Israel runakunata Jefté salvanqan
11
Galaad particho taq juk alli chölupa jutinmi karqan Jefté.† Taytanpa jutinmi karqan Galaad. Mamannami karqan prostitüta warmi. 2 Legïtimu warminchöpis Galaadpa tsurinkuna karqanmi. Paykuna jatunyarkurmi wayinkunapita Jeftéta qarqur niyarqan: “Qamqa taytäpa tsuripakuyllanmi kaykanki. Paypa kaqtaqa ima herenciatapis manami chaskinkitsu”.3 Tsaymi Tob partiman Jefté aywakur asaltantikunaman takukaskir suwakur purirqan.
4 Tsay witsanmi amonita runakuna Israel runakunata atacayarqan. 5 Tsaymi Galaad particho taq Israel mayor runakuna Tob partiman aywaykur Jeftéta 6 niyarqan: “Taytay, amonita runakunawan pelyayaptï mandaqnïkuna kanaykitami munayä”.
7 Tsaynö niyaptinmi Jefté nirqan: “Qamkunaqa ¿manaku chikiyämar taytäpa wayinpitapis qarqayämarqayki? ¿Qarqaskayämarku shakaykayämushqayki?”
8 Galaadpita aywaq mayor runakunanami niyarqan: “Taytay, runakuna atacayämaptin ima ruraytapis mana kamäpakurmi qamman shäyämushqä. Aywaykulläshun amonita runakunawan pelyar yanapayämänaykipä. Pelyar yanapayämaptikiqa Galaad particho mandaqnïkuna kanaykipämi churayäshayki”.
9 Tsaynö niyaptinmi Jefté nirqan: “Amonita runakunata vincinäpä Tayta Dios yanapamaptinqa ¿rasunpaypaku mandaqnikikuna kanäpä churayämanki?”
10 Tsaymi Galaadpita aywaq mayor runakuna niyarqan: “Imatapis niyämanqaykita rurayänäpämi Tayta Dios rikaykämashqa awniyä”.
11 Tsaynö niyaptinmi paykunawan Jefté aywarqan. Galaadman chaykuyaptinnami mandaqninkuna kananpä churayarqan. Tsaypita Mizpaman aywaykurmi Tayta Diospa ñöpancho Israel runakunata Jefté yapay awnirqan mandaqnin kar guërracho yanapananpä.
12 Nirkurmi amonita runakunapa mandaqnin reyman kachakunata Jefté kacharqan. Chaykurmi niyarqan: “¿Imanirtä nacionnïman yaykamur atacayämashqayki?”
13 Tsaynö niptinmi amonita runakunapa mandaqnin rey nirqan: “Egiptupita yarqakamurmi qamkunaqa Arnón mayupita Jaboc mayuyaq y hasta Jordán mayuyaq nacionnïpita chakräkunatawan markäkunata qechuyämarqayki. Kananqa imapis manarä kanqanyaq kutiykatsiyämay”.
14 Tsaynö ninqanta willayaptinmi amonita runakunapa mandaqnin reyman kachakunata Jefté yapay kacharqan. 15 Chaykurmi tsay kachakuna niyarqan: “Kaynömi Jefté nikan:
“ ‘Noqakunaqa manami moabita runakunapa ni amonita runakunapa nacionninpita mayqan partitapis qechuyashqätsu.† 16 Unay castäkunaqa Egiptupita yarqamur tsunyaq jirkapa päsamurmi Puka Lamarman chäyämurqan. Tsaypita päsamurnami Cadesman chäyämurqan. 17 Tsayman chaykamurmi Edom nacionpa mandaqnin reyta rugakuyarqan nacionninpa päsakuyänanpä. Tsaynö rugakuyaptinpis päsayänanta manami munarqantsu.† Tsaynöllami Moab nacionpa mandaqnin reytapis rugakuyarqan. Paypis manami munarqantsu nacionninpa päsayänanta. Tsaynöpami Cadesllacho patsakuyarqan.
18 “ ‘Päsayänanta mana munaptinmi Edom† y Moab nacionkunapa lindërunkuna ñöpallanpa tsunyaq jirkapana tumayarqan. Rupay yarqamunan kaqläpa aywarmi Arnón mayuman chaykur campamentunkunata rurayarqan. Moabita runakuna täyanqanmanqa manami päsayarqantsu.
19 “ ‘Tsaypitanami unay castäkunaqa kachakunata kachayarqan amorreo runakunapa mandaqnin rey Sehónman. Paymi Hesbóncho tarqan. Chaykurmi niyarqan: “Taytay, aywaykäyanqä kaqman chäyänäpä nacionllaykipa päsakuykuyälläshä”.
20 “ ‘Tsaynö niyaptinpis mana yärakurninmi Sehónqa munarqantsu Israel runakuna nacionninpa päsayänanta. Tsaypa trokinqa soldädunkunawan aywarmi Jahazacho campamentunkunata ruraskir unay castäkunawan pelyayarqan. 21 Tayta Dios yanapaptinmi rey Sehónta y paywan kaykaq runakunata ushakätsiyarqan. Tsaynöpami tsay particho taq amorreo runakunapa markankuna y chakrankunapis noqakunapana kaykan. 22 Tsay partiqa Arnón mayupita Jaboc mayuyaq y tsunyaq jirkapita hasta Jordán mayuyaqmi karqan.†
23 “ ‘Kikin Tayta Diosmi amorreo runakunata qechuskir tsay partita rikatsiyämarqan. ¿Tsaynö kaykaptinku qamkuna qechuyämayta munaykäyanki? 24 Quemos diosnikikuna rikatsiyäshunqaykikunaqa qamkunapämi kanqa. Tsaynöllami Tayta Diosnï qarayämanqankunaqa noqakunapä kanqa.
25 “ ‘Moab nacionpa mandaqnin rey Ziporpa tsurin Balacpita† ¿mas munayyuq kayanqaykitaku yarpaykäyanki? Payqa manami Israel runakunata imaypis atacashqatsu ni wajupashqatsu.
26 “ ‘Kimsa pachak (300) watanami Hesbón markapita Aroer markayaq llapan tsay chakrakuna y markakuna Israel runakunapa kaykan. Tsaypita patsami Arnón mayu ñöpancho kaq markakunapis Israel runakunapana kaykan. Qoriyta munarqa ¿imanirtä kananyaq qoriyashqaykitsu? 27 Tsaynöpis manami noqakunatsu qamkunata wajupäyashqä, sinöqa qamkunami wajupaykäyämanki. Kananqa jueznintsik Tayta Dios juzgamäshun Israel runakunata o amonita runakunata karpis’ ”.
28 Jefté tsaynö willakatsiptinpis amonita runakunapa mandaqnin rey manami cäsurqantsu.
Tayta Diosta Jefté awninqan
29 Tsaymi Tayta Diospa Espïritun shakyätsiptin Jeftéqa Manasés trïbu runakuna täyanqan Galaad partipa aywar runakunata qorir tumamurqan. Galaad particho kaykaq Mizpaman kutiykurmi qorinqan runakunata pushakurkur amonita runakunawan pelyaq aywarqan. 30 Yarqunqan hörami Tayta Diosta awnir Jefté nirqan: “Amonita runakunata vinciyänäpä yanapamaptikiqa 31 wayïman kutiptï chaskimänanpä punta yarqamuq kaqmi qampä rupatsina sacrificiu kanqa”.
32 Tsaypitanami amonita runakuna täyanqan partiman chaykuptin Jeftéta Tayta Dios yanaparqan paykunata vinciyänanpä. 33 Aroer markapita Minitman y tsaypita Abel-queramimman chanqanyaqmi amonita runakunapa ishkay chunka (20) markankunata ushakätsiyarqan. Tsaynöpami tsaytsika amonita runakunata Israel runakuna vinciyarqan.
34 Mizpaman kutir wayinman Jefté chaykaptinmi jukllaylla warmi tsurin panderëtata tukar tushuraykar tariparqan. Jeftépa mas tsurinkuna manami karqantsu ollqupis ni warmipis. 35 Tsaymi tsurinta rikaskir Jefté pasaypa llakikur latsapantapis rachirnin nirqan: “¡Ay hïja! ¡Kananqa pasaypa llakikuymanmi churaykamashqayki! ¿Imapärä yarqaykämurqaykipis? Tayta Diosta awninqätaqa imanöpapis cumplishämi”.†
36 Tsaynö niptinmi tsurin nirqan: “Amonita runakunata vinciyänaykipä yanapaykäshuptikiqa Tayta Diosta awninqaykita imanöpapis cumpliy, papä. 37 Itsanqa rugakulläshayki. Manarä piwanpis kar wanukunäpä kaykaptinqa ishkay killa yanasäkunawan jallqakunapa waqar purimunäpä kachaykallämay”.
38 Tsaynö rugakuptinmi Jefté awnirqan. Tsaymi yanasankunawan ishkay killa jallqakunapa waqar purirqan. Tsaynö waqar purirqan piwanpis manarä kar wanunanpä kaptinmi. 39 Ishkay killa cumplirkur taytan kaqman kutiykuptinmi Tayta Diosta awninqannölla Jefté cumplirqan. Tsaynöpami Jeftépa tsurin piwanpis manarä kar wanukurqan. 40 Tsaynö kanqanpitami Israel jipashkuna cada watacho chusku junaqyaq Jeftépa tsurinpä waqar puriyan.