Haránman Jacob chanqan
29
Tsaynö aywarmi rupay yarqamunan kaqlächo taq runakunaman Jacob charqan. 2 Tsaychömi pözuta rikarqan. Tsay pözupa ñöpanchömi kimsa majäda üshakuna y cabrakuna kaykäyarqan. Llapan uywakunapis tsay pözupitarämi yakuta upuyaq. Tsay pözutaqa jatunkaray läja rumimi tsapararqan. 3 Tsay läjataqa llapan mitsikuqkuna chaykurrämi kichayaq üshankuna y cabrankuna yakuta upuyänanpä. Yakuta upuskiyaptinnami läja rumiwan yapay tsapaskiyaq. 4 Tsay mitsikuqkunatanami Jacob tapukurqan: “Taytakuna, ¿maypitatä kayanki?”Tsaymi niyarqan: “Haránpitami kayä”.
5 Jacobnami nirqan: “¿Reqiyankiku Nacorpa willkan Labánta?”
Tsaynö niptinmi niyarqan: “Awmi”.
6 Yapaymi Jacob tapukurqan: “¿Allitsurä kaykäyan?”
Tsaymi mitsikuqkuna niyarqan: “Awmi, Labánqa allimi kaykan. Taqay üshankuna y cabrankuna qatishqa shamuykaq jipashqa Labánpa tsurin Raquelmi”.
7 Jacobnami nirqan: “Rupay jatunrä kaykaptinqa ¿imanirtä üshakunata y cabrakunata kaycho qoriraykätsiyanki? Yakuskatsir yapay mitsiq aywayay”.
8 Tsaymi niyarqan: “Mitsikuq mayïkuna chäyämunqanyaqrämi shuyänakuyä. Llapäkuna qorikaskirrämi pözu tsaparaq rumita wititsiyä”.
9 Tsaynö parlaykäyaptinmi taytanpa üshankuna y cabrankuna qatishqa Raquel charqan. Payqa üshakuna y cabrakuna mitsikuqmi karqan. 10 Uywankunata qatishqa prïman Raquel chaykaqta rikaskirmi jinan höra pözuman aywar tsaparaykaq rumita Jacob witiskatsir üshakunata y cabrakunata yakutsirqan. 11 Nirkurnami Raquelta mutsarnin winchikura kushikuypita Jacob waqarqan. 12 Jacobnami willarqan Rebecapa wawan y Labánpa sobrinun kanqanta. Tsayta wiyaykurmi Raquel cörrilla aywarqan taytan Labánta willaq.
13 Paninpa wamranwan tinkunqanta willaykuptinmi Labánqa cörrilla tinkuq aywarqan. Tinkuskirnami kushikurnin makallakurkur mutsarqan. Wayinman pushaykuptinmi Jacob willarqan ima päsanqankunatapis. 14 Tsaynö willaptinmi Labán nirqan: “¡Qamqa rasunpaypami castä kaykanki!”
Raquelpä y Leapä Jacob arunqan
Juk killa Jacob arupaykaptinnami 15 Labán nirqan: “Castä karpis manami debaldillaqa arunkimantsu. Willamay arunqaykipita aykata päganäpäpis”.
16 Labánpami ishkay jipash tsurinkuna kayarqan. Mayor kaqpa jutinmi karqan Lea. Qepa kaqpa jutinnami karqan Raquel. 17 Lea kuyayllapä ñawiyuq kaptinpis Raquelmi mas kuyayllapäqa karqan. 18 Raquelta kuyarmi Labánta Jacob nirqan: “Taytay, qepa kaq tsuriki Raquelpä qanchis wata arupäshayki”.
19 Tsaymi Labán nirqan: “Jäpa runata awninäpa trokinqa allimi kanqa qamta awniptï. Tsaynö kaptinqa kayllachöna täkushun”.
20 Tsaymi Raquelpä raykuq tiyun Labánta qanchis wata Jacob aruparqan. Raquelta pasaypa kuyaptinmi qanchis watapis juk ishkay junaqnölla päsaskirqan. 21 Qanchis wata arupaskirnami Labánta Jacob nirqan: “Arunäpä parlanqantsikta cumplishqänami. Kananqa tsurikiwan taykatsillämay”.
22 Tsaynö niptinmi majatsakay fiestaman llapan reqinakunqankunata Labán inkitarqan. 23 Tsay paqasmi tsurin Leata Jacob kaykanqan kaqman pusharqan. Tsaymi Leawan Jacob punurqan. 24 Leapa wätaynin kananpämi Zilpa jutiyuq jipashta Labán entregarqan.
25 Patsa waraskiptinnami Jacob tantiyaskirqan Leawan punuykanqanta. Tsaymi Labánta nirqan: “¿Imanirtä kayta ruramashqayki? Raquelpä raykuq arupaykaptï ¿imanirtä engañamashqayki?”
26 Tsaynö niptinmi Labán nirqan: “Costumbrikunachöqa qepa kaq tänanpä mayor kaqrämi puntata tänan. 27 Majatsakanqaykipita juk semänayaqrä Leawan tay. Qanchis wata mas arupämänayki kaptinqa Raqueltapis entregashaykimi”.
28 Tsaynö niptinmi mas qanchis wata arupänanpä Jacob awnirqan. Leawan juk semäna täyanqan cumpliskiptinnami Labánqa tsurin Raqueltapis entregarqan. 29 Raquelpapis wätaynin kananpämi Bilha jutiyuq jipashta entregarqan. 30 Tsaypitanami Raquelwanpis Jacob punurqan. Leata kuyanqanpita Raquelta mas kuyarmi tiyun Labán ninqannölla qanchis wata mas aruparqan.
Jacobpa tsurinkuna yuriyanqan
31 Leata Jacob mana kuyanqanta rikarmi Tayta Dios destinarqan wamrayuq kananpä. Raqueltanami qolluqyätsirqan. 32 Lea qeshyaq rikakurmi ollqu wamrata qeshyakurqan. Yuriskiptinmi nirqan: “Llakishqa kaptïmi Tayta Dios kuyapämashqa wamrayuq kanäpä. Kananmi itsanqa runä kuyamanqa”.
Tsaymi wawanpa jutinta churarqan Rubénb nir.
33 Nirkurnami Leapa wawan yapay yurirqan. Tsaymi nirqan: “Tayta Diosmi rikamashqa runä mana kuyamanqanta. Tsaymi yanapamashqa yapay wamrayuq kanäpä”.
Tsaynö nirmi wawanpa jutinta churarqan Simeónc jutin kananpä.
34 Tsaypita yapaymi Leapa ollqu wawan yurirqan. Tsaymi nirqan: “Kimsatana tsurinta wachaykaptïqa noqallatanami runä kuyamanqa”.
Tsaynö nirmi wamranpa jutinta churarqan Levíd jutin kananpä.
35 Tsaypitapis yapayrämi Leapa wawan yurirqan. Yuriskiptinmi nirqan: “Kananqa Tayta Diostami alabashä”.
Tsaynö nirmi wamranpa jutinta churarqan Judáe jutin kananpä. Tsaypitaqa wawan mananami karqannatsu.