Rut
Moab nacionman Elimelec aywanqan
1
Israel nacioncho juezkuna mandayanqan witsanmi pasaypa muchuy karqan. Tsaymi Judá trïbu runakuna täyanqan Belén markapita juk runa aywakurqan warminta y tsurinkunata pushakurkur Moab nacionman.a 2 Tsay runapa jutinmi karqan Elimelec. Warminpa jutinmi karqan Noemí. Tsurinkunapa jutinkunami karqan Mahlónwan Quelión. Paykunami Judácho Belén markapita Efrata casta runakuna kayarqan. Moabman chaykurmi tsaycho täyarqan.3 Moab nacioncho Elimelec wanuskiptinmi Noemí viüdayar ishkan wamrankunallawanna quëdayarqan. 4 Tsay wamrankuna chöluyaskirmi Moab nación jipashkunawan majatsakäyarqan. Queliónpa warminpa jutinmi karqan Orfa y Mahlónpa warminpa jutinnami karqan Rut. Moab nacioncho chunka watana taykarmi 5 Mahlón y Queliónpis wanukuyarqan. Runanpis y wamrankunapis wanuskiyaptinmi Noemíqa japallanna quëdarqan.
Rutwan Noemí Belénman kutiyanqan
6 Moab nacioncho kaykarmi Noemí musyarqan Israel runakunaman Tayta Dios bendicionninta churaptin mikuy shumaq wayunqanta. 7 Tsaymi ishkan llumtsuyninkunata pushakurkur Moab nacionpita Judáman kutikurqan.
8 Aywaykäyanqanchömi llumtsuyninkunata nirqan: “Mamaykikunapa wayinman kutikuyay. Noqata y wamräkunata alli rikayämanqaykipita qamkunatapis Tayta Dios yanapaykuyälläshuy. 9 Tsaynöpis Tayta Dios yanapaykuyälläshuy juk runawan majatsakar alli kawayänaykipä”.
Tsaynö niskirmi llumtsuyninkunapita despidikur mutsarqan. Tsaymi llumtsuyninkuna pasaypa llakikur waqar 10 niyarqan: “Manami kutiyta munayätsu. Markaykiman qamwan aywakushun”.
11 Tsaynö niyaptinmi Noemí nirqan: “Kuyashqa wamralläkuna, kutikuyay. ¿Imapänatä qatiräyämankipis? Aywashqapis wamräkuna manami kanqanatsu wiñayaptin täyänaykipä. 12 Wayikikunaman kutikuyay. Yapay runawan majatsakänäpäqa jinapis chakwannami kä. Kanan paqas runawan punur qeshyaq rikakuptïpis 13 numparäku shuyäyankiman wamrä yuriskir chölu tikranqanyaqqa. Manami runaynaqllaqa kakuyankimantsu. Runätapis y wamräkunatapis Tayta Dios qechumashqa kaptinmi llakishqa kaykä. Qamkuna noqawan aywar ñakayaptiki pasaypami llakikushä”.
14 Tsaynö niptinmi llumtsuyninkuna waqayarqan. Waqaykäyanqanchömi Orfaqa suegranta mutsaykur wayinpa kutikurqan. Rutmi itsanqa suegranwan quëdakurqan. 15 Ruttanami Noemí nirqan: “Llumtsuy mayikipis markaykikunaman kutikuykannami. Markaykikunachöqa diosnikikunapis kanmi. Qampis paywan wallkinakur kutikuy”.
16 Rutnami nirqan: “Mamïta, imata nimaptikipis manami jaqishaykitsu. Noqaqa qam aywanqaykipami aywashä. Maychöpis tanqaykichömi täshä. Markaykipis markämi kanqa. Diosnikipis Diosnïmi kanqa. 17 Maychöpis qam wanunqaykichömi noqapis wanushä. ¡Kawaykarrä jaqiskir aywakuptïqa mana kuyapaypa Tayta Dios castigamätsun!”
18 Tsaynö niptinmi Noemíqa imatapis nirqannatsu. 19 Tsaymi ishkan chäyarqan Belénman. Chäyaptinmi llapanpis kushikuyarqan. Warmikunapis juknin jukninmi niyarqan: “¡Noemími kutimushqa!”
20 Tsaynö niyaptinmi Noemí nirqan: “Kananqa amana Noemíb niyämaynatsu. Tsaypa rantinqa Marac niyämay. Llapanpä munayyuq Tayta Diosmi pasaypa castigamashqa. 21 Kaypita aywakuyaptï runäpis wamräkunapis y imaykäkunapis karqanmi. Kananqa pasaypa waktsayashqami kutimushqä. Llapanpä munayyuq Tayta Dios tsaynö castigaykämaptinqa amana Noemí niyämaynatsu”.
22 Tsaynömi Moab nacionpita llumtsuynin Rutwan Noemí kutirqan. Belénman paykuna chäyarqan cebäda cosëcha qallaykaptinmi.