Mosoj causayniyquichejpi wiñachinacuychej
15
Nokanchej sumajta Diospi japꞌicojcunaka pisi japꞌicuyniyoj hermanospa iscayrayaynincuta muchucunanchej tiyan yanapaspa. Amataj yuyaskasninchejmanjina ruwaspa nokallanchejtaka cusichicunanchejchu. 2 Astawanpis sapa ujninchej runa-masinchejta cusichinanchej tiyan allinninpaj payta wiñachinanchejpaj. 3 Cristopis manamin payllatachu cusichicorka. Diospa palabran causayninpi juntꞌacorka: “Cꞌamisojcunaj cꞌamisuskancuta noka muchorkani”, nispa. 4 Imapis ñaupa tiempospi kelkaska cajka yachachinawanchejpaj kelkaska carka. Ajinapi sinchꞌita sayanchej Dios niskanta juntꞌananta suyaspa, palabranwanpis sonkochacuspa. 5 Dioska llaquiyta muchuypi callpachaj sonkochajtaj. Paymantataj mañacuni uj yuyayniyojlla canayquichejpaj Cristo Jesuspa yachachiskanmanjina. 6 Ajinapi uj sonkolla uj simillataj Señorninchej Jesucristoj Diosnin Tatanta yupaychanquichej.Dios qhuyacuyninta tucuyman ricuchin
7 Chayraycu kancunapura mana khawaranacuspa ujpis ujpis munacuywan japꞌinacuychej. Imaynachus Cristopis kancunata japꞌisorkachej Diosta jatunchananpaj, ajinata ruwaychej. 8 Chayta niyquichejmin: Cristoka jamorka israelcunata yanapananpaj. Paynejta Dios niskasninta ñaupa tatasniycuman juntꞌarka cheka caskanta ricuchinanpaj. 9 Cristonejta yanapaspataj Dioska waj llajtayojcunamanpis qhuyacuyninta ricucherka paycunapis payta jatunchanancupaj. Palabranpi ninjina:
Qhuyacuyniyquiraycu kanmanta willasaj waj llajtayojcuna chaupipi.
Sutiyquitataj taquinaswan yupaychasaj, nispa.
10 Ujtawan nin:
Waj llajtayojcuna cusicuychej paypa runasninwan cusca.
11 Waj llajtayojcunaman nin:
Tucuy kancuna Señorta jatunchaychej.
Tucuy runastaj payta yupaychachuncu, nispa.
12 Ujtawanpis unay willajnin Isaías nillantaj:
Isaipa ayllunmanta Camachejka jamonka waj llaytayojcunata camachinanpaj.
Waj llajtayojcunataj juchancumanta cachariskas canancupaj paypi confiaconkancu.
13 Dioska paypi confiacuyta yachachiwajninchejmin. Chayraycu munani tucuy cusiywan juntꞌa payman allinyaskastaj canayquichejta paypi japꞌicuskayquichejraycu. Ajinapi Santo Espíritoj atiyninwan astawan astawan confiacullanquichejpuni Dioska niskanta juntꞌananta.
Pabloka Cristoj cachanmin waj llajtayojcunapaj
14 Hermanosníy, noka seguro cani kancunaka cꞌacha sonkoyoj caskayquichejmanta. Imaymana yachaywan juntꞌa canquichej purajmanta yuyaychanacunayquichejpajpis waquichiskas. 15 Chaywanpis yuyarichinaypaj waquin imasmanta mana pꞌenkacuspa kelkamorkayquichej cꞌacha Dios yanapawaskanmanjina. 16 Chaymanjinataj Cristo Jesuspa camachin cani Diospa sumaj willanasninta waj llajtayojcunaman willaranaypaj. Ajinapi paycuna Santo Espiritunejta payman tꞌakaska llimphuchaskataj uj jaywanajina cankancu. Chaymin Diosta cusichin.
17 Chayraycu Cristo Jesuswan ujchaska caspa Diospaj ruwanaypi cusicuni. 18 Manamin waj runamantachu parlashani. Astawanrí Cristo nokanejta ruwaskanmanta parlashani. Niskaypi ruwaskaypipis pay callpachawarka waj llajtayojcuna payta casunancupaj. 19 Cristoj atiyninta ricuchinaypaj jatuchej tꞌucuna ruwanaswan willararkani Santo Espíritoj atiyninwan. Ajinamanta Jerusalenmantapacha tucuynejpi Ilírico jallpꞌacama Cristoj sumaj willanasninta willarayta juntꞌarkani. 20 Maytapuni willarayta munarkani manaraj Cristomanta uyarejcunaman, ama wajpa kallariskanman yaycunaypaj. 21 Astawanka Diospa palabranmanjina ruwayta munani. Nin:
Mana willaska cajcuna payta rejsenkancu.
Mana uyarejcunataj paymanta entiendenkancu, nispa.
Pablo Romaman watucoj riyta yuyan
22 Chay willaranayta juntꞌanayraycumin kancunata watucunaymanta ashqha cuti jarcꞌaska carkani. 23 Cunanrí cay jallpꞌaspi chay ruwanaypaj manaña campo canchu. Unay watasmantapacha kancunatataj watucuyta mayta munashani. 24 Chayraycu Españaman rejjina kancunata watucuyta yuyani rishaspa. Kancunawan cusiricuskaymantañari jakayman rinaypaj yanapawanquichejpis. 25 Cunanka Jerusalén llajtaman rishani Diosman tꞌakaska runasninpaj yanapa kolketa apaspa. 26 Macedoniapi Acayapi caj hermanosmin yuyarkancu Jerusalenpi pisichicoj hermanosta yanapayta. 27 Hermanosnincuman cuscachacuspa pisichicuynincupi yanapaytaka sumajtamin yuyarkancu paycunaman manu caskancuraycu. Israelcunamanta Cristopi japꞌicojcuna ñaupajta sumaj willanasta waj llajtayojcunaman willarkancu. Paycunapis Cristopi japꞌicoj israelcunataka pisichicuskancupi yanapanancupuni. 28 Chayraycu cayta juntꞌaspa munacuywan koskancuta paycunaman jaywamuskaymantaña, Españaman kancunajnejta risaj. 29 Yachani jamuspaka mosoj causaypaj Cristoj ashqha yuyanasninwan kancunata sonkochanaypaj chayamunayta.
Pablopaj Diosmanta mañapunancu
30 Hermanosníy, Señorninchej Jesucristoraycu, Santo Espíritoj kowaskanchej munacuyninraycupis mayta nicuyquichej: Cusca nokawan sinchꞌita Diosmanta mañapuwaychej 31 Judea jallpꞌapi Diosta mana casoj israelcunamanta libraska canaypaj. Mañapullawaychejtaj Jerusalenpipis yanapa kolke apaskayta hermanos cusiywan japꞌinancupaj. 32 Ajinapimin Diospa munayninnejta cusiywan kancunaman chayamuspa cusca sonkochanacusunchej. 33 Allinyachej Diostaj tucuy kancunawan cachun. Ajina cachun.