Jesuska Moisesmanta aswan curajpaj churaska
3
Diosman tꞌakaska hermanosníy, janaj pachapaj wajyaska-masicunay canquichej. Chayraycu niyquichej: Wajyaskas caskayquichej-manjina sumaj yuyaywan Jesusta reparaychej paypi japꞌicuskayquichejta willacuspa. Payka Diospa cachamuskan kayllaycuchinawanchejpaj. 2 Ajinapi Diospa churaskan caspa Jesuska ruwanasninta juntꞌarkapuni. Ajinallatataj Moisespis churaska caskanmanjina Diospa wasinpi tucuy ruwanasninta juntꞌarka. [Israelcunaka uj familiajina caspa Diospa wasin cancu.]a 3 Wasichaj runaka aswan sumajpaj khawaskamin wasimanta niskaka. Ajinallatataj Jesustapis aswan curajpaj Dios jatuncharka Moisesmanta niskaka. 4 Tucuy waseka wasichajniyojmin. Diosri tucuy imata yuyayninwan ruwarka. 5 Moiseska Diospa wasinpi khawapojninjina carka. Tucuy camachiskantataj juntꞌarka. Ajinapi Dios khepa tiempopi sutꞌinchanan carka, chay imasmanta ñaupajpi willarka. 6 Cunanka quiquin Wawan Cristota wasinpi Dios churan. Wawanri munayninta juntꞌanpuni. Ajinapi Wawanka wasinpi runasninta munacuywan camachiwanchej. Nokanchejtaj Diospi japꞌicuskanchejraycu paypa sumaj niskanpi confiacuskanchejta sutꞌita willacunanchej tiyan. Ajinata causacuspalla Diospa wasin canchej.Dios wajyan samacuyninman
7 Chayraycu Santo Espiritoka Diospa palabranpi niwanchej:
Cunan sonkoyquichejpi Dios wajyashasunquichej.
Wajyaskanta uyarinquichej chayka,
8 ama sonkoyquichejta rumiyachiychejchu ñaupa tatasniyquichejjinaka.
Paycunaka Moiseswan chꞌin pampapi purishaspa jaya sonkowan Diosmanta nerkancu:
“Yachasunchej Dios atiyniyojchus caskanta”, nispa.
9 Paycunaka tawa chunca watasta Diospa ruwaskasninta ricorkancu.
Tucucuycama qhuyacuyninta saycꞌuchispapis manapuni paypi japꞌicuspa casorkancuchu.
10 Chayraycu Dioska sinchꞌita phiñacorka chay pꞌunchay runacunapaj.
Nerkataj: “Pantaj sonkollapuni cancu, manataj munayniymanjina causayta yachancuchu”, nispa.
11 Ajinapi Dioska chekan phiñacuyninpi juraspa nerka: “Nokawan cusca samacunancupaj Canaán jallpꞌaman waquichiporkani, chaymanka ni jaycꞌaj yayconkancuchu”, nispa.
Yuyaychanacuychej
12 Hermanosníy, khawacuychej pajtataj maykenpis kancunamanta sajra sonkoyoj canman. Ajinamanta, wiñay causaj Diospi mana japꞌicuskanraycu paymanta carunchacushanman. 13 Chayraycu tiempo canancamaka sapa pꞌunchay yuyaychanacuychej pajtataj maykenpis kancunamanta juchawan pantachiska caspa rumi sonkoyojman tucunman. 14 Imaynatachus ñaupajpi Cristollapi confiacorkanchej causaj-masisnin cananchejpaj, quiquillantapuni confiacuychej.
15 Diospa palabranpipis nin:
Sichus cunan sonkoyquichejta Dios wajyaskanta uyarinquichej chayka, ama sonkoyquichejta rumiyachiychejchu, ñaupa tatasniyquichej chꞌin pampapi ruwarkancujinaka, nispa.
16 ¿Picunataj chay mana casucoj rumi sonkoyojcunarí? Egiptomanta Moiseswan pusaska tucuy llojsejcuna carkancu. 17 Tawa chunca watasta chay juchasapa runaspaj Dios sinchꞌita phiñacorka. Ajinamanta paycuna wañurarkancu, tullusnincupis chꞌin pampapi khepacorka. 18 Chay mana casucojcunapaj Dioska jurarka waquichiskan lugarman mana yaycunancuta. 19 Ajinamanta cayta reparanchej: Paycunaka mana paypi japꞌicuskancuraycu paypa samacuynin jallpꞌaman mana yaycuyta aterkancuchu.