraqkunami kayarqan).
23 Kaychömi qellqaraykan mana Israel warmiwan majatsakanqanpita rakikaq levitakunapa jutinkuna: Jozabad, Simei, Kelita ninqan Kelaía, Petaías, Judá y Eliezer.
24 Kaychömi qellqaraykan mana Israel warmiwan majatsakanqanpita rakikaq cantaqpa jutin: Eliasib.
Kaychömi qellqaraykan mana Israel warmiwan majatsakanqanpita punku täpaqkunapa jutinkuna: Salum, Telem y Uri.
25 Kaychömi qellqaraykan mana Israel warmiwan majatsakanqanpita rakikaq wakin Israel runakunapa jutinkuna:
Ramía, Jezías, Malquías, Mijamín, Eleazar, Malquías, Benaía (paykunaqa Paruspita aywaraqkunami kayarqan),
26 Matanías, Zacarías, Jehiel, Abdi, Jeremot, Elías (paykunaqa Elampita aywaraqkunami kayarqan),
27 Elioenai, Eliasib, Matanías, Jeremot, Zabad, Aziza (paykunaqa Zatupita aywaraqkunami kayarqan),
28 Johanán, Hananías, Zabai, Atlai, (paykunaqa Bebaipita aywaraqkunami kayarqan),
29 Mesulam, Maluc, Adaía, Jasub, Seal, Ramot (paykunaqa Banipita aywaraqkunami kayarqan),
30 Adna, Quelal, Benaía, Maasías, Matanías, Bezaleel, Binúi, Manasés (paykunaqa Pahat-moabpita aywaraqkunami kayarqan),
31 Eliezer, Isías, Malquías, Semaías, Simeón, 32 Benjamín, Maluc, Semarías (paykunaqa Harimpita aywaraqkunami kayarqan),
33 Matenai, Matata, Zabad, Elifelet, Jeremai, Manasés, Simei (paykunaqa Hasumpita aywaraqkunami kayarqan),
34 Madai, Amram, Uel, 35 Benaía, Bedías, Quelúhi, 36 Vanías, Meremot, Eliasib, 37 Matanías, Matenai, Jaasai (paykunaqa Banipita aywaraqkunami kayarqan),
38 Simei, 39 Selemías, Natán, Adaía, 40 Macnadebai, Sasai, Sarai, 41 Azareel, Selemías, Semarías, 42 Salum, Amarías, José (paykunaqa Binúipita aywaraqkunami kayarqan),
43 Jeiel, Matatías, Zabad, Zebina, Jadau, Joel y Benaía (paykunaqa Nebupita aywaraqkunami kayarqan).
44 Tsay runakunaqa llapanmi mana Israel warmiwan majatsakäyarqan. Rakikarninmi tsay warmikunata wamrantinta qarquyarqan.