Diospa runasninpaj tantaska kolkemanta
16
Cunanka parlaskayquichej Diospa runasninpaj kolketa tantanayquichejmanta. Galacia jallpꞌapi tantacoj hermanosman yachacherkaniña cay jawa. Quiquillantataj kancunapis ruwaychej. 2 Sapa Domingo pꞌunchaypi sapa uj kancunamanta kolkenmanta japꞌicuskanmanjina jallchꞌanaman churachun. Chayta wakaychaychej chayamojtiy ama kolketa tantanayquichej cananpaj. 3 Chanta allinpaj khawaska kharista kancunamanta ajllaychej. Chayamuspaña chay kharista cartaswan cachasaj Jerusalén llajtaman. Chay qhuyacuyniyquichejwan tantaska kolketa apankancu. 4 Sitajchus noka rinaypis allillan rijchꞌacunman chayka, nokawan renkancu. 5 Macedonia jallpꞌanejta watucoj risaj, chaypacha kancunajman jamusaj. Macedonianejman rejmin churacushani. 6 Kancunawanrí ashqha pꞌunchaycunata caricusaj chaychus tucuy chiri quillastapis. Ajinapi kancuna yanapawanquichej maymanpis rinay cajtin. 7 Cunanrí manamin pasajjinalla kancunata waturiytachu munani. Señor munajtenka unay pꞌunchaycunata kancunawan caricuytamin munashani. 8 Cunanpajka cay Efeso llajtapi cacuyta yuyani Espíritu pꞌunchaycama. 9 Caypi ashqhasmin Diosmanta uyariyta munashancu. Chayraycu cosa riqhurishan nokapaj Señorpa atiyninwan caypi llancꞌanayka. Chaywanpis ashqha churanacojcunataj jatarishancu.
Timoteo chayajtin yanapanancuta, nin
10 Timoteo chayajtenka sumajta khawaychej kancunawan wasinpijina ama manchachicuspalla cacunanpaj. Paypis nokajinallatajmin Señorpaj llancꞌan. 11 Chayraycu ni pipis payta manacajpaj khawachunchu. Astawanpis payta yanapaychej allillanta cutimunawanpaj, hermanoswan cusca jamunanta suyashaskayraycu.
12 Hermano Apolosmanta parlaspaka ashqhasta payta nerkani kancunajman hermanoswan jamunanta. Cunan jamuytarí ni imaynamanta munarkachu. Astawanpis jamunanpaj allin cajtenka jamonka.
Rijchꞌariskaspuni caychej
13 Rijchꞌariskaspuni caychej. Señorpi japꞌicuspa sumajta sayaychej. Kharijina ruwaychej. Callpachacuychej Señorpi. 14 Tucuy ruwaskayquichej munacuywan cachun.
Sumajpaj khawaychej Señorpi yanapajcunata
15 Hermanosníy, yuyaricuychej Estefanasmanta wasinpi cajcunamantawan. Paycuna Diospi japꞌicuspa ñaupaj pokoyjina Acaya jallpꞌapi hermanosmanta carkancu. Sumajta churacuncu Diospa runasninta yanapanancupaj. 16 Niyquichejtaj cayjina ruwaj runastaka munacuywan casunayquichejta. Tucuy yanapajcunata Señorpaj sinchꞌita llancꞌajcunatapis munacuywan casuychej. 17 Hermanocuna Estefanas, Fortunato, Acaicopis nokaman chayamuskancumanta cusicuni. Kancuna mana caypi cashajtiyquichej paycuna sutiyquichejpi yanapawarkancu. 18 Nokata sonkochawarkancu kancunatapis. Chayraycu sumajpaj japꞌiychej cayjina caj runastaka.
Napaycucuna
19 Napaycamusunquichej Asia jallpꞌapi tiyacoj Diospa ajllacuskasnin. Ashqhata napaycamusunquichej Señorpi hermano Aquila warmin Priscawan wasincupi tantaska hermanospiwanpis. 20 Tucuy hermanos napaycamusunquichej. Kancunapura Señorpi ashqha munacuywan napaycunacuychej.
21 Noka, Pablopis, quiquin maquiywan kelkarispa napaycamushayquichej.
22 Maykenpis Señorta mana munacojtaka Dios payta tucuchichun. ¡Señorninchej jamushanña!
23 Señor Jesuspa cꞌacha yanapaynin kancunawan cachun.
24 Cristo Jesuswan ujchaska tucuy kancunata munacuyquichej. Ajina cachun.