Gedeónta Tayta Dios qayanqan
6
Israel runakunaqa yapaymi Tayta Diosta mana cäsukur juk dioskunata adorar qallaykuyarqan. Tsaymi paykunata madianita runakunapa munayninman Tayta Dios kachaykurqan qanchis wata ñakatsiyänanpä. 2 Madianita runakuna pasaypa ñakatsiyaptinmi Israel runakuna mantsarirnin pakakuyänankunata rurayarqan qaqakunacho, machaykunacho y pipis mana yaykunankunacho.3 Cada watami cosëcha witsan madianita runakuna, amalecita runakuna y rupay yarqamunan kaqlächo taq wakin runakunapis Israel runakunata atacayaq. 4 Tsaynöllami Israel runakunapa chakrankunacho campamentunkunata rurakuykur chakracho wayunqankunata hasta Gaza partiyaq ushayaq. Israel runakuna mikuyänanpä manami ima mikuytapis jaqipäyaqtsu. Tsaynöllami üshankunatapis cabrankunatapis wäkankunatapis ashnunkunatapis apakuyaq. 5 Tsay runakunaqa toldunkunata apakurkurmi uywankunawan maypapis aywayaq. Yupayta mana atipaypä camëllunkunawan aywarmi chakrakunacho mikuykunatapis tsaytsika chukllushkunanörä ushayaq. 6 Madianita runakuna tsaynö rurayaptinmi Israel runakuna pasaypa muchuycho kayarqan. Tsaynö ñakarmi Tayta Diosta mañakuyarqan salvananpä.
7 Madianita runakunapita salvananpä mañakuyaptinmi 8 willakuqnin profëtata Tayta Dios kacharqan. Tsay profëtami nirqan: “Israel runakunata kuyaq Tayta Diosmi nin: ‘Egiptucho wätay kar ñakaykäyanqaykipita noqami jipimushqä. 9 Tsaynöllami wakin nación runakuna ñakatsiyäshuptikipis qamkunata salvashqä. Contraykikunata ushakaskatsirmi paykuna täyanqan partita qamkunatana rikatsishqä. 10 Qamkunatami nirqä: “Noqaqa Tayta Diosnikikunami kä. Amorreo runakunapa markankunacho tar paykuna adorayanqan dioskunata ama adorayankitsu”. Tsaynö nikaptïpis manami cäsukayämashqaykitsu’ ”.
11 Tsaypita juk kutichömi Tayta Diospa angelnin Ofracho kaykaq encina jacha chakincho jamaykurqan. Tsay jachaqa Abiezer castapita aywaraq Joáspa chakranchömi karqan. Tsaychömi madianita runakuna mana rikayänanpä Joáspa tsurin Gedeónqa† üva jarukunan kaqcho trïguta pakayllapa wayraykarqan. 12 Tsaycho wayraykaptinmi Tayta Diospa angelnin yuripaykur nirqan: “Kallpayuq y geniuyuq runa, Tayta Diosmi yanapaykäshunki”.
13 Tsaynö niptinmi Gedeón nirqan: “Ay, taytay. Tayta Dios yanapaykämaptinqa ¿imanirtä kay desgraciakuna päsayäman? Unay castäkunami niyarqan Egiptupita Israel runakunata jipiyämunqanta. Kananqa ¿imanirtä tsaynö yanapayämantsu? Yanapayämänanpa trokinqa Tayta Dios qonqaskayämarmi madianita runakunapa makinman churaykayämashqa”.
14 Tsaynö niptinmi Gedeónta rikärir Tayta Dios nirqan: “Qam puëdinkimi madianita runakunapa munayninpita Israel runakunata salvayta. Paykunata salvanaykipä kikïmi qamta kachaykä”.
15 Tsaynö niptinmi Gedeón nirqan: “Ay, taytay. ¿Imanörä Israel runakunata salväman? Manasés trïbu runakunacho noqapa ayllüqa imaynaqmi kaykan. Tsaynöpis noqataqa manami imapäpis cuentayämantsu”.
16 Tayta Diosnami nirqan: “Tsaynö kaptinpis madianita runakunata juk runatanölla ushakätsinaykipä kikïmi yanapashayki”.
17 Gedeónnami nirqan: “Rasunpaypa yanapamänaykipä kanqanta musyanäpä ima milagrullatapis ruraykullay. 18 Taytay, imanö kaptinpis kusinakamunqäyaq kaycho jamapaykay”.
Tsaymi Tayta Dios nirqan: “Tsaynö kaptinqa kayllacho shuyäshayki”.
19 Tsaymi Gedeónqa malta cabrata pishtaskir kusinakurqan. Tsaynöpis ishkay chunka (20) kïlu jarinapitami levadüraynaq tantata masararqan. Nirkurmi aytsata canastawan y calduntana mankawan encina jacha chakinman aparqan.
20 Chätsiptinmi Tayta Diospa angelnin nirqan: “Aytsata y levadüraynaq tantata kay jatun rumi jananman churaykur jananman calduta wiñay”.
Ángel ninqannöllami llapanta Gedeón rurarqan. 21 Tsaymi Tayta Diospa angelnin tukrunwan aytsatawan tantata töpaykukuptin rumipita nina tsarir aytsata y levadüraynaq tantata rupar usharqan. Nirkurnami Tayta Diospa angelnin illakaskirqan.
22 Tsaynö illakaskiptinmi Gedeónqa tantiyarqan Tayta Diospa angelnin kanqanta. Tsaymi nirqan: “¡Taytay, kayrächi kayllaqa! Tayta Diospa angelninta rikaykarqa wanukushächi”.
23 Niptinmi Tayta Dios nirqan: “Ama llakikuytsu ni mantsakaytsu. Manami wanunkitsu”.
24 Tsaymi Gedeónqa Tayta Diospä altarta ruraskir jutitsirqan Yahweh-shaloma jutin kananpä. Tsay altarqa kananyaqmi Abiezer casta runakuna täyanqan Ofracho kaykan.
25 Tsay paqasmi Gedeónta Tayta Dios nirqan: “Taytaykipa wäkanpita qanchis watayuq allinnin kaq töruta apamuy. Nirkur Baalpä taytayki ruranqan altarta juchutsir ñöpancho kaykaq Asera diösapä jawiyanqan qerutapis tseqtay. 26 Nirkur qaqa janancho noqapä juk altarta ruray. Apamunqayki töruta pishtarnin Asera diösapä jawitsiyanqan qeruta tseqtanqaykiwan altar janancho rupatsina sacrificiupä rupatsiy”.
27 Tsaymi Gedeónqa chunka sirviqninkunata pushakurkur Tayta Dios ninqannölla llapanta rurarqan. Itsanqa taytanpa castankunapita y marka mayinkunapita mantsapakurmi tsakayllapa rurarqan. 28 Waraynin tutanami markacho taq runakuna rikayarqan Baalpa altarnin juchushqa kaykaqta y altarpa ñöpancho kaykaq Asera diösapä jawiyanqan raku qerupis illakashqa kaykaqta. Tsaynöllami mushuq altarcho allinnin kaq töru rupatsishqata tariyarqan. 29 Tsaymi runakuna jukninpis jukninpis niyarqan: “¿Pirä kaytaqa ruraykushqa?”
Tsaynö tapukuyaptinmi Joáspa tsurin Gedeón ruranqanta willayarqan.
Tsaymi Joásman aywar niyarqan: 30 “¡Tsuriki Gedeónta juklla jipimuy wanutsiyänäpä! ¡Paymi Baalpa altarninta juchutsishqa y ñöpancho Aserapä jawinqantsik qerutapis tseqtashqa!”
31 Tsaynö niyaptinmi Joásqa tsaycho juntaraykaq runakunata nirqan: “Qamkunaqa ¿imanirtä Baalpa janan shäriyanki? ¡Pipis Baalpa janan shäriq kaqqa manarä patsa waraptinmi wanutsishqa kanqa! Rasunpaypa dios karqa altarnin juchutsiqta kikin Baal castigatsun”.
32 Baalpa altarninta juchutsinqan junaqpitami Gedeónta Jerobaal jutiwan reqiyarqan. Jerobaal ninanqa “kikin Baal castigatsun” ninanmi.
33 Tsay witsanmi madianita runakuna, amalecita runakuna y rupay yarqamunan kaqlächo taq wakin runakunapis qorikarnin Jordán mayuta tsimpaskir Jezreel pampacho campamentunkunata rurayarqan. 34 Tsaymi Tayta Diospa Espïritun Gedeónta shakyätsiptin runakuna qorikäyänanpä cornëtata tukarqan. Tukaptinmi Abiezer casta mayinkuna Gedeónwan qorikäyarqan. 35 Mas runakuna qorikäyänanpämi entëru Manasés trïbu runakuna täyanqankunaman kachakunata kachayarqan. Tsaynöllami willakatsirqan Aser trïbu runakunaman, Zabulón trïbu runakunaman y Neftalí trïbu runakunamanpis. Tsaynö qayatsiptinmi Gedeón kaqman llapan qorikäyarqan.
36 Llapan qorikaskiyaptinmi Tayta Diosta mañakur Gedeón nirqan: “Nimanqaykinö Israel runakunata salvanäpä yanapamänayki kaptinqa 37 kanan paqasmi qaratsata ëraman churashä. Waray tutapä qaratsa ushmashqa kaptinpis patsa tsakilla kaptinqa rasunpaypami musyashä nimanqaykinö Israel runakunata salvanaykipä kanqanta”.
38 Tsaymi waraynin tuta Gedeón shärikuskir qaratsata qaptsiptin juk tazón junta shullya yaku yarqurqan. 39 Tsaynö kaptinpis yapaymi Tayta Diosta Gedeón mañakurqan: “Taytay, yapay mañakuptï ama ajanaykullaytsu. Yapaymi üsha qaratsata patsaman churashä. Patsa ushmashqa kaptinpis millwa tsakilla warämuptinqa yanapamänaykipä kanqantami musyashä”.
40 Tsaymi Gedeón mañakunqannölla Tayta Dios warätsimurqan patsa ushmashqata y qaratsata tsakillata.