Israel runakunata Barac y Débora salvayanqan
4
Aod wanuskiptinmi Israel runakuna jutsata rurar Tayta Diosta yapay ajanätsiyarqan. 2 Tsaymi Tayta Diosqa Hazor markacho cananeo runakunapa mandaqnin rey Jabínpa munayninman churaykurqan. Soldädunkunapa capitannin Sísarami Haroset-goim markacho tarqan. 3 Rey Jabínpami karqan fiërrupita rurashqa isqun pachak (900) guërra carrëtankuna. Ishkay chunka (20) wata pasaypa ñakatsiptinmi Israel runakuna Tayta Diosta mañakuyarqan salvananpä.4 Tsay witsanmi Israel runakunapa jueznin kaykarqan Tayta Diospa willakuqnin profetïsa Débora. Paymi Lapidotpa warmin karqan. 5 Israel runakunata arreglananpämi palmëra jacha chakinman Débora jamakuq. Tsay jachatami runakuna niyarqan Déborapa Palma Jachan kanqanta. Tsay jachaqa karqan Efraín jallqakunacho kaykaq Ramáwan Bet-el tinkuqchömi. Tsaymanmi Israel runakuna aywayaq ima demanduntapis Débora arreglananpä.
6 Tsaypita juk junaqnami Débora qayatsirqan Abinoampa tsurin Baracta.† Barac karqan Neftalí trïbu Cedes markacho taq runami. Chaykuptinmi nirqan: “Israel runakunata kuyaq Tayta Diosmi nin Tabor jirkaman aywar Neftalí trïbupita y Zabulón trïbupita chunka waranqa (10,000) runakunata qorinaykipä. 7 Qamkunawan pelyayänanpämi Jabínpa llapan soldädunkunata carrëtankunatawan capitán Sísarata Cisón raqraman Tayta Dios chätsinqa. Paykunata vinciyänaykipämi Tayta Dios yanapayäshunki”.
8 Débora tsaynö willaptinmi Barac nirqan: “Qam wallkimaptikiqa aywanäpä listumi kaykä. Mana wallkimaptikiqa manami aywashätsu”.
9 Tsaymi Débora nirqan: “Tsaynö kaptinqa wallkishayki. Itsanqa manami qamtsu Sísarata wanutsinki, sinöqa juk warmimi Tayta Dios yanapaptin wanutsinqa”.
Nirkurmi Déboraqa Baracwan aywayarqan Cedesman. 10 Cedesman chaykurmi Zabulón y Neftalí trïbu runakunata Barac qayatsirqan. Tsayman chunka waranqa (10,000) runakuna qorikaptinmi paykunawan Tabor jirkaman witsäyarqan. Paykunawanmi Déborapis aywarqan.
11 Cedes marka cercanchömi Heber jutiyuq runa tarqan. Payqa karqan Moiséspa suegrun Hobab casta ceneo runami. Heberqa castankunapita rakikarmi Zaanaimcho kaykaq encina jacha chakincho toldunkunata shäriskatsir täkurqan.
12 Abinoampa tsurin Barac soldädunkunawan Tabor jirkaman witsanqanta Sísarata willayaptinmi 13 fiërrupita rurashqa isqun pachak (900) carrëtankunata y llapan soldädunkunata Sísara qoriykur Haroset-goimpita Cisón raqraman aywayarqan. 14 Tsaymi Baracta Débora nirqan: “Kanan junaqmi qampa makikiman Sísarata Tayta Dios churamunqa. Paymi ñöpaykikunata aywar yanapayäshunki”.
Tsaynö niptinmi pelyayänanpä Tabor jirkapita Barac urämurqan chunka waranqa (10,000) soldädunkunawan. 15 Pelyaptinmi Tayta Dios pasaypa mantsakätsirqan Sísarata, carrëta manijaq soldädunkunata y wakin soldädunkunatapis. Tsaymi Sísarapis carrëtanta kachariykur chakillapa qeshpir aywakurqan. 16 Tsay junaqmi Baracqa Sísarapa soldädunkunata y carrëta manijaqninkunatapis espädawan llapanta wanutsiyarqan hasta Haroset-goimyaq.
17 Tsay witsanmi Hazorpa mandaqnin rey Jabínqa alli rikanakuyarqan ceneo casta Heberwan. Tsaymi Sísaraqa chakillapa qeshpir Heberpa toldun kaykanqanman charqan. Tsaychöqa Heberpa warmin Jaelmi kaykarqan. 18 Tsayman chaykuptinmi Jaelqa nirqan: “Taytay, päsakallämuy. Ama mantsariytsu”.
Toldu rurinman Sísara yaykuskiptinnami Jaelqa jakuwan tsapaykurqan. 19 Tsaynami Sísara nirqan: “Pasaypa yakunaypitami wanuykäna. Yakuta qaraykallämay, mamïta”.
Tsaynö niptinmi Jaelqa odripitaa lichita talliskir qararqan. Nirkurmi Sísarata yapay tsapaykurqan. 20 Tsaynami Sísara nirqan: “Qamqa toldu punkullacho rikachakuykay. Pipis shamur tapushuptikiqa: ‘Manami pipis kaycho kantsu’ ninki”.
21 Sísaraqa pasaypa pishipashqa karmi wanuyparä punukaskirqan. Tsaymi Jaelqa fïlu estäcatawan martilluta aptarkur upällalla yaykuskir Sísarata sentïdunpa estäcawan clävaskirqan patsaman päsanqanyaq. Tsaynömi Sísara wanurqan.
22 Sísarata qatipar Jaelpa toldunman Barac chaykuptinmi Jaelqa nirqan: “Shamuy, taytay. Kanan rikatsishayki qatipaykämunqayki runata”.
Barac yaykuskirmi Sísarata rikarqan umanpa estäcawan clävashqa patsacho wanushqa jitaraykaqta.