Canaánpita mana qarquyanqan runakuna
3
Kaychömi qellqaraykan mayqan marka runakunatapis Canaáncho Tayta Dios mana ushakätsinqankuna. Tsay runakunami quëdayarqan qepa yuriq Israel runakunata jutsa rurayman inkitayaptin Tayta Dios pruebananpä. 2 Tsaynöllami tsay runakunata Tayta Dios ushakätsirqantsu qepa yuriq Israel runakuna pelyayta yachakuyänanpä. 3 Tsay runakunami kayarqan filisteo runakunapa pitsqa mandaqninkuna, cananeo runakuna, sidonio runakuna y Líbano jallqakunacho taq heveo runakunapis. Tsay heveo runakunaqa täyarqan Baal-hermón jallqapita hasta Hamatyaqmi.†4 Tsay runakunataqa Tayta Dios manami ushakätsirqantsu Israel runakunata jutsa rurayman inkitar ishkitsiyänanpä. Tsaynöpami musyayta munarqan unay castankunata Moisés yachatsinqan leykunata cäsukuyänanpä o mana cäsukuyänanpä kanqantapis. 5 Tsaynöpami Israel runakuna juntu täyarqan cananeo, heteo, amorreo, ferezeo, heveo y jebuseo runakunawan. 6 Tsay runakunapa tsurinkunawanmi warmi tsurinkunata y ollqu tsurinkunata tätsiyarqan. Paykunawan tarnami diosninkunata adorayarqan.
Israel runakunata Otoniel salvanqan
7 Tayta Diosta mana cäsukurmi Baal dioskunata y Asera diösapä jawiyanqan raku qerukunata adorar Israel runakuna Tayta Diosta pasaypa ajanätsiyarqan. 8 Tsaymi Mesopotamia nacionpa mandaqnin rey Cusan-risataimpa munaynincho kayänanpä Israel runakunata Tayta Dios kacharirqan. Tsaynöpami Israel runakuna puwaq wata payta sirviyarqan. 9 Tsaymi Tayta Diosta mañakuptin paykunata salvananpä Calebpa sobrinun Otonielta Tayta Dios alli yanaparqan. Otonielpa taytan Cenazqa Calebpa tapshi wawqinmi karqan.† 10 Tayta Diospa Espïritun Otonielta yanapaptinmi Israel runakuna churayarqan juezninkuna kananpä. Tsaymi runakunata pushakurkur pelyayänanpä aywaptin Cusan-risataimta vinciyänanpä Tayta Dios yanaparqan. 11 Tsaypitaqa Otoniel wanunqanyaqmi chusku chunka (40) wata Israel runakuna añaw kawayarqan.
Israel runakunata Aod salvanqan
12 Israel runakuna Tayta Diosta mana cäsukur yapay ajanätsiyaptinmi Moab nacionpa mandaqnin rey Eglónta Tayta Dios yanaparqan munaynincho tsararänanpä. 13 Tsaymi amonita y amalecita runakunawan Israel runakunata vinciykur Palmëra Markataa qechuyarqan. 14 Tsay junaqpitami Israel runakuna Eglónta chunka puwaq wata sirviyarqan.
15 Tsaymi Tayta Diosta mañakuyaptin Gerapa tsurin Aodtab Tayta Dios yanaparqan Israel runakunata salvananpä. Aodqa itsuq makinwan imatapis ruraqmi karqan. Tsaynöpis Benjamín trïbu runami karqan. Paywanmi Israel runakunaqa impuestu qorinqanta rey Eglónman apatsiyarqan.
16 Impuestuta manarä aparmi Aodqa mediu metru largutanö ishkanläpa afilashqa espädata rurarqan. Nirkurmi latsapan rurinpa derëcha kaq tseqllanman jatirkurqan. 17 Nirkurnami impuestu qoriyanqanta apar rey Eglónman chätsirqan. Eglónqa pasaypa wera runami karqan. 18 Apanqanta entregaskirmi Aodqa wallkiqninkunawan kutikuyarqan. 19 Kutikuykäyanqanchömi Gilgalcho kaykaq rumipita rurashqa ïdulukunaman chaykur rey Eglónman Aod yapay kutirqan. Chaykurnami nirqan: “Taytay, pakayllapa willaykushayki”.
Ninqanta wiyananpämi rey Eglónqa yanapaqninkunata nirqan waqtaman upällalla yarquyänanpä. 20 Yarquriyaptinnami jamaräkunan cuartuncho Aodwan rey Eglón ishkallanna kaykäyarqan. Tsaymi rey Eglónpa ñöpanman witiykur Aod nirqan: “Taytay, Tayta Dios nimanqanta willashayki”.
Niptinmi jamaranqan trönunpita Eglón shärirqan. 21 Niykurnami derëcha kaq tseqllanpita itsuq kaq makinwan espädanta jipiskir Aodqa Eglónta pachanpa tuksiskirqan. 22 Eglón pasaypa wera kaptinmi espädaqa maki tsarikunantin yaykuskirqan. Tsaymi jipiyta mana kamäpakur kachaykuptin rakchanpis yarqaskamurqan. 23 Nirkurnami Aodqa punkuta lläviskir ventänapa qeshpirqan.
24 Aod aywaskiptinnami rey Eglónpa yanapaqninkuna kutir punku wichqaraykaqta tariyarqan. Tsayta rikarmi yarpäyarqan ruricho ishpakuykanqanta. 25 Rey Eglón mana yarqamuptinmi unay rätu shuyaraykäyanqancho lläviwan kichaskirnin tariyarqan patsacho wanushqa jitaraykaqta.
26 Rey Eglónpa yanapaqninkuna shuyaräyanqanyaqmi Aodqa Gilgalcho kaykaq ïdulukuna ñöpanpa päsaskir Seiratläman aywar pakakurqan. 27 Tsaypita aywar Efraín jallqakunaman chaykurmi cornëtata tukarqan Israel runakuna tsayman qorikäyänanpä. Qorikaskiyaptinnami llapanpa puntanta Jordán mayuman Aod urarqan.
28 Manarä urarmi nirqan: “Kananmi contrantsik moabita runakunata vincinantsikpä Tayta Dios yanapamäshun”.
Tsaymi Jordán mayu väduman aywaykur pipis päsananta munayarqannatsu. 29 Moabita runakuna pelyayänanpä shamuptinnami chunka waranqanö (10,000) alli pelyaq soldädukunata wanutsiyarqan. Manami jukllayllapis kawaykar quëdayarqantsu. 30 Tsaynömi Israel runakunaqa moabita runakunata vinciyarqan. Tsaypitaqa puwaq chunka (80) watami Israel runakuna añaw kawakuyarqan.
Israel runakunata Samgar salvanqan
31 Aod wanuskiptinnami Anatpa tsurin Samgarna Israel runakunata contrankunapita salvarqan. Paymi yuntata qatikuna püyallawan soqta pachak (600) filisteo runakunata wanutsirqan.