—Wicharimuy cayman. Cay ricuskasniyquej khepanta jamojcunata ricuchiskayqui, —nispa.

2 Chay quiquinpachataj Santo Espíritu atiyninman churawarka jamoj imasta sutꞌinchanawanpaj. Uj sumaj tiyanatataj janaj pachapi ricorkani, chay jatun tiyanapi ujtaj tiyaskata. 3 Chay tiyacojka may cꞌachitu lliphipishajjina carka. Chay sumaj tiyanataj cꞌuychiwan muyuriska carka. Cꞌachitu lliphipej kꞌomer rumijinataj cꞌanchasharka. 4 Chay jatun tiyanari iscay chunca tawayoj tiyanaswan muyuriska carka. Chay tiyanaspitaj iscay chunca tawayoj curajcuna tiyaskas carkancu. Yuraj pꞌachawan pꞌachalliskas, atipaskancumanta umancupitaj kori pilluwan churaskas carkancu. 5 Jatun tiyanamantataj relampagocuna sonaycuna truenocunawan llojserka. Kanchis nina cꞌanchanastaj chay jatun tiyanaj ñaupakenpi laurasharka. Chayka tucuy imata ruwaj Diospa Espiritunmin.^a 6 Jatun tiyanaj ñaupakenpitaj chꞌuya vidrioman rijchꞌacoj kochajina carka.

Jatun tiyana urapi muyuyninpiwan tawa causajcuna carkancu. Chay causajcunaka ñawipuru carkancu, ñaupakencupis wasancupis. 7 Ñaupaj caj causajka leonman rijchꞌacoj carka. Iscay caj causajka toroman rijchꞌacoj carka. Quinsa caj causajri runa uyayoj carka. Tawa caj causajtaj phawashaj ancaman rijchꞌacoj carka. 8 Chay tawa causajcuna sapa ujnincu sojta lijrasniyoj carkancu. Ñawipurutaj carkancu muyuynincupipis uqhuncupipis. Tuta pꞌunchay mana samaricuspa yupaychashallancupunitaj:

—¡Santo, santo, santo, tucuy atiyniyoj Señor Dios! Payka carkapuni, cashanpuni, wiñaypajpunitaj canka, —nispa.

9 Ajinata chay causajcunaka tiyanapi tiyaska Diosta jatunchancu, may sumajpaj khawancu, yupaychancutaj. Payka wiñaypa wiñayninpaj causayniyojmin. 10 Sapa cuti ajinata yupaychajtincutaj chay iscay chunca tawayoj curajcunaka tiyaska Diospa ñaupakenman konkoricuncu. Payka wiñaypa wiñayninpaj causayniyoj. Chay curajcunataj kori pillusnincuta tiyanaj ñaupakenman churaspa yupaychancu: