2 Tsaynö niyaptinmi Gedeón nirqan: “Mana qayatsiptïpis madianita runakunapa mandaqnin reykunata wanutsir noqapita mas allitami rurayashqayki. Wallkallata rurayanqaykita yarparpis noqakunapita masmi rurayashqayki. 3 Madianita runakunapa mandaqninkuna rey Orebta y rey Zeebta wanutsiyänaykipäqa Tayta Diosmi makikikunaman churamushqa. Paykunata wanutsirqa noqakunapita masmi rurayashqayki”.

Gedeón tsaynö niptinmi Efraín trïbu runakuna ajanaykachaykäyanqanpita kushikuyarqan.

4 Tsaypitanami pasaypa pishipashqa kaykarpis pelyaman aywashiq kimsa pachak (300) runakunawan Jordán mayuta Gedeón tsimpayarqan madianita runakunata qatiparnin. 5 Sucotman chaykurmi tsaycho taq runakunata Gedeón rugar nirqan: “Madianita runakunapa mandaqninkuna rey Zebata y rey Zalmunata qatiparmi aywaykäyä. Yanapamaq runakuna pasaypa pishipashqami kaykäyan. Kallpankuna yurinanpä pachankuna qarapaykayällamay”.

6 Tsaynö nir rugakuptinmi Sucot markacho taq mayor runakuna niyarqan: “Pachaykikunata qarayänäpaqa ¿maynaku Zebatawan Zalmunata prësu tsararaykäyanki imami?”

7 Tsaynö niyaptinmi Gedeón nirqan: “Zebata y Zalmunata prësu tsariyämunäpä Tayta Dios makïman churamuptinqa kutiykamurmi qaraykikunatapis kashakunawan rachitsishä”.

8 Tsaypita päsar Penielman charpis Sucotcho mañakunqannöllami Gedeón mañakurqan. Peniel runakunapis Sucot runakuna niyanqannöllami niyarqan. 9 Tsaymi ajanarnin Peniel runakunata Gedeón nirqan: “Llapanta vinciskirmi kutiykamur kay törrikikunata juchutsir ushashä”.

10 Tsayyaqmi rupay yarqamunan kaqläpita shamuq soldädunkunawan Zebawan Zalmuna Carcorman chäyarqan. Gedeónpa yanapaqnin runakuna juk pachak ishkay chunka waranqata (120,000) wanutsiyashqa kaptinmi chunka pitsqa waranqa (15,000) soldädunkunallawanna kayarqan. 11 Gedeónnami yanapaqnin runakunawan tsunyaq jirkaman aywaq nänipa qatipar madianita runakunata illaqpita atacayarqan. Tsay näniqa Nobapa y Jogbehaläpami päsarqan. Tsayläqa rupay yarqamunan kaqpami karqan. 12 Atacayaptinmi Zebawan Zalmuna qeshpiykäyaptin Gedeón taripaykur prësu tsarirqan. Ishkan reykunata prësu tsariptinmi soldädunkunapis mantsakar maytsaypa qeshpir aywakuyarqan.

13 Gedeónqa pelyanqanpita kutir Heresta päsaykanqanchömi 14 Sucotcho taq chöluta prësu tsariykur tapurqan tsaycho taq mayor runakunapa jutinkunata. Tsaymi qanchis chunka qanchis (77) mayor runakunapa jutinkunata qellqaskir chölu entregarqan. 15 Tsaymi Sucotman chaykur runakunata Gedeón nirqan: “Zebata y Zalmunata qatipäyaptï manakaqman churayämarmi niyämarqayki: ‘Zebata y Zalmunata manarä wanutsiyaptikiqa pachaykikunatapis manami qarayäshaykitsu’. Kanan rikayay Zebata y Zalmunata prësu apaykäyanqäta”.

16 Tsaynö nirmi Gedeónqa Sucotcho taq mayor runakunata kashawan y shirakawan rachitsir usharqan. 17 Tsaypita päsar Penielman chaykurnami törrinta juchuskatsir tsay markacho taq runakunata wanutsirqan.

18 Nirkurmi Zebata y Zalmunata Gedeón tapurqan: “Taborcho wanutsiyanqayki runakuna ¿pï runanötä kayarqan?” nir.

Tsaymi niyarqan: “Qam niraqllami llapanpis kayarqan. Cada ünunmi reypa tsurinkunanölla kayarqan”.

19 Tsaynö niyaptinmi Gedeón jinchi nirqan: “¡Paykunaqa wawqïkunachä kayashqa! Mamäpa wamrankunatachä wanutsiyashqayki. Kananmi itsanqa kikikikunatapis wanutsiyäshayki. ¡Por Dios! Wawqïkunata mana wanutsiyashqa kayaptikiqa manami wanutsïmantsu karqan”.

20 Tsaynö nirmi mayor tsurin Jeterta nirqan: “Kay runakunata juklla wanutsiy”.

Tsaynö niptinmi wamrallarä kar wanutsiyta valurarqantsu.

21 Tsaymi Gedeónta Zebawan Zalmuna niyarqan: “Pasaypa puëdiq karqa mä kikiki wanutsiyämay”.

Tsaynö niyaptinmi Gedeónqa Zebatawan Zalmunata wanuskatsir camëllunkunapa kuyayllapä wallqankunata apakurqan.

22 Tsaypitanami Israel runakuna Gedeónta niyarqan: “Madianita runakunapa munayninpitami salvayämashqayki. Kananqa mandayämaqnï rey kaykullay. Qam wanuptiki tsurikipis reymi kanqa y tsuriki wanuptinnami willkaykipis rey kanqa”.

23 Tsaynö niyaptinmi Gedeón nirqan: “Noqapis ni tsurïkunapis manami mandaqnikikuna rey kayämantsu. Mandamaqnintsik reyqa Tayta Diosmi kaykan. 24 Itsanqa rugakuyäshayki guërracho qoriyämunqaykipita jukniki juknikikuna juk sortïjaykikunata qarayämänaykipä”.

Tsaynö mañakurqan Ismael runakuna qori sortïjata jatiräyaptinmi.^a

25 Tsaynö niptinmi Israel runakuna “allichi kanqa, taytay” nir jakuta mashtaykur cada ünun juk sortïjata churayarqan. 26 Tsay chaskinqan qori sortïjakunata pësaptinmi chunka isqun kïlunö karqan. Tsay jananmanmi Gedeón qorirqan wallqakunata, alhäjakunata, reykuna jatiräyanqan granäti latsapakunatawan camëllukunapa kunkancho adornukunatapis. 27 Tsay qorikunapita juk efodta ruraskirmi markan Oframan Gedeón churarqan. Tsaymi Israel runakunaqa Tayta Diosta mana cäsukur tsay efodtana adorayarqan. Tsay efodqa imayka trampanömi karqan Gedeónpä y castankunapäpis.

28 Madianita runakunata tsaynö vinciyaptinmi Israel runakunata achäquita ashipäyarqannatsu. Gedeón kawanqanyaqqa chusku chunka (40) watami Israel runakuna añaw kawakuyarqan.

29 Tsaypitanami Joáspa tsurin Jerobaal niyanqan Gedeónqa wayinpa kutikurqan. 30 Warminkuna atska kaptinmi ollqu tsurinkunapis qanchis chunka (70) kayarqan. 31 Siquemcho concubïna warminpis Gedeónpa tsurinta qeshyakuskiptinmi jutitsirqan Abimelec jutin kananpä. 32 Gedeónqa pasaypa awkinyanqanyaqmi kawarqan. Wanuskiptinmi taytan Joás pamparanqan kaqllaman pampayarqan. Tsayqa Abiezer casta täyanqan Ofra markachömi karqan.

33 Gedeón wanuskiptinnami Israel runakuna yapay Baal dioskunata adorar Baal-berit ïdulutana akrayarqan diosnin kananpä. 34 Llapan contrankunapita Tayta Dios salvaykaptinpis paytaqa qonqaskiyarqanmi. 35 Tsaynöllami Jerobaal niyanqan Gedeón tsayjinanpa yanapashqa kaykaptinpis paypa tsurinkunata Israel runakuna cäsuyarqantsu.