—Sardispi iglesia tantacojcunaj willajnincuman kelkay: Noka tucuyta juntꞌaj Santo Espirituyoj^a caj, kanchis chꞌascasta japꞌejtaj nishayqui: Ruwaskasniyquita sumajta yachani. Runaslla causashaskayquita nincu, astawanpis wañuska cashanqui. 2 ¡Rijchꞌaricuy! Waquin ruwaskasniyqui chincanayashan, chayta callpachay. Ruwaskasniyquitaka Diospa ñaupakenpi manamin ruwanayquimanjina ruwaskatachu khawani. 3 Chayraycu yuyaricuy imaynatachus cheka yachachinasta uyarispa japꞌicuskayquita, chaymanjinataj causacuy. Nokamantaj cutirimuy. Manachus rijchꞌarinqui chayka, mana yuyaskayqui ratupi suwajina jamusaj juchachasunaypaj. 4 Chaywanpis Sardis hermanos uqhupeka chꞌichichaj juchawan mana chꞌichichacojcuna cashancuraj. Paycunaka llimphuchaskas nokawan cusca causankancu chaypajjina caskancuraycu. 5 Juchata atipajka llimphu causaywan pꞌachalliconka pꞌachawanjina. Wiñay causayniyojcunaj sutisnincu kelkana libromantapis paypa sutintaka ni jaycꞌaj pichasajchu. Astawanpis Tatay Diospa ñaupakenpi angelesninpa ñaupakencupipis cheka runaypaj paytaka rejsicusaj. 6 Diospa ajllacuskasninman Santo Espíritu nishaskanta ningriyoj cajka sumajta uyarichun.

7 ‘Filadelfiapi iglesia tantacojcunaj willajnincuman kelkay: Noka cani cheka caj, Diospa ajllaskan caj.^b [Imaynatachus Davidka llajtanpa llaventa japꞌerka, ajinallatataj nokapis Diospa mosoj llajtanpa]^c llaventa japꞌiniña. Quichariskayman yaycojtaka ni pi jarcꞌayta atinchu. Wiskꞌaskaymantaj ni pi yaycuyta atinchu. Nishayquitaj: 8 Yachani causayniyquita. Chayraycu Diosman kayllaycunayquipaj uj puncutajina quichariporkayqui. Chaytaka ni pi wiskꞌayta atinchu. Yachanitaj pisi callpayoj caskayquiwanpis niskayta casuskayquita. Nokajta caskayquitapis willacorkanquipuni ni jaycꞌaj mananchacuspa. 9 Yachani supay Satanaspa tantacuna-wasinmanta cajcunamantaka. Paycunaka, “Israelcuna caycu”, nicuncu. Manataj cheka israelcunachu cancu. Manachayrí llullas cancu. Chayraycu noka paycunata jamuchisaj ñaupakeyquipi konkoricunancupaj. Chaywan paycunata reparachisaj noka kanta munacususkayta. 10 Niskaymanjina Diospi japꞌicuspa muchorkanqui. Chayraycu nokapis manchay ñacꞌariy pꞌunchaycunamanta jarcꞌaskayqui. Chay ñacꞌariy pꞌunchaycunaka tucuy cay pachapi canka. Chaywantaj tucuy cay pachapi caj runaspa sonkoncuta yachasaj. 11 Uskhayta jamusaj. Chayraycu nisuskayta casullaypuni atipaskayquimanta japꞌinayquita^d ama chincachinayquipaj. 12 Juchata atipajtaka Tatay Diospa yupaychanawasinpi mana cuyoj cacunanpaj churasaj. Paytaj ni jaycꞌaj llojsenkachu. Tatay Diospa sutintataj paypi kelkasaj. Mosoj Jerusalén llajtayoj caskantapis kelkasaj. Chay janaj pachamanta uraycamoj Jerusalenka Tatay Diospa llajtanmin. Nokajta caskanta ricuchinaypaj mosoj sutiyta atipajpi kelkasaj. 13 Diospa ajllacuskasninman Santo Espíritu nishaskanta ningriyoj cajka sumajta uyarichun.

14 ‘Laodiceapi iglesia tantacojcunaj willajnincuman kelkay: Noka Diospa niskanta juntꞌaj caj, cheka caj chekata willaj. Diospa ruwaskasninpa kallaricuynin cajpis nishayqui: 15 Yachani causayniyquita. Nitaj chiri nitaj kꞌoñi canqui. ¡Chirillapis chayrí kꞌoñillapis cawaj! 16 [Kꞌoñi cayka Diospi sumajta japꞌicuymin. Chiri caytaj manaraj paypi japꞌicuy.]^e Kanka nitaj chiri nitaj kꞌoñi canqui. Chayraycu khesachanayashayquiña. 17 Kanka nishanqui: “Khapaj cani. [Diospa Espiritunwanpis]^f khapajyachiska cani. Chayraycu mosoj causaypi ni imapi pisichicunichu”, nispa. Manataj reparacunquichu mosoj causaypi wajcha, qhuyay, mana imayoj, ciego, Diospa ñaupakenpi kꞌalalla caskayquita. 18 Sumajta yuyaychayqui: Diospi japꞌicunayquipaj nokamanta mañacuway. Paypi japꞌicuyka sumaj puru korijinamin. Chaywan cierto khapaj canqui. Diospa ñaupakenpi ama kꞌalalla pꞌenkay riqhurinayquipaj chekan ruwaywan pꞌachallicuy. Diospa niskanta reparanayquipajpis nokamanta mañacuway.^g Ajinapi manaña ciegochu canqui. 19 Nokaka munacuskasniyta juchancumanta reparachini wanachinitaj. Chayraycu tucuy sonkowan casuway. Juchayquita sakespataj nokaman cutiricuway 20 ¡Reparay! Noka runata wajyashani. Sapa uj wajyaskayta uyarispa sonkonta^h quichariwajmanka yaycumusaj. Paywantaj ujchacusaj. Paytaj nokawan ujchaconka. 21 Nokaka tucuyta atipaskaymanta Dios Tataywan cusca camachinaypaj tiyaycuska cani. Ajinallatataj juchata atipajtaka nokawan cusca camachinanpaj tiyaycuchisaj. 22 Diospa ajllacuskasninman Santo Espíritu nishaskanta ningriyoj cajka sumajta uyarichun. Chay parlawajka chayta niwarka.