Israel runakunapa jueznin Tola kanqan
10
Abimelec wanuskiptinnami Tola jutiyuq runa Israel runakunata contrankunapita salvarqan. Tolaqa Isacar trïbu runami karqan. Payqa Dodupa willkan y Fúapa tsurinmi karqan. Tolaqa tarqan Samir markachömi. Tsay markaqa Efraín jallqakunachömi kaykan. 2 Payqa ishkay chunka kimsa (23) watami Israel runakunapa jueznin karqan. Tola wanuskiptinmi Samir markaman pampayarqan.Israel runakunapa jueznin Jair kanqan
3 Tola wanuskiptinnami Galaadpita Jairna Israel runakunapa jueznin karqan. Pay mandarqan ishkay chunka ishkay (22) watami. 4 Jairpami kimsa chunka (30) ollqu tsurinkuna kayarqan. Tsay tsurinkuna llapanpis ashnun muntashqallami puriyaq. Paykunami Galaad particho kaykaq kimsa chunka markakunapa mandaqnin kayarqan. Tsay markakunatami runakuna kananyaqpis Jairpa markankuna kanqanta niyan. 5 Jair wanuskiptinmi Camón markaman pampayarqan.
Israel runakunata amonita runakuna ñakatsiyanqan
6 Tsaypitanami Israel runakuna yapay Baal diosta y Astarot diösata adorar Tayta Diosta ajanätsiyarqan. Tsaynöpis paykunaqa arameo, sidonio, moabita, amonita y filisteo runakunapa diosninkunata adorarmi Tayta Diosta sirviyarqannatsu. 7 Tsaynö kayaptinmi Tayta Diosqa pasaypa ajanarnin filisteo runakuna y amonita runakuna ñakatsiyänanpä kachariykurqan. 8 Tsaymi Galaad particho taq Israel runakunata chunka puwaq watantin pasaypa ñakatsiyarqan. Galaad partiqa Jordán mayu wak tsimpan amorreo runakuna täyanqanchömi kaykan. 9 Tsaynöllami amonita runakuna Jordán mayuta tsimpaskir Judá trïbu runakunata, Benjamín trïbu runakunata y Efraín trïbu runakunatapis atacayarqan. Tsaymi Israel runakunaqa pasaypa llakikurnin ima ruraytapis mana kamäpakur 10 Tayta Diosta mañakur niyarqan: “Tayta Dios, perdonaykayällämay. Ninqaykita mana cäsukurmi Baal dioskunata adorarnin pasaypa jutsata rurayashqä”.
11 Tsaynö mañakuyaptinmi Tayta Dios nirqan: “Egipto runakuna, amorreo runakuna, amonita runakuna, filisteo runakuna, 12 sidonio runakuna, amalecita runakuna y madianita runakunapis ñakatsiyäshuptikimi mañakayämarqayki. Tsaynö mañakayämaptiki ¿manaku paykunapa munayninpita jipimurqä? 13 Tsaynö jipiykämuptïpis juk dioskunata adorarmi cäsuyämashqaykitsu. Tsaymi kananqa salvayäshaykinatsu. 14 ¡Tsay yärakuyanqayki dioskunatana mañakuyay ñakatsiyäshunqaykipita salvayäshunaykipä!”
15 Tayta Dios tsaynö niptinmi Israel runakuna niyarqan: “Taytay, mana cäsukurmi jutsata rurayashqä. Tsaynö kaptinpis munanqaykinö kaykullätsun. Imanö kaptinpis mañakayämü conträkunapa munayninpita salvaykayämänaykipämi”.
16 Tsaynö nirmi Israel runakunaqa adorayanqan ïdulunkunata ushakaskatsir Tayta Diosllatana adorayarqan. Tsaymi pasaypa ñakayanqanta rikar Tayta Dios kuyaparqan.
17 Tsaypitanami amonita runakuna pelyayänanpä aywar Galaadcho campamentunkunata rurayarqan. Tsaynöllami Israel runakunapis qorikaykur Mizpacho campamentunkunata rurayarqan. 18 Galaad particho taq Israel mayor runakunanami willanakur niyarqan: “Amonita runakunawan pelyanantsikpä mayqantapis mandamaqnintsik kananpä churashun”.