Cristomin Diospa pacaska yuyaynenka
2
Tucuy atiskayman llancꞌashaskayta yachanayquichejta munani, kancunapaj Laodicea llajtayojcunapajpis. Mañacushanitaj tucuy nokata mana rejsiwajcunapajpis. 2 Mayta munani sonkoyquichejta callpachayta, munacuypi ujchaska caskayquichejwan, tucuy cheka yuyaypi seguro canayquichejpaj. Ajinapi Diospa pacaska yuyayninta sutꞌita rejsinquichej. Chayka Cristota rejsiymin. 3 Cristopi tucuy khapaj yuyayninta yachaynintapis Dioska jallchꞌapuwaskanchej. 4 Chayta nini ama ni pi sumajman rijchꞌacoj palabraswan pantachisunayquichejpaj. 5 Kancunamanta carupi cashaspapis sonkoywanka kancunawanpuni cashani. Allinta causashaskayquichejta, Cristopi japꞌicuspa sumajta sayashaskayquichejtapis ricuspa cusicuni.Cristowan ujchaska causacuychej
6 Chayraycu imaynatachus Señorninchej Cristo Jesusta japꞌicorkanquichej chaymanjinallapuni paywan ujchaska causacuychej. 7 Sinchꞌi saphichaska sachꞌajina Cristowan ujchaska saphichacuychej sumaj wiñachiskas canayquichejpaj. Imaynachus yachachiska caskayquichejmanjina Diospi japꞌicuskayquichejpi sinchꞌita sayacuychej. Tucuy sonkowantaj Diosman graciasta koychejpuni. 8 Khawacuychej yankha pantachej yachaywan ama ni pi japꞌiycusunayquichejta. Chay yachayka runaj yachachinamanjina cay pachapi mana ricuna atiyniyojcunamantamin, manataj Cristomanjinachu. 9 Tucuy Diospa caynin Jesucristopi tiyacun. 10 Kancunataj Cristowan ujchacuspa causay juntꞌa canquichej, mosoj causayniyquichejpaj ni imamanta pisispa. Payka curajmin cashan tucuy mana ricuna camachejcunamanta atiyniyojcunamantapis. 11 Paywan ujchaska canayquichejpajtajmin maucꞌa jucha causayniyquichejmanta tꞌakaskasa carkanquichej. Chay tꞌakacuy mana runaj ruwaskanchu carka. Manachayrí Cristo, atiyninnejta, tꞌakasorkachej chay maucꞌa jucha causayniyquichejmanta. 12 Cristowan cuscataj bautismopi pꞌampaskas carkanquichej. Cristota wañuymanta causarichimoj Diosmin kancunatapis Cristotawan cuscataj mosoj causayman causarichimusorkachej atiyninpi creejtiyquichej. Chay atiywan Dioska Cristota causarichimorka. 13 Ñaupajpiri wañuskajina carkanquichej juchapi sajra munayniyquichejmanjina ima causaspa. Diosrí tucuy juchasniyquichejta perdonaspa mosoj causayta Cristowan kosorkachej. 14 Ñaupajpi camachiskasninta mana casuskanchejraycu Diosman manu carkanchej. Juchasninchejraycu paypa ñaupakenpi ajina riqhurerkanchej. Diosrí Cristoj chacatanapi wañuyninnejta chay manu caskanchejmanta kelkaskata chincachispa perdonawarkanchej. 15 Payka mana ricuna camachejcunamanta atiyniyojcunamantawan tucuy atiynincuta khechorka. Cristotaj wañuyninnejta chay camachejcunata chay atiyniyojcunatawan atipaska caskancuta ricucherka tucuypa ñaupakencupi.
Mosoj camachiskas mosoj causaypaj
16 Chayraycu ni pi kancunata miqhuna ujyana costumbresmanta khawarachunchu. Nitaj jatun pꞌunchaycuna ni mosoj quilla wakaychaycuna ni samacuna pꞌunchaycuna costumbresmantapis kancunata khawarachunchu. 17 Chay imaska llanthupijina camachiskas carka runas Diosmanta yachanancupaj. Cunanrí Cristo jamuskanraycu mosoj causaypaj aswan sutꞌi yachachinayoj canchej. 18 Ni pi kancunata pantachichunchu mayta munaspa llampꞌu sonkoyojjina angelesta yupaychanayquichejta. Chayjinata munaspa runaka mentacun musphaycunamanta. Cay pacha yuyaywantaj yankha jatunchacun. 19 Chayjina runaka umanchej Cristomantapis manaña japꞌicunchu. Umanchej Cristoka tucuy cuerponta uywan ujchantaj sumajta wiñananpaj Diospa munayninmanjina.
20 Cristowan cusca wañuspaka cay pacha mana ricuna atiyniyojcunamanta libraskas carkanquichej. Chanta ¿imaraycutaj cay pacha runasjinalla causashanquichej runacunaj camachiskasnincuta casuspaka? 21 Chay camachiskasnincu nin: Ama chayta japꞌiychu; ama cayta malliychu; ama jakayta llanqhaychu, nispa. 22 Tucuy chay camachiskaska usacuskanpi tucucoj imasllamanta cancu. Chaycunaka runacunaj camachiskancumanjinalla yachachiskancumanjinallataj cancu. 23 Chayjina yachachiskacuna yupaychancu llampꞌu sonkojinalla cuerpota llaquichicuspataj. Yachachinancoka sumaj yuyayllamantaj rijchꞌacun. Astawanpis munaynincumanjina ajllancu imallatapis yupaychanata. Chaywanpis yachachinancoka ni imapi yanapanchu cay pacha sajra munayta atipanapaj.