11
Nokajina ruwajcuna caychej, imaynatachus Cristojina ruwashani, ajinata.
Corinto iglesiapi imaynachus warmis canancu
2 Cusiska cani mentayquichejtaj yuyaricuwaskayquichejraycu, jaywasuskay yachachinasniyta sumajta japꞌispa. 3 Cayta yachanayquichejta munani: Umaka cuerpomanta curaj caspa camachin. Ajinamin Cristopis curaj tucuy runasmanta. Cunan tucuy kharej umanka Cristomin; warmej umantaj kosan; Cristoj umantaj Dios. 4 Sapa uj khari Diosmanta mañacuspa chayrí willaraspapis umanta khatacuspaka umanta pꞌenkayman churan. 5 Sapa uj warmichus Diosmanta mañacuspa chayrí willaraspapis umanta mana khatacuspaka umanta pꞌenkayman churan. Chujchan kꞌala cꞌutuskawan ninacun. 6 Sichus mana umanta khatacun chayka, chujchanta cꞌutucuchun. Sichus Corinto runas chaupipi warmi chujchanta cꞌutucunan pꞌenkay canman chayka, warmeka umanta khatacuchunpuni. 7 Khareka ama umanta khatacunanchu Diospa atiyninta rijchꞌacuynintawan ricuchiskanraycu. Warmirí kharej atiyninta ricuchin kharimanta Dios ruwaskanraycu. 8 Mana kharichu warmimanta ruwaska carka. Manachayrí warmi kharimanta ruwaska carka. 9 Khareka mana warmej allinninpajchu ruwaska carka. Manachayrí warmi kharej allinninpaj ruwaska carka. 10 Chayraycu warmeka ricuchinan tiyan kosanpa atiyninpi caskanta angelespa ñaupakencupi caskanraycutaj. 11 Mosoj causayniyquichejpirí warmipis kharipis quiquinta ruwancu cusca Señorpaj. 12 Warmi kharimanta ruwaska cashajtinpis, cunanka khari warmimanta nacecun. Tucuy imastaj Diosmantamin.
13 Sumajta reparaspa kancuna uqhu cay imasmanta yuyaychej. ¿Allinchu warmi umanta mana khatacuspa Diosmanta mañacunan? 14 Cay pachapi causayniyquichej cayta yachachin: Khareka warmijina chujchayoj pꞌenkaymin. 15 Warmipajrí chujcha wiñachicuyka allillanmin, cusiytaj paypajka. Chujchaka uj khatanajina payman koskamin. 16 Maykenpis cay jawa astawan churanacuyta munan chayka, nokaycoka cayllata niycu: Cayjinata ruwaycu. Diospa ajllacuskacunanpis ajinata ruwancu tucuynejpi.
Diospa ajllacuskasnin uqhupi pantaskasmanta
17 Cunan cayta encargaspaka mana mentayquichejmanchu. Tantacuspaka manamin wiñachicunayquichejpajchu ruwashanquichej manachayka Diosmanta aswan carunchacunapaj. 18 Ñaupajta uyarishani tantacojtiyquichej kancuna chaupipi tꞌakanacuycuna caskanta. Creeyman ajina caskantaka. 19 Kancuna chaupipi tꞌakanacuycunaka cananpuni tiyan. Chaywan ricuchiconka cheka hermanoschus chayrí mana chekachus caskancuta. 20 Ajinallataj Señormanta yuyaricuspa miqhunapajka mana chaypajjinachu kancunaka tantacushanquichej. 21 Sapa ujmin miqhunanta apacamuspa mana hermanosninta suyaspalla miqhun. Ujri yarkhayniyoj cacushan. Wajri machaska cashan. 22 Mana wasiyojman rijchꞌacunquichej chayllapi miqhunayquichejpaj ujyanayquichejpajpis. ¿Chayrí pisipajchu khawanquichej Señorpa sutinpi tantacuyta? ¿Mana imayojtachu pꞌenkachinquichej? ¿Imatataj niskayquichejrí? ¿Mentaskayquichejchu? Caypeka mana mentayquichejchu.
Señorpa mesanpi miqhunaj ninayaskan
23 Caytaka noka quiquiymin Señormanta japꞌerkani. Caytataj kancunaman jaywarkayquichej. Señor Jesusta jaywaycunan, chay tuta maquisninwan tꞌantata japꞌerka. 24 Graciasta kospataj tꞌantata parterka. Nerkataj: “Cayka cuerpoywan ninacun, kancunaraycu koska. Cayta ruwaychej, miqhuspa nokamanta yuyaricunawayquichejpaj”, nispa. 25 Miqhuskancumanta quiquillantataj copawan ruwaspa nerka: “Cay copaka Diospa mosoj tratonmin. Yawarniyka traton atiyniyoj cananpaj jichꞌaskamin. Cayta ruwaychej, sapa cuti ujyaspa wañuyniymanta yuyaricunawayquichejpaj”, nispa. 26 Chayraycu sapa cuti cay tꞌantata miqhuspa cay copata ujyaspaka Señor nokanchejraycu wañuskanta ricuchinquichej. Cayta ruwanquichej pay jamunancama.
Sapa uj yuyanan tiyan cay miqhunaj ninayaskanpi
27 Ajinaka cay tꞌantata miqhunachej Señorpa copantapis ujyanachej paypa yachachiskanmanjina. Sichus maykenpis mana paypa ninayaskanmanjina ruwan chayka, Señorpa cuerponpa yawarninpapiwan contranta juchallicun. 28 Chayraycu uj runa sumajta khawacuchun pay quiquinpa sonkonta. Ajinata ruwaspalla cay tꞌantamanta miqhuchun cay copamantapis ujyachun. 29 Cay tꞌanta copapiwanka Señor nokanchejraycu wañuskantamin ricuchin. Runaka chaypi mana sumajta yuyaspa miqhun chayka, pay quiquinta juchachacun. 30 Chayraycu kancuna uqhupi ashqha onkoskas ashqhastaj pisi callpayojcuna cancu. Waquintaj wañuporkancu. 31 Sichus nokanchej quiquin sonkonchejta chekanta khawacusunman chayka, mana juchachaskachu cashasunman carka. 32 Astawanpis Señor nokanchejta wanachispa wawasnintajina yachachiwanchej. Cayta ruwan juicio pꞌunchaypi ama cay pacha runaswan juchachaskas cananchejpaj.