10
Hermanosníy, tucuy sonkoywan munani israelcuna juchachaymanta cachariskas canancuta. Chaypaj Diosmanta mañacunipuni. 2 Paycunamanta allinta yachaspa willayquichej: Mayta munancu Dios jatunchaska cananta, astawanrí mana cheka yachaymanjinachu. 3 Diospa chekan caynintaka manamin rejserkancuchu. Paycunaj chekan caynincuta sayachicuyta munaspataj Diospa chekan cay koricuyninta khesacharkancu. 4 Cristomin Diospa camachiskasninta tucuyta juntꞌarka. Chayraycu tucuy paypi japꞌicojcunata chekanpaj Dios khawanka.Jesucristonejllata runaka juchamanta cachariska
5 Camachiskasta ruwananejta chekan caymanta parlaspa Moisés kelkarka: “Camachiskasta juntꞌajka ruwaskannejta causanka”. 6 Astawanrí Diospi japꞌicuynejta chekan caymantataj palabranpi ajinata nin: “Ama sonkoyquipi tanteyacuychu ¿pitaj janaj pachaman wicharenkarí?” nispaka. Chayka Cristota uraycuchimuymin. 7 “Amataj tanteyacuychu ¿pitaj uqhu pachaman urayconkarí?” nispaka. Chayka Cristota wañuymanta causarichimuymin. 8 Astawanka ajinata nin: “Diospa niskan kanpa kayllayquipi cashan, simiyquipi, sonkoyquipipis”, nispa. Cayka Diospi japꞌicuymanta willaraskaycumin. 9 Runaspa ñaupakencupichus Jesuska Señorniyqui caskanta willanqui, sonkoyquiwantajchus creenqui Dios wañuymanta causarichimuskanta chayka, pay cacharichisonka. 10 Runaka Diospi sonkonwan japꞌicun chekanchaska cananpaj; Jesuska Señornin caskantataj siminwan willacun juchamanta cachariska cananpaj.
Señormanta mañacojta juchanmanta cacharenka
11 Diospa palabranka ninmin: “Tucuy paypi japꞌicojka Dios niskanta juntꞌaskanta riconkapuni”. 12 Diospajka israelcunapis waj llajtayojcunapis quiquillan cancu tucuypa Señornincu caskanraycu. May qhuyacuyniyojtaj tucuy paymanta mañacojcunapajka. 13 Palabranpipis nin: “Señormanta mañacojcunataka tucuynincuta juchancumanta cacharenka”, nispa. 14 Astawanrí runaska Señorpi japꞌicuspalla paymanta mañacuyta atincu. Señormanta uyarispallataj paypi japꞌicuyta atincu. Señormanta paycunaman willarajtillantaj uyariyta atincu. 15 Cachamuska caspallataj willarajka sumaj willanasta paycunaman willarayta atin. Diospa palabranpi niskanmanjina: “Diosman allinyachiymanta sumaj willanaswan cachamuska cajcunaka may cusiywan japꞌiskamin”.a
Sumaj willanas tucuypaj
16 Astawanrí mana tucuychu sumaj willanasta casorkancu. Isaiaska kelkaskanpi nin: “Señorníy, pisislla willanasniycuta japꞌicorkancu”, nispa. 17 Ajinaka Diospi japꞌicuyka sumaj willanasta uyariymanta jamun. Sumaj willanastaj Cristoj niskasninmin.
18 Chanta ¿manachu uyarincuman carka? ¡Uyarerkancupuni! Dios palabranpipis nin:
Tucuy cay pachapi willanasta uyarerkancu.
Maycunapichus runa tiyacun chaycama niskasnincu chayarka.
19 Chayta israelcunaka ¿mananchu repararkancu? Reparancupuni carka. Chaymanjinamin ñaupajta Moiseska Diospa niskanta mana casucoj israelcunaman kelkarka:
Pisipaj khawaska runaswan envidiachiskayquichej.
Mana yuyayniyoj runaswantaj phiñapayachiskayquichej.
20 Chanta Isaiaspis mana pꞌenkacuspa kelkallarkataj Diospa niskanta:
Mana mascꞌawajcuna tariwarkancu.
Mana nokamanta tapucojcunamantaj sutꞌinchacorkani.
21 Israelcunamantarí Dios nerka: “Pꞌunchaynintinta munacuywan wajyarkani cay mana casucoj churanacoj runasta”.