Rutta qorinanpä Booz ninqan
3
Tsaypita juk junaqnami llumtsuyninta Noemí nirqan: “Hïja, manami runaynaqllaqa kakunkimantsu. 2 Runäpa castanllarä kaptinmi Boozwan tätsiyta yarpaykä. Pallapakuq aywaptikipis payqa allimi chaskishushqayki. Kanan paqasmi cebäda wayraq aywanqa. 3 Qampis bäñakuskir allinnin kaq latsapaykita jatikuskir y perfümitapis wiñakuskir ayway. Chaykur pakaranki mikuyta upuyta ushanqanyaq. 4 Mayninmanpis pununqanta shumaq rikaykur chakillanman punukuykunki. Tsaychönami qamwan tayta munarqa parlapäshunki”.5 Rutnami nirqan: “Yätsimanqaykinöllami llapantapis rurashä”.
6 Tsaymi ëraman aywaykur suegran yätsinqannölla Rut rurarqan.
7 Booznami tsay ëracho kushishqa mikuskir upuskir cebäda qoturaykanqan kaq ñöpancho punurqan. Tsaycho punuykaptinmi qataranqanta yachayllapa qariskir Boozpa chakillanman Rut punukuykurqan. 8 Pullan paqas rikcharkur Booz tikrakunqanchömi chakincho warmi punuykanqanta tantiyaskirqan. 9 Tsaymi tapurqan: “¿Pitä kanki?”
Paynami nirqan: “Taytay, noqaqa Rutmi kä. Runäpa castan kaptikimi costumbri kanqannö qorikamänaykita munä”.
10 Tsaynö niptinmi Booz nirqan: “Noemípa wamrankuna wanur ushakaptinpis tsay casta mana illakänanpä qamqa allimi yarpachakushqayki.a Tsaynö yarpachakunqaykipita Tayta Dios yanapaykulläshuy. Wakin warmikunanöpis karqa pï chöluwanpis imaykayuq o imaynaq kaptinpis tankiman karqan.
11 “Hïja, ama llakikuytsu. Kay markacho llapanmi musyayan alli warmi kanqaykita. Tsaymi mañakamanqaykinö llapanta rurashä. 12 Runaykipa castan kaptïpis† jukrämi kaykan mas legïtimu kaq castan. 13 Kananqa tsayllapa punukamuy. Waraymi musyashun tsay runa qorishunaykipä o mana qorishunaykipä kanqantapis. Pay qorishuptikipis allimi kanqa. Mana qorishuptikiqa noqami qorikushayki. Ninqätaqa Tayta Dios wiyaykämanmi. Rasunpaypami awninqäta cumplishä”.
14 Tsay paqasmi Boozpa chakin kaqllacho Rut punukurqan. Tsaycho pununqanta pipis rikananta Booz mana munaptinmi tsaka tsakalla Rut shärikurqan aywakunanpä. 15 Manarä aywakuptinmi Booz nirqan: “Jakuykita kamamuy cebädata wiñapunäpä”.
Tsaymi jakunta kamapaptin ishkay arröbatanö cebädata wiñaparqan. Joqariparkuptinmi aparikurkur wayinman kutikurqan.
16 Wayinman Rut chaykuptinmi suegran tapurqan: “Hïja, ¿imatatä Booz nishushqayki?” nir.
Tsaymi Rut willarqan Booz llapan ninqankunata. 17 Nirkurmi nirqan: “ ‘Jinayllaqa ¿imanötä suegraykiman chanki?’ nirmi kay cebädata qaramashqa”.
18 Tsaynö niptinmi Noemí nirqan: “Hïja, mä shuyäshun. Imanöshi kanqa. Nishunqaykita manarä rurarqa jamaytapis tsay runa manami tarinqatsu”.