Galaadcho taq runakunawan Efraín trïbu runakuna pelyayanqan
12
Amonita runakunata Jefté vinciskiptinmi Efraín trïbu runakuna Jordán mayuta tsimpar Zafón markaman chaykur Jeftéta niyarqan: “Amonita runakunawan pelyaq aywaykarqa ¿imanirtä yanapayänäpä willayämashqaykitsu? ¡Tsaynö kanqaykipitami wayikinintinta rupatsiyäshayki!”2 Tsaynö niyaptinmi Jefté nirqan: “Amonita runakunawan pasaypa rimanakurnin willakatsimuptïpis manami yanapamaq shäyämushqaykitsu. 3 Tsaymi wanuytapis mana mantsaypa kikilläkunana amonita runakunawan pelyaq aywayashqä. Tsay guërracho Tayta Dios yanapayämaptinmi paykunata vinciyashqä. Qayaykätsiptïpis mana shamuykarqa ¿imanirtä atacayämaq shäyämushqayki?”
4 Tsaynö niptinmi Efraín trïbu runakuna niyarqan: “Efraín trïbupita y Manasés trïbupita mana väliqnin kaqkunallami kayanki”.
Tsaynö nir manakaqman churayaptinmi Jeftéqa Galaad runakunata qoriykur Efraín trïbu runakunawan pelyar vinciyarqan.
5 Nirkurnami Jordán vädukunaman aywaykur Efraín trïbu runakunata tsapäyarqan. Tsaymi vädupa päsayta munar pipis chaptinqa tapuyarqan: “¿Efraín trïbupitaku kanki?”
“Manami” niptinqa: 6 “Mä, ‘shibolet’ niy” niyarqan. Tsaynö niyarqan Efraín trïbu runakuna parlayta mana kamäpakur “shibolet” niyänanpa trokin “sibolet” niyanqanta musyarmi. Tsaymi pipis “sibolet” niptinqa juklla wanutsiyaq. Tsay pelyachömi chusku chunka ishkay waranqa (42,000) Efraín trïbu runakunata wanutsiyarqan.
7 Soqta watami Israel runakunapa jueznin Jefté karqan. Wanuskiptinnami Galaad markanman pampayarqan.
Israel runakunapa jueznin Ibzán kanqan
8 Jefté wanuskiptinnami Belén markapita Ibzánna Israel runakunapa jueznin karqan. 9 Paypa tsurinkunami karqan kimsa chunka (30) ollqu y kimsa chunka (30) warmi. Llapan tsurinkunatapis tätsirqan juklä runakunawanmi. Qanchis watami Ibzánqa Israel runakunapa jueznin karqan. 10 Ibzán wanuskiptinmi Belénman pampayarqan.
Israel runakunapa jueznin Elón kanqan
11 Tsaypitanami Israel runakunapa jueznin karqan Zabulón trïbupita Elón. Payqa chunka watami Israel runakunapa jueznin karqan. 12 Elón wanuskiptinmi unay trïbunkuna täyanqan Ajalón markaman pampayarqan.
Israel runakunapa jueznin Abdón kanqan
13 Tsaypitanami Israel runakunapa jueznin karqan Abdón. Payqa karqan Piratóncho taq Hilelpa tsurinmi. 14 Puwaq watami Abdónqa Israel runakunapa jueznin karqan. Paypa ollqu tsurinkunami karqan chusku chunka (40). Willkankunapis karqan kimsa chunka (30). Tsurinkunapis willkankunapis ashnun muntashqallami puriyaq. 15 Abdón wanuskiptinmi Piratónman pampayarqan. Tsayqa karqan Efraín jallqakunachömi. Ñöpataqa amalecita runakunami tsaycho täyarqan.