Hermanoyquita ama khawaraychu
14
Pisitaraj Diospi japꞌicoj hermanota allinta japꞌiychej. Amataj yuyaskasninmanta churanacuy cachunchu. 2 Uj hermanoka yuyan tucuy laya miqhuna allin caskanta miqhunanpaj. Ujtaj, pisitaraj Diospi japꞌicuspa, aychata mana miqhunchu. 3 Chay tucuy layata miqhojka ama pisipaj khawachunchu mana aychata miqhojta. Mana aychata miqhojpis ama khawarachunchu tucuy layata miqhojta. Paytapis Diosmin wajyarka. 4 ¿Pitaj kan canqui wajpa uywaskanta khawaranayquipajrí? Quiquin Señorninpa ñaupakenpi sayan chayrí urmanpis. Arí, sayanka, Señor payta sayachiyta atiskanraycu.5 Chaywanpis uj hermano yuyan uj pꞌunchay aswan sumaj caskanta waj pꞌunchaycunamanta. Ujtaj yuyan tucuy pꞌunchaycuna Diosman tꞌakaskas caskanta. Chayjina imasmantaka sapa uj yuyayninpi allin sayaska cachun. 6 Jatun pꞌunchaypaj khawajka ajinata khawan Señorta jatunchananpaj. Mana jatunpaj khawajpis ajinata ruwan Señorta jatunchananpaj. Tucuy imata miqhojpis miqhun Señorta jatunchananpaj, Diosman graciasta koskanraycu. Aychata mana miqhojpis Señorta jatunchananpaj aychata mana miqhunchu. Paypis Diosman graciasta kon.
7 Nokanchejmanta manamin pipis payllapaj causanchu nitaj payllapaj wañunchu. 8 Sichus causanchej chayka, Señorta jatunchananchejpaj causanchej. Sitajchus wañunchej chayka, Señorta jatunchananchejpaj wañunchej. Ajinapi causasunmanpis chayrí wañusunmanpis Señorman tꞌakaska runasnin canchej. 9 Chaypajmin Cristo wañorka causarimorkataj camachinawanchejpaj wañuskacunatapis causashajcunatapis.
10 Kan ¿imaraycutaj hermanoyquita khawaranquirí? ¿Imaraycutaj hermanoyquita pisipaj khawanquirí? Jakay jamoj juicio pꞌunchaypi Diospa ñaupakenpi tucuy riqhurinanchej tiyan. 11 Palabranpi Señor cayta nin:
Noka causaj cani.
Ñaupakeypitaj tucuy runa konkoriconka.
Tucuy simitaj Dios caskayta willaconka.
12 Ajinaka sapa uj nokanchejmanta Diosman ruwaskasninmanta cuentata konka.
Hermanoyquita ama urmachiychu
13 Chayraycu amaña nokanchejpura khawaranacunachu. Astawanrí caymanta allinta khawacuychej: Ama pipis urmachina imawan hermanonta juchallichichunchu. 14 Señor Jesuswan ujchaska caspa chekata yachani ni imapis payllamanta mana allinpaj khawanapaj caskantaka. Uj ima mana allinpaj khawanapaj caskanta yuyajllapaj ajina cashan. 15 Sitajchus kan miqhuna jawa hermanoyquita phutichiwaj chayka, manamin munacuymanjinachu purishanqui. Paypajpis Cristo wañorka. Chayraycu ama miqhuskayquiwan payta chincachiychu. 16 Kancunapaj chay allin cajka ama sajrata parlanancupajchu cachun. 17 Manamin miqhunachu nitaj ujyanachu ricuchin Dios causayninchejta camachiskantaka. Astawanpis causanchej chekanta ruwaspa, nokanchejpura allinpi cacuspa, cusicuspataj Santo Espiritunejta. 18 Ajinata Cristota casuspamin Diosta cusichinchej runaspis allinpaj khawawanchej.
Hermanoyquita mosoj causayninpi tucuy atiskayquiwan yanapay
19 Chayraycu allillanpi cacuyta mosoj causaypi wiñachinacuytawan tucuy atiskanchejwan mascꞌanachej. 20 Chay mosoj causayka Diospa ruwaskanmin. Chayta ama tucuchiychu miqhunaraycoka. Chekatapuni tucuy miqhunaka allinmin. Astawanrí mana allinchu runapaj miqhuskanwan urmananka. 21 Allinmin mana aychata miqhuyka nitaj vinota ujyayka nitaj mayken urmachej imata ruwaypis. Imachá hermanoyquita juchallichinman chayrí Diospi japꞌicuyninpi pisiyachinman, chayta ama ruwaychu. 22 Sumajta Diospi japꞌicuspa chay japꞌicuyniyquimanjina Diospa ñaupakenpi causacuy. Cusiska canqui ruwaskasniyquipi mana iscayrayaspaka sonkoyqui mana juchachasuskanraycu. 23 Astawanpis iscayrayaspa miqhojka juchachacun mana Diospi japꞌicuspa miqhuskanraycu. Tucuy mana Diospi japꞌicuymanta ruwaskaka juchamin.