Lamentaciones ninanqa këkan “alläpa llakikur waqashqan” ninanmi. Wata 586 a. C. Jerusalénta ushakätsiyashqanpita watakuna pasariptinmi kë libruta qellqarqan. Jerusalénta juchuratsiyashqanta y tsëchö täraq nunakunata juk lädu nacionman apakuyashqantam kë libruta qellqaq nuna alläpa llakikurqan.

Kë librutam qellqarqan nunakuna ëllukëkur Teyta Diosta perdonta mañakuyänanpaq. Tsëmi templuta yapë sharkatsir kë libruchö qellqarëkaqkunata cada wata qotsuyaq.

Manam musyëtsu kë libruta pï qellqashqanpis. Atska nunakunam yarpäyan profëta Jeremías qellqashqanta.

Kë libruchö cada capïtulu juk poesíam këkan. Capïtulu 1, 2 y 4-chö cada versïculu juk hebreo letrawanmi qallëkun. Tsëmi hebreo abecedariuchö punta kaq letra álef kaptin punta kaq versïculu hebreuchö qallëkun álef letrawan. Hebreo abecedariuchö ishkë kaq letra bet kaptinmi ishkë kaq versïculu hebreuchö qallëkun bet letrawan. Jina cada versïculuchömi qallëkun hasta ushananyaq. Hebreo abecedariuchö ishkë chunka ishkë (22) letra kaptinmi tsë capïtulukunachö ishkë chunka ishkë versïculukuna këkäyan.

Capïtulu 3-chönam cada kima versïculu qallëkun tsë letrallawan. Tsëmi hebreo abecedariuchö punta kaq letra álef kaptin versïculu 1, 2 y 3 hebreuchö qallëkun álef letrawan. Hebreo abecedariuchö ishkë kaq letra bet kaptinmi versïculu 4, 5 y 6 hebreuchö qallëkun bet letrawan. Tsënöllam cada kima versïculu këkan hasta ushananyaq. Hebreo abecedariuchö ishkë chunka ishkë (22) letra kaptin y cada kima versïculu tsë letrallawan qallëkuptinmi tsë capïtuluchö joqta chunka joqta (66) versïculukuna këkan.