Israelcunamanta puchojta Dios ajllan
11
Cunanka ¿Dios runasninta khesachaporkapunichu? ¡Ni imaynamanta! Nokapis israel runamin cani, Abrahampa mirayninmanta, Benjamín ayllumantapis. 2 Manaraj cay pachata ruwashaspa Dioska yuyarka runasninta wajyayta. Paycunataka mana tucuytachu khesacharka. Yachanquichejchá kelkaskata. Unay willajnin Eliaska israelcunaj contranta rimaspa Diosman nin: 3 “Señorníy, willajcunayquita wañucherkancuña, yupaychanasniyquitapis urmacherkancuña. Noka sapallayña khepani. Wañuchiwaytataj munancu”, nispa. 4 Astawanpis Dioska Eliasman cuticherka: “Kanchis waranka kharis khepapuwancuraj nokata yupaychanawancupaj. Paycunaka Baal sutichaska ruwaska diosman ni jaycꞌaj konkoricorkancuchu”, nispa. 5 Ajinallataj cunan pꞌunchaycunapi cashan. Israelcunamanta puchojta Dios cꞌacha yanapayninmanjina ajllacun. 6 Sitajchus cꞌacha yanapayninnejta runasta ajllacun chayka, manaña ruwaskasnincunejtachu. Mana ajina cajtinri cꞌacha yanapaynenka mana khasillamantachu canman.7 Chayraycu ajina cashan: Israelcunaka mascꞌaskancuta mana tarerkancuchu. Paycunamanta chay pisi puchojtarí Dios ajllarka chekan cayta tarinancupaj. Ashqhastaj rumi sonkos tucorkancu. 8 Palabranpi ninjina: “Mana casuskancuraycu sumaj willanaspaj sonkoncuta Dioska tunuyacherka. Ajinapi ñawisnincuwan mana ricuyta atincuchu. Ningrisnincuwantaj mana uyariyta atincuchu cunancama”. 9 Diospa palabranpi Davidpis nillantaj:
Fiestancu paycunata urmachichun, chꞌipajina japꞌiycuchun.
Miscꞌanataj cachun mana casuskancumanjina muchunancupaj.
10 Ñawisnincu lakhayachun ama ricunancupaj.
Llasa juchancu wasancuta cꞌumuycuchichunpuni.
[Ajinata nin Moisespa camachiskasnillanpi confiacapuskancuraycu.]a
Israelcunaj Diosman cutiricunancumanta
11 Cunanka ¿israelcuna pantaynincuwan wiñaypajpunichu urmaporkancu? ¡Ni imaynamanta! Astawanrí pantaynincunejta waj llajtayojcuna wiñay causaypaj cachariskas cankancu cusiconkancutaj Cristowan ujchaska. Ajinapi israelcunata chay cusiyka envidiachinman Diosman cutirinancupaj. 12 Paycunaj pantaynincunejta runas tucuy cay pachapi sumaj willanasmanta cusicuncu. Israelcunaj atipachicuynincuwanchus waj llajtayojcuna cusicuncu chayka, may cusiy canka israel aylluntin cutirejtin.
13 Cunanka kancuna waj llajtayojcunaman niyquichej: Kancunapaj Cristoj cachan cani. Cay ruwayniyta sumajpaj khawani. 14 Cay ruwaynejta imaynallamantapis israel hermanosniyta envidiachiyta munani waquenka Cristopi japꞌicunancupaj. 15 Paycunaj carunchacuynincuwan cay pacha runas Diosman allinyachiskas cancu. Ajinallataj israelcunaj Diospa camachiyninman yaycuskancoka wañuymanta causarimuy canka. 16 Ñaupa tatasniycuchus Diosman tꞌakaska cancu chayka, tucuy israel ayllupis quiquillantaj canka. Sumaj saphiyoj sachꞌaka sumaj ramasniyojllatajmin.
Olivo sachꞌamanta quiquinchana
17 Quiquinchanapaj nisun israelcuna uj olivo sachꞌajina caskancuta. Waquenka mana Diospi japꞌicuspa sachꞌamanta cꞌajllaska ramamanjina tucorkancu. Waj llajtayojcunataj uj qꞌita olivo sachꞌajina cancu. Kan waj llajtayojtaj, Diospi japꞌicuspa cꞌascachiska ramajina canqui. Olivo sachꞌaman cꞌascaskayquimanta allin uywaska canqui. 18 Chayraycu amaña jatunchacuychu israelcunamanta. Astawanpis yuyariy ramataka saphi causachin, manataj ramachu saphita causachin.
Waj llajtayojcuna llampꞌu sonko canancu tiyan
19 Ninquichá: “Dios israelcunata khesacharka noka paypa runan canaypaj”, nispa. 20 Khaway: Paycunata khesacharka mana japꞌicuskancuraycu. Kanrí paypi japꞌicuspalla allinta sayashanqui. Ajinaka ama jatunchacuychu, astawanpis Diosta manchachicuy. 21 Sichus Dios khesacharka israel runasninta chayka, kantapis khesachallasunquimantaj. 22 Yuyaricuy Dioska qhuyacuyniyojmin. Astawanpis juchapaj chekanta phiñacoj caskanta. Urmajcunapajka phiñacuyniyojmin. Kanpajrí qhuyacuyniyoj paypa qhuyacuyninpi sayajtiyqui. Manachus paypi japꞌicuspa sayawaj chayka, khesachaska canqui. 23 Paycunachus Diosman cutiricapuncuman paypi japꞌicuspa chayka, ujtawan paycunaman qhuyacuyninta ricuchenka. Chekamanta Dioska atin paycunata watejmanta sayarichiyta. 24 Kan waj llajtayoj cashajtiyquipis Cristowan ujchasorka qhuyacuyninwan. Ajina cajtenka may astawanraj unaymanta wajyaska israelcunanman Dios qhuyacuyninta ricuchenka.
Israel ayllu juchanmanta cachariska
25 Hermanosníy, Diospa cay pacaska yuyayninta yachanayquichejta munani ama kancunalla jatunchacunayquichejpaj. Israelcunamantaka mana tucuychu rumi sonkos tucorkancu. Nitaj ajinallapunichu cankancu. Astawanrí waj llajtayojcunaka sumaj willanasnejta Diosman cutirinancucamalla ajina tunuyaskas cankancu. 26 Chanta tucuy Israel ayllu juchanmanta cachariska caspa Diosman cutirenka. Dios palabranpi ninjina:
Sion llajtamanta Cacharichej llojsenka.
Payka sajra ñanmanta Israelta cutirichenka.
27 Chay Cacharichejnejtataj tratoyta Israelman juntꞌasaj, juchasninta khechuspa.
28 Sumaj willanasmanjinaka israel ayllu Diospa enemigonjina tucorka kancunaj allinniyquichejpaj. Diospa ajllacuyninmanjinarí ñaupa tatasniycuraycu chay aylloka Diospa munacuskan. 29 Dios cꞌachapuni caspa churaska atiynintapis wajyaskantapis manamin jaycꞌaj konkapunchu. 30 Kancunaka ñaupa tiempospi mana casucojcuna carkanquichej. Cunanrí Dios qhuyacusorkachej israelcuna mana casucuskancuraycu. 31 Paycunaka cunan mana casuncuchu. Astawanrí cutirejtincu Dios paycunata qhuyaconkapuni kancunatajina. 32 Dioska tucuytamin mana casucojcunapaj yuparka waj llajtayojcunatapis israelcunatapis. Chayta ruwarka tucuyman qhuyacuyninta ricuchinanpaj.
Dios wiñaypaj jatunchaska cachun
33 ¡May chhica munacuyniyoj ni jaycꞌaj tucucojtaj Diospa yuyayninpis yachayninpis! ¡Yuyaskasnenka ni jaycꞌaj yachay atina! ¡Ruwaynintaj mana entiendey atina! 34 Palabranpi nin:
Ni pi Señorpa yuyaskasninta yachanchu.
Ni pi payta yuyaycharkachu.
35 Ni pi ni imata payman korkachu paymanta ujtawan mañacapunanpaj.
36 Tucuy imamin paymanta paynejta paypajtaj cashan. Jatunchaska cachun wiñaypa wiñayninpaj. Ajina cachun.