Rutwan Booz tanqan
4
Tsaypitanami marka yaykuna punkuman aywaykur Booz jamaraykaptin Rutpa runanpa mas legïtimu kaq castan päsaykarqan. Päsaykaqta rikaskirmi Booz qayaykur nirqan: “Ichik parlaskishun”.Tsaynö niptinmi tsay runa aywar jamaykurqan. 2 Nirkurnami tsay markacho taq chunka mayor runakunata Booz qayaykatsir jamakuyänanpä nirqan. 3 Castan runatanami nirqan: “Moab nacionpita kutimuq Noemími runanpa chakranta rantikuyta munaykan. Tsay chakraqa castantsik Elimelecpa kaqmi kaykan. 4 Tsaymi mas legïtimu castan kaptiki qamta willaykä rantiyta munarqa kay mayor runakunapa puntancho rantinaykipä. Mana rantiyta munarqa willamay noqapis castan kaykarqa rantinäpä”.
Tsaynö niptinmi tsay runa nirqan: “Rantishämi taytay”.
5 Tsaymi Booz nirqan: “Noemípa chakranta rantirqa Moab nacionpita shamuq viüda Rutwanpis tänaykimi. Tsaynöpami Rutpa wamran yurir wanuq runanpa tsurinnö kanqa tsay chakrapa duëñun kananpä”.
6 Tsaymi tsay runa nirqan: “Tsaynö kaptinqa manami rantïmantsu. Rutwan majatsakaptïqa tsay rantinqä chakra manami herenciätsu kanqa, tsaypa trokinqa paypa wamrallanpänami kanqa. Noqa rantinäpa trokinqa qam rantiy”.
7 Tsay witsan Israel nacioncho pipis castanpa chakranta rantiyta mana munarqa chakra rantiyta munaq kaqtami llanqinta jipiskir entregaq. Tsaynöpami runakuna musyayaq llanqinta chaskiq kaqna chakrata rantinanpä kanqanta. 8 Tsaymi llanqinta jipiskir Boozta makyar nirqan: “Castantsikpa chakranta qam rantiy”.
9 Tsaynö niptinmi Boozqa mayor runakunata y tsaycho kaykaq wakin runakunata nirqan: “Qamkuna rikaykäyankimi Elimelecpa, Queliónpa y Mahlónpa chakranta Noemípita rantinqäta. 10 Tsaynöpis qamkuna musyayankimi Mahlónpa viüdan Rut noqapa warmïna kananpä kanqanta. Tsaynöpami Rutpa wamran Mahlónpa tsurinnöna kanqa y Mahlónpa chakranpis Rutpa wamranpana kanqa.† Ninqäkunataqa llapaykimi wiyaykäyanki”.
11 Tsaynö niptinmi mayor runakuna y tsaycho wakin runakunapis niyarqan: “Ninqaykitaqa llapantami wiyaykäyä. Tayta Dios bendicionninta Rutman churaykullätsun. Raquelpa y Leapa wamrankuna atska kanqannö paypapis wamrankuna atska kaykullätsun. Paykunapita aywaraqllami llapantsikpis Israel runakunaqa kaykantsik. Qamtapis Tayta Dios yanapaykulläshuy Efrata ninqan Beléncho pïmaypis respitayäshunaykipä. 12 Tsaynöpis Tayta Dios bendisaykulläshunki Tamarcho Judápa tsurin Farespita† aywaraqkuna atska kayanqannö qampapis tsurikikuna Rutcho atska kayänanpä”.
13 Tsaynöpami Rutwan Booz majatsakarqan. Tayta Dios bendicionninta churaptinmi Rut qeshyaq rikakur ollqu wamrata qeshyakurqan. 14 Tsaymi warmikuna Noemíta niyarqan: “¡Tayta Dios alabashqa kaykullätsun! Paymi munashqa Rutpa wamran kananta. Tsay wamran willkaykinö kar Israel nacionnintsikcho respitashqa kaykullätsun. 15 Chakwanyaptikipis tsay willkaykimi yanapashunki y wätashunki. Kuyashuqniki llumtsuynikipa wamran karmi qanchis ollqu wamraykipitapis mas alli rikaykäshunki”.
16 Noemínami willkanta alläpa kuyar wätarqan. 17 Tsaymi Noemípa vecïnankuna niyarqan: “¡Noemíqa wamran aparishqami puriykan!”
Tsay wamratami jutitsirqan Obedta. Obedmi Isaípaa taytan karqan. Isaínami Davidpa taytan karqan.
Davidpa unay castankuna
18 Kaykunami Farespita Davidyaq aywaraqkuna kayarqan:
Farespa tsurinmi karqan Hezrón.
19 Hezrónpa tsurinmi karqan Ram.
Rampa tsurinmi karqan Aminadab.
20 Aminadabpa tsurinmi karqan Naasón.
Naasónpa tsurinmi karqan Salmón.
21 Salmónpa tsurinmi karqan Booz.
Boozpa tsurinmi karqan Obed.
22 Obedpa tsurinmi karqan Isaí.
Isaípa tsurinnami karqan David.†