Boozpa chakrancho Rut pallapakunqan
2
Belén markachömi juk rïcu runa Booz jutiyuq karqan. Paymi Noemípa runan Elimelecpa castan karqan. 2 Juk junaqmi Noemíta Rut nirqan: “Aywä cebäda segaqkuna shushupakunqanta pallapakamunäpä.† Chakraman chaptïqa pillapis kuyapämanqami”.Tsaynö niptinmi suegranqa nirqan: “Hïja, aywaptiki allimi kanman”.
3 Tsaynö aywaykanqanchömi cebäda segaqkuna jaqiyanqankunata rikar pallapakuq yaykurqan. Tsay chakraqa suegrun Elimelecpa castan Boozpami kanä. 4 Rut pallapakuykaptinmi markapita Booz chaykur llapan aruqninkunata winchikur nirqan: “Tayta Dios yanapaykuyälläshuy”.
Tsaymi aruqninkunapis niyarqan: “Qamtapis Tayta Dios yanapaykulläshuy”.
5 Tsaymi segaqkunapa capatazninta Booz tapurqan: “¿Pipa tsurintä taqay jipash?” nir.
6 Capataznami nirqan: “Payqa Moab nacionpita Noemíwan shamuq jipashmi. 7 Chaykamurmi pallapata pallakunanpä rugakamashqa. Tutapita patsami mana jamaypa pallaykan. Tsayrämi jamapaykan”.
8 Tsaymi Rut kaqman witiykur Booz nirqan: “Cosëcha ushakanqanyaq kayllaman shakamunki wätaynï jipashkunawan pallapakunaykipä. Juk runapa chakranmanqa ama aywankitsu. 9 Cada tuta kutimur segayanqan qepallanpa pallapakunki. Arupämaqnï runakunatapis nishqänami mana michäyäshunaykipä. Yakunarqa uyllucho kaykaq yakuta upunki”.
10 Tsaynö niptinmi Rutqa urkunpis patsaman töpanqanyaq qonqurikuykur nirqan: “Päkillä taytay, jäpa warmi kaykaptïpis kuyapämanqaykipita”.
11 Tsaymi Booz nirqan: “Musyämi runayki wanuskiptin suegraykiwan alli kawanqaykita. Tsaynöpis musyämi mamaykita, taytaykita y markaykita jaqiskir kay jäpa markaman shakamunqaykita. 12 Tsaynöpis musyämi noqakuna yärakuyanqä Tayta Diosman yärakunqaykita. Llapanchöpis pay yanapaykulläshuy”.
13 Tsaynö niptinmi Rut nirqan: “Päkillä taytay, wätayniki mana kaykaptïpis kuyapämanqaykipita”.
14 Almuerzu höranami Rutta Booz nirqan: “Kayllaman shakamuy poqushqa vïnuwan oqutsipayllapa tantata mikunaykipä”.
Tsaynö niptinmi aruqninkuna jamakuyanqan kaqllaman Rut jamakurqan. Tsaychönami paytapis trïgu kamtsata Booz qararqan. Pacha junta mikuskiptinpis atskarämi sobrarqan. 15 Tsaypitanami aruqninkunata Booz nirqan: “Manöjukunapitapis Rut pallaptin ama michäyankitsu. 16 Tsaypa rantinqa pallakunanpä shushutsiyanki. Imanö pallapaptinpis paytaqa ama michäyankitsu”.
17 Tsay junaq patsa tsakanqanyaqmi Rut pallapakurqan. Tsay pallapakunqanta wiruskir wayraptinmi ishkay arröbanö yarqurqan. 18 Tsayta apakurkur suegran kaqman chaykurmi pallapakunqan cebädata rikatsirqan. Nirkurmi churakunqan mikuytapis suegranta qararqan. 19 Tsaymi Noemíqa kushikurnin nirqan: “Hïja, ¿maychötä kaytsikata pallapakamushqayki? ¿Pitä kuyapäshushqayki tsaytsikata tarimunaykipä? Tsay kuyapäshuqniki runataqa Tayta Dios yanapaykullätsun”.
Rutnami nirqan: “Mamay, Booz jutiyuq runapa chakranchömi pallapakamushqä”.
20 Tsaynö niptinmi Noemí nirqan: “¡Boozqa runäpa castanmi kaykan! ¡Tsaynöpis yanapamänantsikpämi pay kaykan!† ¡Tayta Dios payta yanapaykullätsun! ¡Tayta Diosqa runätapis wamräkunatapis yanapanqannöllami kananpis yanapaykämantsik!”
21 Rutnami nirqan: “Tsaynöpis nimashqa cosëcha ushakanqanyaq wätaynin jipashkunawan pallapakamunäpämi”.
22 Tsaynö niptinmi Noemí nirqan: “Hïja, tsaynö kaptinqa paykunallawan pallapakamuy. Chakran chakran puriptikiqa pipis burlakurpis burlakuykushunkimanchi”.
23 Tsaymi cebäda cosëchawan trïgu cosëcha ushakanqanyaq Boozpa chakrankunallacho Rut pallapakurqan. Tsay witsanqa suegranwan juntumi taykäyarqan.