Israel runakunapa jueznin Abimelec kanqan
9
Juk junaqmi Jerobaalpa tsurin Abimelec Siquem markaman aywarqan tiyunkunawan y castankunawan parlaq. Chaykurmi paykunata nirqan: 2 “Musyayanqaykinöpis castaykikunami kaykä. Tsaymi rugakü marka mayintsikkunata qoriskir niyänaykipä: ‘Jerobaalpa qanchis chunka (70) tsurinkuna mandamaqnintsik kayänanpa trokinqa mas allimi kanman Abimeleclla mandamaqnintsik kaptin’ ”.3 Abimelec ninqannöllami marka mayinkunata tiyunkuna niyarqan. Marka mayinkuna kanqanta niyaptinmi llapanpis willanakuyarqan mandaqninkuna kananpä. 4 Tsaynö willanakurmi Baal-beritpa templunpita qanchis chunka (70) qellayta jipiskir Abimelecta entregayarqan. Tsay qellayta wanutsikuq runakunata pägaykurmi Abimelec pusharqan 5 taytan Jerobaal tanqan Ofra markaman. Tsaychömi juk rumi janancho qanchis chunka (70) wawqinkunata wanutsiyarqan. Tapshi kaq wawqin Jotamllami pakakuyninpa salvakurqan.
6 Tsaypitanami Siquem y Bet-milo runakuna Siquemcho kaykaq encina jacha kaqcho sagrädu rumi† kaqman qorikaskir rey kananpä Abimelecta churayarqan.
Gerizim jirkapita Jotam qayakunqan
7 Rey kananpä Abimelecta churayanqanta musyaskirmi Jotam witsarqan Gerizim jirkaman. Nirkurmi jinchi qayakur nirqan: “Siquem runakuna, kanan nimunqäta shumaq wiyayay. ¡Wiyayämaptikiqa capazchi qamkunatapis Tayta Dios wiyayäshunkiman!
8 “Juk kutichöshi llapan jachakuna qorikäyänä mandaqnin reyta churayänanpä. Tsayshi olïvus jachata niyänä: ‘Mandamaqnïkuna rey kanaykitami munayä’.
9 “Tsayshi olïvus jachaqa ninä: ‘Rey kaptïqa Tayta Diosta adorayänanpä y runakunata respitayänanpä ¿maypitarächi aceitipis kanman?’
10 “Mana munaptinshi jachakunaqa hïgustana mandaqnin rey kananpä niyänä. 11 Tsayshi hïgus ninä: ‘Rey kaptïqa ¿maypitarächi mishkiq hïguskunapis kanman?’
12 “Mana munaptinshi jachakunaqa üvatana mandaqnin rey kananpä niyänä. 13 Tsayshi üvapis ninä: ‘Rey kaptïqa ¿maypitarächi Tayta Dioswan runakuna kushikuyänanpä vïnupis kanman?’
14 “Mana munaptinshi jachakunaqa shirakatana mandaqnin rey kananpä niyänä. 15 Tsayshi shirakaqa ninä: ‘Rasunpaypa mandaqniki rey kanäta munarqa rapräkuna rurinman yaykayämuy. Mana yaykayämuptikiqa noqapita nina tsarirmi Líbanucho jatusaq cedrukunatapis rupar ushanqa’ ”.
16 Tsaynö willaskirmi Jotam nirqan: “Kanan shumaq tantiyakuyay. ¿Allitaku rurayashqayki Abimelecta mandashuqnikikuna rey kananpä churar? ¿Qamkunata alli rikayäshunqaykinöllaku taytätawan wawqïkunata rikayashqayki? 17 Madianita runakunapa munayninpita salvayäshunaykipämi wanuytapis mana mantsaypa taytä pelyarqan. 18 Tsaynö salvaykäyäshuptikipis taytäpa contran shärirmi qanchis chunka (70) ollqu tsurinkunata rumi janancho wanutsiyashqayki. Nirkurmi castaykikuna kaptin taytäpa concubïna warminpa wamran Abimelecta mandashuqnikikuna rey kananpä churayashqayki.
19 “Jerobaalta y tsurinkunata allita rurashqa kayaptikiqa qamkunawan Abimelec alli kawatsun y qamkunapis paywan alli kawayay. 20 Llutanta rurashqa kayaptikiqa Abimelecpita nina yarqamur Siquemcho y Bet-milucho taq runakunata ushayäshuy. Tsaynölla Siquempita y Bet-milupita nina tsarirnin Abimelectapis rupar ushatsun”.
21 Tsaynö niskirmi Beer markaman Jotamqa qeshpir aywakurqan. Tsaychömi täkurqan wawqin Abimelec wanutsinanta mantsarirnin.
Siquem runakuna Abimelecpa contran shäriyanqan
22 Kimsa watana Israel runakunapa mandaqnin Abimelec kaykaptinmi 23 Siquem runakunawan chikinakuyänanpä mana alli yarpayta paykunaman Tayta Dios churarqan. 24 Tsaynöpami Abimelecta Tayta Dios castigarqan Jerobaalpa qanchis chunka (70) ollqu tsurinkunata wanutsinqanpita. Siquem runakunatapis tsaynöpami castigarqan wawqinkunata wanutsinanpä Abimelecta yanapayanqanpita. 25 Tsaymi Siquem runakunaqa jallqakunaman runakunata churayarqan tsaypa päsaqkunata asaltayänanpä. Tsaynö rurayanqantami Abimelecta willayarqan.
26 Juk junaqmi Ebedpa tsurin Gaal wawqinkunawan chäyarqan Siquem markaman. Tsaycho taptinmi tsaycho runakuna amistäta paykunawan rurayarqan. 27 Tsaypitanami chakraman aywarkur üvata qoriskamur vïnuta rurayarqan. Nirkurnami diosninkunapa templuncho mikur upur fiestata rurarnin Abimelecpä rimayarqan. 28 Tsaymi Ebedpa tsurin Gaal nirqan: “¿Pitä Abimelecqa alläpa payta cäsunantsikpä? Siquem runakuna kaykarqa ¿imanirtä paypa munaynincho kaykantsik? Abimelecqa ¿manaku Jerobaalpa tsurillan kaykan? Markantsikta mandaq Zebulpis ¿manaku paypa yanapaqllan kaykan? Abimelecta sirvinantsikpa trokinqa Siquempa taytan Hamor casta runakunallata sirvishun.a 29 ¡Qamkunapa mandaqnikikuna karqa maynami Abimelecta ushakäratsïman karqan! Tsaynöpis maynami payta nïman karqan: ‘Soldäduykikunata qoriskir noqakunawan pelyanantsikpä shayämuy’ ”.
30 Ebedpa tsurin Gaal tsaynö ninqanta wiyaykurmi Siquem markapa mandaqnin Zebul pasaypa ajanarqan. 31 Tsaymi pakayllapa willakuqkunata kacharqan Abimelecta willar niyänanpä: “Ebedpa tsurin Gaalmi wawqinkunawan chaykamur runakunata willapaykäyan contrayki shäriyänanpä. 32 Imapis manarä kanqanyaq soldäduykikunawan paqaspa shamur marka waqtankunaman pakakuyay. 33 Nirkur patsa waraskiptin tsay markata atacayay. Gaal y paywan kaykaq runakuna pelyayänanpä yarqayämuptin llapanta ushakätsiyay”.
34 Tsaymi Abimelec tsay paqas chusku grüpu soldädunkunawan aywaykur Siquem marka ñöpankunaman churanakuyarqan. 35 Ebedpa tsurin Gaal marka punkucho ichiraykanqan hörami soldädunkunawan Abimelec pakaraykäyanqanpita yarqur qallaykuyarqan. 36 Tsayta rikaykurmi Zebulta Gaal nirqan: “¡Rikay jirkakunapita runakuna uraykäyämuqta!”
Tsaynö niptinmi Zebul nirqan: “Jirkakunacho llantuykunatachi runakunatanö rikapakuykanki”.
37 Tsaynö niptinpis Gaalqa yapaymi nirqan: “Patsapa Pupun niyanqan jirkanpitapis soldädukuna shamuykäyanmi. Adivinaqkunapa Encinan niyanqan jachaman aywaq nänipanami juk grüpu soldädukunapis shamuykäyan”.
38 Tsaymi Zebul nirqan: “¡Kananmi rikashayki, baduläqui! ‘Pitä kantsik Abimelecta cäsunantsikpäqa’ ¿manaku nirqayki? Manakaqman churanqayki runakunami yaykaykäyämun. ¡Kanan mä, runa karqa paykunawan pelyaq ayway!”
39 Tsaymi Siquem runakunawan Gaal aywayarqan Abimelecwan pelyayänanpä. 40 Abimelec vinciptinmi Gaal y paywan kaykaq runakuna qeshpir markaman kutiyarqan. Tsaynö kaptinpis marka punkuman chäyanqanyaqqa atskaqtami wanutsiyarqan. 41 Nirkurmi Abimelec Aruma markaman kutikurqan. Zebulnami Gaalta wawqinkunatawan Siquempita qarqurqan.
42 Waraynin junaqnami Abimelec musyarqan Siquem runakuna chakrankunaman yarquyanqanta. 43 Tsayta musyaskirmi yanapaqnin runakunawan kimsa grüpuman rakinakuskir Siquemman aywayarqan. Nirkurmi marka yaykunaman churanakuykur runakuna yarqamuqta illaqpita atacayarqan. 44 Markaman kutir mana qeshpiyänanpämi Abimelecqa tröpancho kaykaq runakunawan marka yaykuna punkuman llallipäyarqan. Ishkay kaq grüpu runakunanami chakrakunacho kaykaq runakunata wanutsiyarqan. 45 Tsay junaqqa qoyatmi Siquem runakunawan Abimelec pelyayarqan. Vinciskirmi tsay markacho kaykaq runakunata wanuskatsir wayinkunatapis juchuskatsir kachita mashtayarqan.
46 Abimelec tsaynö ruranqanta musyaskirmi Siquem törricho taq runakuna El-berit templuman amparakuyarqan. Tsay templuqa alli sigurashqami karqan. 47 Tsayman amparakushqa kaykäyanqanta musyaskirmi 48 paywan kaykaq runakunata pushakurkur Salmón jirkanman Abimelec aywarqan. Nirkur fïlu jächawan jachapa llimllanta mutuskirmi umrukurkur wakin runakunatapis nirqan: “¡Llimllakunata mutuskir llapayki noqanö umrukuyay!”
49 Tsaynö niptinmi llimllata juknin juknin mutuskir Abimelecpa qepanpa aywar templuta rupatsiyarqan. Tsaynö rupatsirmi törricho kaq runakunata warmita ollqutapis juk waranqatanö (1,000) wanutsiyarqan.
50 Tsaypitanami Tebes markaman aywaykur Abimelec y paywan kaykaq runakuna jiruruypa churanakuyarqan. Atacarmi tsay markaman yaykuyarqan. 51 Marka chawpinchömi alli sigurashqa jatun törri karqan. Abimelec y paywan kaykaq runakuna markaman yaykuyaptinmi tsay markacho taq runakuna warmipis ollqupis törriman yaykuskir ruripita punkuta jinchi trancayarqan. Nirkurmi törri jananman llapan yarkuyarqan. 52 Tsaymi Abimelecqa törrita rupatsiyta munar ninata tsaritsinanpä kaykaptin 53 törri jananpita tuñayta juk warmi kachapaykamurqan Abimelecpa umanpis pakiqpä.
54 Tsaymi armanta puritsir yanapaqnin runata tsay höra qayaskir Abimelec nirqan: “ ‘Juk warmillami wanutsishqa’ nir runakuna mana parlayänanpä espädaykiwan juklla tuksiramay”.
Tsaynö niptinmi espädanwan wanuqpä yanapaqnin tuksiskirqan. 55 Abimelec wanushqa jitaraykaqta rikaykurmi Israel runakuna wayinkunapana kutikuyarqan.