Ñaupa tatasninchejka uj yachachina
10
[Uj runaka atinmanmin khesachaska cayta.]a Chayraycu yuyarichishayquichej ñaupa tatasninchejmanta. Egipto jallpꞌamanta llojsimuspaka tucuynincu phuyu urata rerkancu. Tucuynincutaj kochata chꞌaquita chimparkancu Dios paycunata atiyninwan pusaskanraycu. 2 Uj bautismopijina phuyunejta kochanejtawan tucuynincu Moiseswan cuscachacorkancu. Chaywan Moisesta pusajnincupaj japꞌerkancu. 3 Tucuynincutaj Diosmanta koska uj quiquin miqhunata miqhorkancu. 4 Tucuynincutaj Diosmanta koska uj quiquin ujyanata ujyarkancu. Chay ujyanataj kakamanta llojsimusharka. Chay kakarí Cristo carka. Paytaj paycunawan risharka. 5 Astawanpis tucuy cay jatun ruwaskasmantapis, ancha ashqhas paycunamanta Diosta mana cusicherkancuchu. Diostaj paycunata khesacharka. Chayraycu wañuskas khepacaporkancu chꞌin pampapi.6 Tucuy chay ruwacuskaska nokanchejpaj uj ricuchina cancu. Yachachiwanchejtaj ama paycunajina sajra imasta munajcuna cananchejta. 7 Amaña waj dioscunata yupaychaychejchu paycunamanta waquinjinaka. Paycunamanta kelkaska ajina cashan: “Chay runaska ruwaska diosman jaywaskata miqhoj ujyaj tiyaycucorkancu. Tusojtaj jatarerkancu”. 8 Amaña khenchachacuychejchu paycunamanta waquin khenchachacorkancujinaka. Uj pꞌunchayllapitaj iscay chunca quinsayoj waranka runas wañurarkancu. 9 Amaña Diospa qhuyacuyninta saycꞌuchiychejchu paycunamanta waquin ruwarkancujinaka. Ujmanta ujtaj cataris paycunata wañuracherkancu. 10 Amañataj Diospa contrantaka thutuychejchu paycunamanta waquin thutorkancujinaka. Paycuna wañurachiskas carkancu wañuchej angelnejta.
11 Tucuy chay imaska ñaupa tatasninchejwan ruwacusharka nokanchejpaj uj ricuchina cananpaj. Tucuy pꞌunchaycunaj juntꞌacunan pꞌunchaymanña kayllashanchej. Chayraycu chay imas kelkaska carka yachachinawanchejpaj.
Dioska cꞌachamin
12 Ajinaka allinta sayashaskanta yuyajka khawacuchun juchaman ama urmananpaj. 13 Juchaman urmachejka ni uj ima mana runaj muchunanka kancunata japꞌisorkachejchu. Diosrí niskanta juntꞌanpuni. Payka mana sakesonkachejchu muchuyta atinayquichejmanta astawan muchojtaka. Manachayrí urmachej imapi ricucojtiyquichejka ñantajina ruwapusonkachej imaynatapis chaynejta llojsinayquichejpaj. Ajinapimin urmachejtaka atipanquichej mana juchallispalla.
Aykecuychej waj dioscunata yupaychaymanta
14 Chayraycu, munacuskasníy, carunchacapuychej waj dioscunata yupaychanamanta. 15 Yuyayniyojcunamanjina parlani. Niskasniyta uyarispa yuyaskayquichejmanjina ruwaychej. 16 Diosman tꞌakaska copata japꞌispa payman graciasta konchej. Cay copata ujyaspataj Cristoj yawarninnejta ujchacunchej. Tꞌantata cusca partispataj Cristoj cuerponnejta ujchacunchej. 17 Uj tꞌantamanta tucuy miqhunchej. Miqhuspataj uj cuerpolla Cristowan ruwacunchej sapa ujpis uj tꞌantallamanta japꞌiskanchejraycu.
18 Khawaychej israel runasta. Diosman jaywaska miqhunata miqhojcuna ciertota Dioswan ujchacuncu paycunapurapis. 19 Chaywanka mana nishanichu ruwaska dioscunaman jaywana caskantaka. Nitaj nishanichu ruwaska dioscunaka causashaskantapis. 20 Astawanrí mana Diosta rejsejcunaka supaycunaman jaywancu manataj Diosmanchu. Manataj munanichu kancuna supaycunawan ujchacunayquichejtaka. 21 Mana atinquichejchu Señorpa copanmantataj supaycunaj copanmantataj ujyaytaka. Nitaj atinquichejchu cusca yupaychayta miqhuspa Señorpa mesanpitaj supaycunaj mesancupitajka. 22 Chayrí ¿Diostachu phiñachiyta munanquichej? Yachanchejjina nokanchejka paymanta mana aswan atiyniyojchu canchej.
Sapa uj mascꞌachun wajpa allinninta
23 Watejmanta nini, aticun tucuy ima ruwaypis. Astawanrí manamin tucuychu allinpaj. Aticun tucuy ima ruwaypis. Astawanrí manamin chay tucuy ruwaskanchejka hermanosta wiñachinchu. 24 Ama pipis paypa quiquin allinninta mascꞌachunchu, astawanka runa-masinpa allinninta.
25 Corinto recobaspi jaywaska miqhunas ranticunapaj tiyan. Chaycunata rantispa miqhullaychej. Sonko-yuyayniyquichejraycurí ama chaymanta tapuychejchu. 26 Yachanchej tucuy jallpꞌaka tucuy jallpꞌapi cajpis Señorpatamin, paymantataj tucuy miqhunatapis japꞌinchej. 27 Sichus Diosta mana japꞌicoj runa miqhunapaj wajyasunquichejman chayka, munaspa rillaychej. Imatapis kancunaman kosuskayquichejtatajka miqhuychej, ama tapuspa sonko-yuyayniyquichejraycu. 28 Astawanrí miqhushajcunamanta uj runa willasunquichejman: “Cay miqhunaka cay pacha atiyniyoj imasman jaywaskamanta”, nispa. Ajinata uyarispaka ama miqhuychejchu willajpa allinninraycu sonko-yuyayraycupis. 29 Mana kanpa sonko-yuyayniyquimantachu parlani, manachayrí willajpamanta. Sichus paypa sonko-yuyayninta nanachiyman chayka, yankhamin cashan nokapaj tucuyta munaskaymanjina ruwanayka. 30 Cay miqhunamanta noka Diosman graciasta koshani. Willawajpajrí cayka sajra rimaskasman rijchꞌacun. Chaywanka paypa pisi callpayoj sonko-yuyayninta nanachishani.
Tucuy imata ruwaychej Diosta jatunchanayquichejpaj
31 Chayraycu miqhunquichejpis ujyanquichejpis chayka, tucuyta ruwaychej Diosta jatunchanayquichejpaj. 32 Ajinaka ama urmachejka caychejchu ni israelcunapaj ni waj llajtayojcunapaj nitaj Diospa ajllacuskasninpajpis.b 33 Noka quiquiytaj causashani tucuypi tucuyta yanapanaypaj. Manamin nokaj allinnillaytachu mascꞌani manachayrí tucuypa allinnincuta, runasta pusamuyta Cristota rejsinancupaj.