Déborawan Barac cantayanqan
5
Tsay vinciyanqan junaqmi Déborawan Abinoampa tsurin Barac cantayarqan:2 “Contrantsikkunawan pelyayänanpämi Israel nacioncho mandaq runakuna aywayarqan.
Wakin runakunapis llapan voluntäninwanmi guërraman aywayarqan.
Tsaynö kayanqanpita Tayta Diosta alabashun.
3 Reykuna, wiyayämay.
Markacho mandaqkunapis, wiyayämay.
Israel runakunata kuyaq Tayta Diospämi cantayäshä.
Salmukunawanmi alabayäshä.
4 “Tayta Dios, Seirpita yarqamur Edom nación chakrakunapa puriptikimi entëru patsa tsuktsukyarqan.
Ciëlucho kaqkunapis pasaypami kuyurqan.
Pukutaypitapis tamyamurqanmi.
5 Israel runakuna respitayanqan Tayta Diospa ñöpanchöqa jallqakunapis tsuktsukyäyarqanmi.
Sinaí jirkapis kuyurqanmi.†
6 “Anatpa tsurin Samgar† kanqan witsanpis, Jael kanqan witsanpis mantsarirninmi pipis jatun nänipa purirqannatsu.
Jatun nänipa puriyänanpa trokinqa chaki nänillapanami puriyarqan.
7 Mantsarirmi jallqakunachöpis runakuna täyarqannatsu.
Tsaynö kaptinmi noqa Débora Israel runakunapa mamannöpis janankuna shärirqä.
8 “Israel runakuna juk dioskunatana adorayaptinmi guërrapis janankunachöna karqan.
Chusku chunka waranqa (40,000) karpis escüdutawan espädata aptaytapis manami valurayarqantsu.
9 “Tsaynö kaptinpis kananqa Israel runakunawan mandaqninkuna llapan voluntäninkunawanmi guërraman aywayashqa.
Tsaynö kayanqanpita Tayta Diosta alabaykulläshun.
10 Fïnu ashnu muntashqa imaykayuqkunapis, silla janancho aywaqkunapis, llapaykikuna cantayay.
Chakillapa puriqkunapis, Diosta alabayay.
11 Pukyukunaman chaykur tsaycho runakuna Diosta alabaykäyaqta wiyayay.a
Paykunami contrantsikkunata Tayta Dios vincinqanpita cantaykäyan.
Paytami alabaykäyan pelyashqa yanapamanqantsikpita.
Tsaymi Tayta Dios kuyanqan runakuna mana mantsariypa markankunaman kutiyarqan.
12 “¡Kushikuy, Débora!
¡Pasaypa kushikur cantay!
Abinoampa tsurin Barac, ¡kushikuy!
¡Prësu tsarinqaykikunata apay!
13 “Tabor jirkapitami mandaqnin runakunawan Israel runakuna uräyarqan.
Pelyayta yachaq runakunawanmi Tayta Diosman yärakuq runakuna pelyayarqan.
14 Amalecita runakuna ñöpata täyanqan kaqpitami Efraín trïbu runakuna guërraman aywayarqan.
Paykunapa qepantami Benjamín trïbu runakuna aywayarqan.
Tsaymanmi Maquirpita mandaqkunapis aywayarqan.
Zabulón trïbu autoridäkunapis tsaymanmi aywayarqan.
15 Isacar trïbucho mandaqkunapis Déborawanmi aywayarqan.
Paykunami Baracpa qepanta raqra kuchun pampaman aywayarqan.
“Rubén trïbu runakunaqa shimillanmi kayarqan.
16 Guërraman aywayänanpa trokinmi üshankunata mitsikur quëdakuyarqan.
Rubén trïbu runakunaqa rikayllanmi kayarqan.
17 “Galaad particho taq runakunaqa Jordán mayu tsimpanchömi quëdakuyarqan.
Dan trïbu runakunaqa büquikuna ichiranqanchömi quëdakuyarqan.
Aser trïbu runakunapis lamar kuchuncho büquinkunata cuidarmi quëdakuyarqan.
18 Zabulón trïbu runakuna y Neftalí trïbu runakunami itsanqa wanuytapis mana mantsariypa jallqakunachöpis, pampakunachöpis pelyayarqan.
19 “Cananeo runakunapa mandaqnin reykunami Israel runakunata atacayänanpä Taanacman shäyämurqan.
Meguiducho kaykaq pukyukuna ñöpanchömi atacayarqan.
Mana vincirmi qellayta ni ima riquëzatapis apakuyarqantsu.
20 Qoyllurkunapis Sísarapa contranmi ciëlupita pelyayämurqan.
21 Cisón raqrapa bunyaypa bunyar yaku aywarmi contrantsikkunata apakurqan.
Tsayta rikaykarqa mana qelanaypa ni mana mantsariypa yapaypis pelyashun.
22 “Sísarapa cawallunkunaqa patatarrämi guërraman aywayarqan.
Patatarrä cörriyanqanpis wiyakämurqanmi.
23 Tayta Diospa angelninnami willakur nirqan:
‘¡Merozcho taqkuna castigashqa kayätsun!
Paykunaqa manami aywayashqatsu Tayta Diospa soldädunkunata yanapayänanpä’.
24 “Ceneo runa Heberpa warmin Jael llapan warmikunapitapis mas respitashqa kaykutsun.
Tolducho taq llapan warmikunapitapis payta Tayta Dios mas yanapaykutsun.
25 Yakuta Sísara mañakuptinmi Jaelqa lichita qararqan.
Kuyayllapä tazonwanmi ritishqa lichita qararqan.
26 Itsuq kaq makinwanmi estäcata aptarqan.
Derëcha kaq makinwanmi martilluta tsarirqan.
Llapan kallpanwan takarninmi sentïdunpa Sísarata uchkurirqan.
Uma tullunta pakiskirmi toqshunpa päsaratsirqan.
27 Sísaraqa Jaelpa ñöpanmanmi ishkirqan.
Qoshparmi patsacho jitararqan.
Patpatshaykanqallanchömi ushakaskirqan.
28 “Sísarapa mamannami llakikurnin ventänapa rikachakuykanqancho nirqan:
‘¿Imanirtä carrëtan chämuntsu?
¿Imanirtä guërra carrëtan jeqarkamunnatsu?’
29 Nirkurnami musyaq yachaq warmikunawan niyarqan:
30 ‘Pelyacho vincirnin imatapis qoriyanqankunatami may rakipänakuykäyan.
Cada soldäduchi juk ishkay jipashkunata wätayninpä aypunakuykäyan.
Sísara qorinqankunachöqa atska color tëlakunami may kaykan.
Bordashqa juk ishkay kuyayllapä päñukunatatsurä soldädukunapa mandaqninkuna wallqakuykäyan’.
31 “Tayta Dios, contrayki kaqkunaqa llapanpis tsaynö ushakätsishqa kayätsun.
Kuyashuqnikikunaqa patsa waraptin rupay shumaq atsikyämunqannö kayätsun”.
Tsaypitaqa chusku chunka (40) watayaq Israel runakuna añawnami kawayarqan.