6
Dioswan cusca llancꞌajcuna caspataj encargayquichej: Cꞌacha yanapayninta ama yankhapaj japꞌiychejchu. 2 Diospa palabranpipis nin:Sumaj tiempopi uyarerkayqui;
Cacharina pꞌunchaypipis yanaparkayqui.
¡Khaway! Cunanmin sumaj tiempoka, cunan pꞌunchaymin juchamanta cacharina pꞌunchayka.
Diospa cachasninmanjina causaymanta
3 Allinta khawacuycu ama pitapis miscꞌachinaycupaj llancꞌayniycuta runas ama khawaranancupaj. 4 Manachayka tucuy imaspi Diospa cachasninpaj rejsichicuspapuni causayta munaycu. Diospi confiacuycupuni llaquiycunapi, muchuycunapi, ñacꞌariycunapipis, 5 sekꞌoskas, carcelpi wiskꞌaskas, ashqha phiñacojcunaj chaupincupipis, saycꞌuchej llancꞌanapi, yarkhaycunapi, tutas mana puñuskapipis. 6 Causashaycu llimphu sonkowan, sumaj yachaywan, unayta runasta muchucuspa, cꞌacha imasta paycunapaj ruwaspataj. Santo Espirituwan pusaskas sumaj sonkowan munacuspa 7 cheka niskanta willaraycu. Tucuy chaypaj Dios atiyninwana callpachawaycu. 8 Sumajpaj khawaskas chayrí chejniskas, chꞌataskas chayrí mentaskas cajtiycupis payka chekan yanapanasta kowaycu. Runas nincu, pantachispa purejcuna chayrí cheka yachachejcunapis caskaycuta. 9 Nincu mana rejsiskas chayrí sumajta rejsiskaspis caskaycuta. Nincu wañuskas caskaycutapis. ¡Khaway causacushaycutaj! Nincu muchuchiskas manataj wañuchiskaschu, 10 phutiskas, chaywanpis cusiskaspunipis caskaycuta. Wajcha runas caspapis ashqhasta khapajyachispa, mana imayoj caspapis tucuy ima capuyniyoj Cristowan ujchaska caycu.
11 Corintopi caj hermanosníy, tucuy chay imasmanta kancunaman munacuywan tucuy sonkowanpis sutꞌita parlayquichej. 12 Ichapis sonkoyquichejpi munacuyniyquichejta nokaycuman michꞌacushanquichej. Nokaycurí mana michꞌacuycuchu munacuyniycutaka. 13 Wawasniytajina nishayquichej quiquillantataj nokaycuta munacunawaycuta.
Diospa yupaychana-wasin canchej
14 Diospi mana japꞌicojcunawan ama cuscachacuychejchu uj manacaj yuntajinaka. Yachanquichej: Chekanta ruwaj mana chekanta ruwajwan mana atinchu ujchaska cayta, nillataj cꞌanchaypis lakhawanka. 15 Cristoka mana atinchu supay Satanaswan uj yuyayniyojlla cayta, ni Diospi japꞌicojpis Diosta khesachajwanka. 16 Diospa yupaychana-wasinpeka ruwaska dioscuna ni jaycꞌaj canmanchu. Causaj Diospa yupaychana-wasinmin canchej. Chaytataj Diospa palabranpi nin:
Paycuna chaupipi causasaj purisajpis;
Diosnincu casaj, paycunataj runasniy cankancu.
17 Chayraycu nin: Llojsiychej, tꞌakacuychej tucuy sajra cajmanta, nispa nin Señor.
Chꞌichi cajta amaña japꞌiychejchu.
Chaymanta noka cusiywan japꞌicapuskayquichej.
18 Kancunapaj Tatayquichej casaj.
Kancunapis wawasniy canquichej, nispa nin tucuyta camachej atiyniyoj Señor.