Israel nunakunata nacionninkunaman ëllumunanpaq ninqan
31
Teyta Diosmi nin: “Tsë witsanmi llapan Israel casta nunakunapa Diosninkuna kashaq. Pëkunanam kuyashqä nunakuna kayanqa”.2 Jina kënömi Teyta Dios nin:
“Wanïpita safaq unë Israel nunakuna chusyaqkunapa purikäyaptinmi kuyarnin yanaparqä.
3 Änishqä markakunaman ëwëkäyaptinmi yuripurnin nirqä:
‘Qamkunataqa imëyaqpis kuyayashqëkim.
Ankupäyarnikim imëpis qamkunawan këkäshaq’.
4 “Kuyashqä Israel nunakuna, yapëmi yanapayashqëki markëkikunachö yamë kawayänëkipaq.
Tsëmi panderëtakunata tocar tushullapa cällikunapa yapë kushishqa puriyanki.
5 Samaria markachö këkaq jirkakunachömi üvaskunata yapë plantayanki.
Wayïninkunatapis kushishqam pallayanki.†
6 Tsë witsanmi Efraín jirkakunachö rikachakuqkuna qaparipa qayakuyanqa:
‘Teyta Diosnintsikta adoranantsikpaq Siónman aku ëwashun’ nishpa”.
7 Teyta Diosmi jina nin:
“Jacobpita miraqkunata ëllumushqäpita kushishqa qotsuyë.
Nacionnikikuna wakin nacionkunapita mas precisaq kashqanpita kushishqa alabayë.
Qaparipa kënö niyë: ‘¡Kawëkar quedaq Israel nunakunataqa Teyta Diosmi salvashqa!’
8 Israel nunataqa norti lädu nacionpitam kutitsimushaq.
Kë patsapa kuchunpitam ëllumushaq.
Pëkunawanmi kutiyämunqa wiskukuna, weqrukuna, qeshyaq warmikuna y llullu wawayuq warmikunapis.
¡Tsëtsikam purwa purwa kutiyämunqa!
9 Noqam kä Israel nunakunapa tëtan.
Efraín nunakunaqaa wamaqshu tsurïmi kayan.
Waqallapa ewkuyashqa karpis ankupaptïmi kushishqana kutiyämunqa.
Mana yakunäyänanpaqmi tsuya yaku kashqanllapa pushamushaq.
Mana ishkiyänanpaqmi alli nänillapa pushamushaq”.
10 Mëtsë nacionchö täraq nunakuna, Teyta Diospa willakïninta wiyayë.
Mëläya karuchö täraqkunatapis nishqanta willar kënö niyë:
“Israel nunakunata jinantinman qarqushqäpitam ëllumushaq.
Üshankunata mitsiq ëlluqnömi llapanta ëlluramur shumaq rikäshaq.
11 Jacobpita miraqkunatamb contrankunapita salvashaq.
Pëkunataqa puëdiq nacionpa makinpitam jorqamushaq.†
12 Kutimurmi Sión jirkaman witsärir kushishqa qotsuyanqa.
Bendicionnïwanmi mikïkunapis, vïnupis, aceitipis, üshapis, wäkapis tsëtsika kanqa.
Täräyashqan parti parqushqac huertanö kaptinmi imapis pishinqatsu.
13 Kushikurmi shipashkunapis, jövinkunapis, awkinkunapis tushuyanqa.
Llakikuyänanpa rantinmi kushishqa kawayänanpaq shoqashaq.
14 Sacerdötikuna mikuyänanpaqpis allin kaq mikïkunatam churashaq.
Kuyashqä nunakunapaqmi imëka wanayashqanta churashaq.
Noqa Teyta Diosmi tsënö nï”.
Llakikunqanpita Raquel kushikunanpaq ninqan
15 Teyta Diosmi kënö nin:
“Ramá markachö llakikur waqashqanmi wiyakëkämun.
Llakikur alläpa qaparishqanmi wiyakëkämun.
Tsëqa Raquel waqashqanmi.
Pëqa wawankunapaqmi alläpa waqëkan.†
Wawankuna wanushqa kaptinmi shoqayaptinpis mana pärëta waqëkan”.d †
16 Teyta Diosmi nin:
“Raquel, amana waqënatsu.
Weqikita amana ramënatsu.
Chikishuqniki nacionkunapitam wawëkikuna kutiyämunqa.
Kanan llakirpis kutiyämuptinqa kushikunkim.
Noqa Teyta Diosmi tsënö nï.
17 Tsëmi shamuq watakunachö wawëkikuna nacionninman kutikayämuptin kushikunki.
Noqa Teyta Diosmi tsënö nï.
18 “Wiyarqümi Efraín nunakunae alläpa llakikur kënö mañakayämaqta:
‘Chucaru töruta mansaq cuentam castigayämarqunki.
Tsënö castigayämarpis qamqa Teyta Dioslläkunam kanki.
Yapë ëlluyämaptikiqa cäsuyashqëkim.
19 Mana cäsukuq kayashqäpitam penqakuyä.
Jutsa rurayashqäta jaqirirmi perdonta mañakuyä.
Jövin këkar jutsata rurayashqäpita penqakurmi ullpanashqa këkäyä’.
20 “Efraín nunakunaqa kuyashqä wamräkunam kayan.
Pëkunata rikar alläpam kushikü.
Piñapärirpis pëkunataqa imëpis yarparëkämi.
Pëkunapaqqa shonqüpis nanëparan llakin.
Pëkunataqa imëpis ankupäshaqmi.
Noqa Teyta Diosmi tsënö nï.
21 “Kuyashqä Israel nunakuna, më nänipa ëwayashqëkitapis shumaq yarpakachäyë.
Tsë nänillapana markëkikunaman kutikayämï.
22 ¡Imëyaqraq purikuyanki mana wiyakuq shipashnö!
Nacionnikiman kutikayämunëkipaq kë patsachö imëpis mana rikäyashqëki kaqtam rurashaq.
Tsë rurashqäqa espantakïpaqmi kanqa imëka juk shipash casakunanpaq ollquta ashiq kikin yëkuptin espantakïpaq kashqannömi”.
23 Israel nunakunata kuyaq y llapanta mandaq Teyta Diosmi nin: “Nacionninman Judá nunakunata ëllumuptïmi markankunachöna täräyanqa. Yanapashqäpita kushikurmi niyanqa: ‘¡Templu kashqan sagrädu jirkaman Teyta Dios bendicionninta churëkullätsun! ¡Tsëchömi Teyta Dios munashqannölla pïmëpis alli kawan!’
24 “Judá nunakuna nacionninchö yapë täräyaptinmi jinan markachö täraqkunapis, chakrachö uryaqkunapis y üsha mitsiqkunapis yamëna tsëchö täräyanqa. 25 Qelanëkaqkunatam kallpatsashaq. Llakishqa këkaqkunatam kushikïta qoshaq”.
26 Teyta Dios tsënö nikämaptinmi riyarkamurqä. Tsëta suëñïkurmi alläpa kushikurqä.
27 Teyta Diosmi nin: “Tiempu chämunqam Judáchö y Israelchö nunakunapis y wätakunapis atskaman mirayänanpaq. 28 Nöpataqa qorata llupiriqnömi, wayita juchuratsiqnömi y poqita jitariqnömi pëkunata castigarqü. Kananqa wayita shäritsiqnömi y plantata plantaqnömi pëkunata shumaq yanapashaq. Noqa Teyta Diosmi tsënö nï.
29 “Tsëmi nunakuna kënö niyanqanatsu: ‘Tëtankuna puchquq üvasta mikuyaptinmi tsurinkunapa kirunkuna pajan’ nir.† 30 Puchquq üvasta mikuqpa kirun pajashqannömi jutsata rurayashqanpita kikinkuna wanuyanqa”.†
Mushuq pactuta rurananpaq ninqan
31 Teyta Diosmi nin:
“Junaqkuna chëkämunnam Israel nunakunawan y Judá nunakunawan mushuq pactuta ruranäpaq.†
32 Tsë pactuqa manam unë castankunata Egiptupita jorqamur rurashqä pactunötsu kanqa.
Warminta qowan kuyashqannö kuyëkaptïmi unë castankunaqa tsë pactuta cumpliyashqatsu.
Noqa Teyta Diosmi tsënö nï.
33 “Tsë junaqkuna pasariptinmi Israel nunakunawan pactuta rurashaq.
Tsënö rurarmi leynïkunata yarpëninkunaman churashaq.
Shonqunkunamanmi leynïkunata qellqashaq.
Pëkunapa Diosninkunam kashaq.
Pëkunanam kuyashqä nunakuna kayanqa.†
Noqa Teyta Diosmi tsënö nï.
34 “Tsë witsanmi waktsapis rïcupis llapan reqiyämanqa.
Tsëmi nuna mayintapis ni wawqintapis pipis käyitsinqanatsu reqiyämänanpaq.
Pëkunapa llapan jutsankunatam perdonashaq.
Ima jutsata rurayashqantapis manam yarpäshaqnatsu.†
Noqa Teyta Diosmi tsënö nï”.
35 Teyta Diosmi kamarqan intita junaqpa atsikyänanpaq.
Tsënöllam killata y qoyllurkunata kamarqan paqaspa atsikyänanpaq.
Pëmi permitin lamarpis laqchiqsar qaparinanpaq.
Pëpa shutinqa llapanta mandaq Yahwehmi.
36 Tsëmi Teyta Dios nin:
“Tsë llapan kamashqäkuna mana ushakaq kayashqannömi Israel nunakunapis ushakäyanqatsu.†
37 Ciëluta pipis manam medita puëdintsu.
Patsapa cimientuntapis manam ni pipis rikashqatsu.
Tsënöllam mana allita rurayashqa kayaptinpis Israel nunakunata imëpis jaqirishaqtsu.
Noqa Teyta Diosmi tsënö nï”.
38 Teyta Diosmi nin: “Tiempu chämunqam Jerusalén markata Hananeel törripita qallëkur Esquïna Punku niyashqanyaq noqapa shutïchö altsayänanpaq. 39 Tsë punkupita cordelwan medirmi Gareb jirkayaq perqayanqa. Tsëpitam jirururämunqa Goa partiman. 40 Aya pampayänan y uchpa jitakuna uranpis Jerusalén markä rurinchönam quedarinqa. Tsënöllam Cedrón uranpa lädun chakrakunapis hasta Cawallukuna shutiyuq punku tsimpanyaq santu Jerusalén marka kanqa. Jerusaléntaqa manam imëpis juchutsiyanqanatsu ni ushakätsiyanqanatsu”.