Cristowan ujchacuspa mosoj causayniyoj canchej
3
Sichus Cristowan cusca mosoj causayman causarimorkanquichejña chayka, munaychejpuni janaj pacha imasta. Chaypi Cristopis Dioswan cusca camachishan. 2 Janaj pacha imaspipuni yuyaychej, amataj cay pacha imaspeka. 3 Yuyaricuychej Cristowan wañuskayquichejtaña. Causayniyquichejka Cristowan pacaskamin Diospi. 4 Cristomin causayninchejka. Pay riqhurimojtin kancunapis paywan cusca riqhurillanquichejtaj sumaj cꞌanchayninpi.Wijchꞌupuychej maucꞌa causaypi ruwanasta
5 Chayraycu wañuchiychej kancunapi cay pacha munaycunata: Khenchachacuyta, millay ruwayta, munaywan atipachicuyta, sajra munayta, munapayayta ima. Munapayayka quiquin cashan ruwaska dioscunata yupaychaywan. 6 Chay ruwaskasraycu Diospa cꞌajaj phiñacuynenka mana casucojcunaman jamun. 7 Ñaupajpi kancunapis paycunawan causacojcuna cashaspaka ajinata ruwarkanquichej. 8 Cunanrí sakepuychej tucuy chayjina ruwanasta. Wijchꞌupuychej phiñacuyta, cꞌajaj phiñayta, sajra ruwayta, sajra parlayta, millay parlayta. 9 Tꞌakacorkanquichejña maucꞌa causaymanta sajra ruwanasninmantawan. Chayraycu ama llullanacuychejchu. 10 Astawanrí pꞌachallicuychej mosoj causayniyquichejwan astawan astawan mosojyachiskas caspa Diosta rejsinayquichejpaj. Chay mosoj causayta Santo Espíritu mosojyachishan ruwapusojniyquichej Diosman rijchꞌacojcuna canayquichejcama. 11 Mosoj causaypi manaña canchu israelpis nitaj waj llajtayojpis. Nitaj cayjina costumbreyoj nitaj wajjina costumbreyoj,a nitaj forasteropis nitaj caru runapis canchu. Manañataj camachipis nitaj libraska runapis canchu, manachayrí Cristollaña. Tucuy nokanchejpi payllaña tiyacushan.
Munacuywan causacuychej
12 Diospa ajllacuskasnin, payman tꞌakaskasnin, munacuskasninpis canquichej. Chayraycu pꞌachallicuychej sonkomanta qhuyacuywan, cꞌacha caywan, llampꞌu sonko caywan, cꞌacha yuyaywan, pacienciawan. 13 Chay pacienciawan kancuna purajmanta pantaskasniyquichejta muchunacuychej. Sichus imamantapis phiñanacuwajchej chayka, perdonanacuychej. Imaynatachus Señorninchej kancunata perdonasorkachej, ajinallatataj kancunapis perdonanayquichej. 14 Chay tucuymanta astawanka munacuywan pꞌachallicuychej. Munacuywanka tucuyniyquichej uj sonkolla mosoj causaypi wiñanquichej. 15 Allillanpi tiyacuyta Cristo kosuskayquichejmanjina causacuychej. Ajinapi Cristo sonkoyquichejta allin yuyaypi pusanka. Allillanpi ujchaska canayquichejpajmin Dioska wajyasorkachej. Agradececojcunapunitaj caychej. 16 Cristoj niskan kancunapi cacuchun khapajyachisunayquichejpaj tucuy cheka yachaypi. Chay niskanwan yachachinacuychej yuyaychanacuychejtaj. Diosta yupaychaychej yupaychana taquinaswan, himnoswan, Santo Espíritoj yuyaychaskan taquinaswanpis. Cꞌacha yanapayninwan tucuy sonkowan taquiychej. 17 Tucuy imapi, niskayquichejpipis tucuy ruwaskayquichejpipis, Señorninchej Jesuswan ujchaska tucuy imatapis ruwaychej. Paynejllata Dios Tataman graciasta koychej.
Hermanos chaupipi causanamanta
18 Warmis, kosayquichejta casuychej, Señorpi japꞌicojcunajina. 19 Kosas, warmiyquichejta munacuychej, amataj phiñacuspa paycunata llaquichiychejchu. 20 Wawas, tatayquichejta mamayquichejta tucuy imapi casuychej. Ajinamin Señortaka cusichin. 21 Tatas mamas, ama wawasniyquichejta phiñachiychejchu ama pisi sonko canancupaj. 22 Camachis, casuychej tucuy imapi cay pachapi patroncunayquichejta. Amataj runaj khawaskallan ruwaychejchu paycunata cusichinapajjinallaka. Manachayrí cheka sonkowan ruwaychej Señorta manchachicuspa. 23 Imallatapis ruwaspaka tucuy sonkowan ruwaychej Señorta cusichinapaj, amataj runallata cusichinapajchu. 24 Yachanquichejmin ruwapuskayquichejmanta Señor kosunayquichejta. Señorninchej Cristotamin servishanquichej. Paytaj wiñay causayta kosonkachej. 25 Sajra ruwajcunarí sajra ruwaskancumanjina japꞌenkancu.