Rey Sedequíasta imanö wanunanpaq willanqan
34
Jerusalén markata y jinantin Judá nacionchö këkaq markakunata Babilonia nacionpa reynin Nabucodonosor soldädunkunawan y poderninchö këkaq nacionkunapa soldädunkunawan ataquëkaptinmi Jeremíasta Teyta Dios nirqan:† 2 “Israel nunakunata kuyaq Teyta Dios karmi nï: Judá nacionpa reynin Sedequíasta willar kënö ninki: ‘Teyta Diosmi nin: Kë markata Babilonia nación reypa makinman qoykuptïmi llapanta sendïkuyanqa. 3 Qamqa manam imanöpapis safankitsu. Prësu tsarïkuyäshurniki reypa makinman qoykuyäshuptikim tsë rey juzgashunki. Tsëpitanam Babiloniaman prësu apayäshunki.4 “ ‘Judá nacionpa reynin Sedequías, tsënö kananpaq kaptinpis noqa Teyta Diosmi nikä guërrachö mana wanunëkipaq kashqanta. 5 Tsëpa rantinqa awkinyar alli wanïpam wanunki. Wanuptikiqa unë castëki reykunata pampayashqannömi qamtapis inciensuwan sawmar pampayäshunki. Waqarmi “¡ay tëtallanë tëta!” niyanqa. Tsënö kananpaq kashqanta noqa Teyta Diosmi nï’ ”.
6 Teyta Dios nishqannöllam Judá nacionpa reynin Sedequíasta profëta Jeremías Jerusalénchö willarqan. 7 Tsë höram Babilonia nacionpa reynin soldädunkunawan Jerusalénta ataquëkäyarqan. Tsënöllam ataquëkäyarqan Laquis markatapis y Azeca markatapis. Judá nacionchö perqawan jirurushqa wakin markakunataqa vencishqanam kayarqan. Jerusalén, Laquis y Azeca markakunataqa manam venciyarqanraqtsu.
Hebreo mayinkunata esclävu kayanqanpita libri jaqiriyanqan
8 Këchömi qellqarëkan profëta Jeremíasta Teyta Dios willapashqan. Tsë witsanmi Jerusalénchö täraq nunakunawan rey Sedequías parlarqan hebreo mayinkunata ollqutapis warmitapis esclävu kayashqanpita libri jaqiriyänanpaq. 9 Tsëmi niyarqan libri jaqiriyaptin pipis marka mayinta esclävunpaq manana tsaränanpaq. 10 Tsënö parlarmi llapan autoridäkuna y llapan nunakunapis esclävunkunata librina kachariyarqan. 11 Tsëpita tiempu pasariptinnam libri kachariyashqanpita alläpa llakikur ollqutapis warmitapis yapë kutitsiyarqan esclävu kayänanpaq.
12 Tsëmi Jeremíasta Teyta Dios kënö nirqan: 13 “Israel nunakunata kuyaq Teyta Dios karmi nï: Unë castëkikuna Egiptuchö esclävu kayashqanpita jorqamurmi pëkunawan pactuta rurarqä. Pactuta rurarmi nirqä 14 esclävun kayänanpaq rantiyashqan hebreo mayinkunata joqta wata sirwiriyaptin cada qanchis watachöqa librina kachariyänanpaq.† Tsënö nikaptïpis unë castëkikunaqa manam wiyayämashqatsu.
15 “Qamkunaqa nishqäta wiyakurmi hebreo mayiki kaq esclävïkikunata librina jaqiriyarqunki. Tsënö jaqiriyänëkipaqmi adorayämänëki templüman yëkur nöpächö änikuyarqunki. 16 Tsënö änikïkarpis qamkunaqa yapëmi esclävïkikuna kayänanpaq warmitapis ollqutapis ashïkur kutitsiyarqunki. Jaqiriyänëkipaq nöpächö parlarirpis yapë kutitsir manakaqmanmi churayämarqunki.
17 “Noqa Teyta Diosmi nï: Qamkunaqa marka mayikikunata libri jaqiriyänëkipaq nishqäta manam wiyayämarqunkitsu. Tsëmi kananqa qamkunata jaqiriyashqëki. Jaqiriyaptiqmi wakinniki guërrachö wanuyanki, wakinnikina mallaqëwan y wakinnikinam pesti qeshyawan wanuyanki. Tsëta musyarmi mëtsë nacionchö täraq nunakunapis mantsakäkuyanqa. Noqa Teyta Diosmi tsënö nï.
18 “Marka mayikikunata libri jaqiriyänëkipaqqa nöpächömi pactuta rurayarqëki. Tsë pactuta rurarmi wishita pullanpa cuartizëkur ëtsanta frenti frenti churayarqëki. Tsëpitanam tsë churayashqëki ëtsakunapa chöpinpa pasayarqëki ‘noqakunatapis ishkëman roquqnö castigayämätsun änikuyashqäta mana cumpliyaptïqa’. Tsënö nirirpis mana cumpliyashqëkipitam kanan castigayashqëki.
19 “Ëtsakunapa chöpinpa pasar änikämarpis mana cumpliyashqëkipitam castigayashqëki Judá nacionpa autoridäninkuna kayaptikipis, Jerusalénchö autoridäninkuna kayaptikipis, reypa yanapaqninkuna kayaptikipis, sacerdötikuna kayaptikipis y pï kayaptikipis.† 20 Castigayarnikim permitishaq chikiyäshuqnikikuna wanuratsiyäshunëkipaq. Wanushqa jitaräyaptiki wiskurkunawan jirka animalkunam mikuyäshunki.
21 “Qamkunata castigayashqaqnöllam Judá nacionpa reynin Sedequíasta y yanapaqninkunatapis castigashaq. Castigarmi permitishaq Babilonia nación reypa y soldädunkunapa poderninchö kayänanpaq. Tsë rey ataquëkäyäshurniki witikurishqana kaptinpis† 22 kë markaman kutïkamur yapë atacayäshunëkipaqmi permitishaq. Venciyäshurnikim wayikikunatapis kayar ushayanqa. Jinantin Judáchö këkaq markakunatapis ushakäratsiyaptinmi chusyaq tikrarinqa. Noqa Teyta Diosmi tsënö nï”.