3 Nokapis japꞌiskaytamin kancunaman yachacherkayquichej. Caycunamanta aswan cajcunaka cancu: Diospa palabranmanjina juchanchejraycu Cristo wañuskanmin; 4 pay pꞌampaska carka; palabranmanjina quinsa pꞌunchaypitaj Dios payta causarichimuskan. 5 Pedroman riqhurerka, chaymantataj chay Chunca Iscayniyojman. 6 Khepanpi riqhurerka phishka pachaj curaj tantaska hermanosman. Paycunamanta ashqhasraj causashancu. Waquincunarí wañuypi samacushancuña. 7 Khepanta Jacoboman riqhurerka, chaymantataj tucuy cachasninman.

8 Tucuymanta khepanpitaj nokamanpis riqhuriwarka. Nokaka mana yuyaymanta uskhayta naceskajinamin cani. 9 Nokaka cachasninmanta astawan pisi cajninpaj khawacuni. Manataj cachan canaypajjinachu cani Diospa ajllacuskasninta wañuchiskas canancupaj sinchꞌita khatiycachaskayraycu. 10 Diospa cꞌacha yanapayninnejtarí cachan cani. Chay cꞌacha yanapaynenka nitaj khasillachu nokapaj carka. Manachayka tucuy cachasninmanta astawan sinchꞌita llancꞌarkani. Chaytarí mana nokachu, astawanpis cꞌacha Dios nokawan ruwarka. 11 Chayraycu noka chayrí paycunapis, quiquin sumaj willanasllatapuni willarashaycu. Chaytataj japꞌicorkanquichej.

12 Willaraskaycoka Cristo wañuymanta causarimuskanmin. Chanta ¿imaynatataj waquin kancunamanta nishanquichej wañuymanta causarimuy mana caskanta? 13 Manachus wañuymanta causarimuy tiyan chayka, ni Cristo quiquinpis causarimorkachu. 14 Sichus Cristo mana causarimorkachu chayka, willaraskaycu willanaska yankhamin, yankhatataj Diospi japꞌicorkanquichej. 15 Chaywanpis ajina cajtenka Diosmanta llulla willajcuna riqhuriycu. Ajinapeka Diospa contranpi willarkaycu, pay Cristota causarichimuskanta willaspaka. Payrí mana Cristota causarichimorkachu sichus ni jaycꞌaj wañuskacuna causarimuncuchu chayka. 16 Sitajchus wañuskacuna mana causarimuncuchu chayka, ni Cristo quiquinpis causarimorkachu. 17 Sitajchus Cristo mana causarimorkachu chayka, Diospi japꞌicuskayquichejka yankhalla, juchasnillayquichejpirajtaj cashanquichej. 18 Chaymanjinaka Cristopi japꞌicuspa wañuska hermanosniyquichejpis wiñaypaj chincaskas cancu. 19 Sichus Cristopi confiacushanchej cay pacha causayllapaj chayka, tucuy runasmanta aswan phutiy wajchas canchej.

20 Astawanpis chekatapuni Cristoka wañuymanta causarimorka. Payka wañuskacuna causarimunancumanta ñaupaj pokoyjinamin. 21 Imaynatachus uj runanejta wañuyka cay pachaman chayamorka, ajinallatataj wañuymanta causarimuyka uj runanejta tiyan. 22 Imaynatachus Adanwan cuscachacuspa tucuy wañuncu, ajinallatataj Cristowan tucuy cuscachacojcunatapis Dios causarichimonka. 23 Sapa uj caskanmanjina causarimonka. Cristo ñaupajta causarimorka. Chaymantataj pay cutimojtin paypata cajcuna causarimonkancu. 24 Chaymanta canka tucuchacuyka. Chaypacha tucuy camachejcunata tucuy atiyniyojcunatapis atipaspa paycunamanta Dios tucuy atiynincuta khechonka. Tucuy atipaska cajtintaj Cristoka camachinanpaj atiyninta Dios Tatanman jaywanka. 25 Cristoka camachinanmin tiyan enemigosninta Dios kꞌalata tucuchinancama. 26 Chaycunamanta khepa tucuchiska cajka wañuymin. 27 Palabranpi nin: Dios tucuy imata Cristoj atiynin uraman churarka. Tucuy imata nispaka sutꞌi cashan atipaj Dioska mana atipaskachu caskanta. 28 Paymin tucuy imata Cristoj atiynin uraman churarka. Chayraycu tucuy kꞌala atipaska cajtintaj Wawan Cristopis pay quiquin Diospa atiynin uraman churaconka. Ajinata churaconka Dios tucuy atiyniyoj tucuy imapi tucuypaj cananpaj.

29 Causarimuymanta, mana ajina cajtenka wañuskacunapaj bautismo khasilla cashan. Sichus ni jaycꞌaj wañuskacuna causarimuncuchu chayka ¿imaraycupunitaj paycunapaj bautizacuncu?

30 Astawanpis ¿manachu nokaycupis mana yuyayniyoj runasjina riqhuriycu wañuy patapi tucuy ratupi causaspaka? 31 Hermanosníy, sapa pꞌunchay wañuspajinani. Señorninchej Cristo Jesuswan ujchacuspa chayta chekata niyquichej cusiyniycu caskayquichejraycu. 32 Cristoj sumaj willanasninraycu makanacorkani cay Efeso llajtapi leonjina sajra runaswan. Chaytataj runaj yuyaynillanwan ruwayman chayka, ni ima allinpis nokapaj canmanchu. Sichus ni jaycꞌaj wañuskacuna causarimuncuchu chayka: Miqhunachej, ujyanachej, kꞌayamin wañusun, nincujina.

33 Amaña pantachicuychejchu. Sumaj runaka sajra runaswan purispaka sajramanmin tucun. 34 Rijchꞌaricuychej cheka yuyayman. Amaña juchallicuychejchu. Waquin kancunamanta manarajmin Diosta rejsincuchu. Chaytaka pꞌenkayniyquichejpaj nini.

35 Ichapis pipis cayjinata tapunman: ¿Imaynatataj wañuskacuna causarimuncu? ¿Imayna cuerpowantaj cutimonkancu? 36 ¡Mana yuyayniyoj runa! Tarpuskayqui mujuchus mana wañun chayka, mana llojsimunchu. 37 Tarpunqui kꞌala mujuta, trigotapis chayrí waj mujutapis. Manataj kꞌala mujuchu llojsimun manachayrí yura. 38 Diosmin chay mujuman cuerpota kon munayninmanjina. Sapa laya mujumantaj cuerpota kon caskanmanjina. 39 Tucuy aychapis manallataj quiquinchu. Astawanpis runa aychaka waj laya, uywa aychaka waj laya, pꞌisko aychaka waj laya, challwa aychapis waj laya cancu. 40 Ajinallataj janaj pacha imas tiyan. Cay pacha imaspis tiyallantaj. Astawanpis janaj pacha imaska waj laya lliphipiyniyoj cancu cay pacha imasmanta niskaka. 41 Inteka waj laya lliphipiyniyoj. Quillapis waj laya lliphipiyniyoj. Chꞌascaspis waj laya lliphipiyniyoj. Uj chꞌascapis waj layata cꞌanchan ujmantaka.

42 Ajinamin wañuymanta causarimuyka: Mujujina tarpucun uj ismoj imalla. Diostaj jatarichimun ni jaycꞌaj ismoj cajta. 43 Tarpucun pisipaj khawaska. Diostaj jatarichin lliphipejta. Tarpucun pisi callpayoj. Diostaj jatarichin atiyniyojta. 44 Tarpucun aycha cuerpo. Diostaj espíritu cuerpota jatarichin. Sichus aycha cuerpo tiyan chayka, callantaj espíritu cuerpopis.

45 Ajinata Diospa palabranpipis nin: Ñaupaj runa, Adanta, Dios ruwarka causashaj runata. Khepa caj Adantaj, Cristo, causayta koj espiritumin. 46 Astawanpís manamin espirituchu ñaupaj carka, manachayrí aycha cuerpo, chaymantaraj espíritu cajka. 47 Ñaupaj runaka jallpꞌamanta ruwaskamin. Iscay caj runa Cristotaj janaj pachamanta, Señormin. 48 Imaynachus jallpꞌamanta ruwaska ñaupaj runaj cuerponka, ajina cuerpoyojllataj cancu cay pacha runaspis. Imayna cuerpoyojchus janaj pacha runaka ajina cuerpoyojllataj cankancu janaj pacha llajtayojcunapis. 49 Imaynachus jallpꞌamanta ruwaska runaman rijchꞌacunchej, ajinallataj janaj pacha runaman rijchꞌacusunchej.

50 Hermanosníy, caytamin niyquichej: Aychamanta yawarmanta cuerpoka mana Dioswan causanmanchu.^a Nitaj ismoj cuerpopis janaj pachapi wiñaypaj causanmanchu. 51 Uyariwaychejmá sutꞌinchayquichej uj pacaska imata: Mana tucuychu nokanchejmanta wañuypi samacusun. Astawanrí tucuymin ujjinaman cutichiskas casunchej, 52 uj ratitupi, uj ñawi chꞌillmiypi khepa corneta wakaypi. Chaypacha wañuskacunataj causarimonkancu ni jaycꞌaj ismoj cuerposwan. Nokanchejtaj ujjinaman cutichiskas casunchej. 53 Cay ismoj cuerpoka pꞌachallicunan tiyan ni jaycꞌaj ismojwan. Cay wañoj cuerpotaj pꞌachallicunan tiyan ni jaycꞌaj wañojwan.

54 Cay ismoj cuerpo ni jaycꞌaj ismojwan pꞌachallicojtin, cay wañoj cuerpo ni jaycꞌaj wañojwan pꞌachallicojtintajka chantaña juntꞌaconka Diospa palabranka:

58 Chayraycu, munaska hermanosníy, sumajta sayaychej, mana cuyurej rumijina. Señorpa ruwayninpi may ashqhata llancꞌallaychejpuni. Yachaychejtaj sinchꞌi llancꞌashaskayquichejka mana khasichu Señorpi caskanta.