Babiloniachö täräyashqanpita Judáman Israel nunakuna kutiyashqana kaptin y templuta yapë sharkatsiyashqana kaptinmi profëta Malaquías kë libruta qellqarqan. Kutiyashqanpita juk pachak (100) watatanö qepataran qellqarqan. Pë kawashqan witsanmi Israel nunakuna yarpäyarqan profëtakuna willakuyashqannö rïcuyäyänanpaqna kashqanta (Hag. 2.7, 18–19., rey David castapita juk rey mandakunanpaqna kashqanta (Eze. 34.13, 23–24. y pëkunawan Teyta Dios mushuq pactuta rurananpaqna kashqantapis (Jer. 31.23, 31–34.. Yarpäyashqannö mana kaptinmi nunakuna llakikur Teyta Diosman janan shonqullana creyikuyarqan.

Tsëmi Malaquías willakurqan allin kaq wätakunata sacrificiukunapaq templuman apayänanpaq (Mal. 1.6—2.9. warminpita nunakuna mana rakikäyänanpaq (Mal. 2.10–16. y diezmukunata templuman apayänanpaq (Mal. 3.6–12. Tsënöllam willakurqan Teyta Dios kachamunanpaq kaq willakuq y nunakuna shuyäyashqan mandakuq shamunanpaq kashqanta (Mal. 3.1–5. 4.5–6. Pëkunapaq willakurmi Bautizaq Juan y Jesucristo shayämunanpaq kaqta willakurqan. Malaquíasmi willakurqan chusku pachak pitsqa chunka (450) watanö Jesucristo manaraq yurikuptin.