Malta niska jallpꞌaman llojsincu
28
Tucuyniycu causashaj jallpꞌaman chayaspataj yacharkaycu chay yacu chaupipi jallpꞌaj sutenka Malta caskanta. 2 Chaypi tiyacoj runastaj mayta qhuyaspa nokaycupaj jatun ninata japꞌichipuwarkaycu. Chaymantaj tucuyniycuta wajyawarkaycu ancha chiri para ima caskanraycu. 3 Pablori uj chhica llantꞌata tantamuspa ninaman churaycusharka. Ajinallapi nina kankeymanta aykespa uj qhanispa wañuchej catari Pabloj maquinman chꞌuwiycucorka. 4 Chaypi tiyacoj runastaj Pabloj maquinpi chay catarita chꞌuwiycuskata ricorkancu. Chanta ninacusharkancu:—Cay runaka runa wañuchichá canman. Yacupi pꞌulticuymanta aykecuska. Cunanrí Dios mana sakenchu causajta, —nispa.
5 Pablorí cataritaka ninaman chokaycorka. Nitaj catareka payta imanarkachu. 6 Tucuy runas suyasharkancu Pablo punquillicunanta chayrí ujllata wañunanta catarej qhaniskanwan. Paycunarí unaytaña suyasharkancu manataj Pabloka imanacorkachu. Chayraycu ujjinatañataj yuyaspa Pablo uj dios caskanta nerkancu.
7 Kꞌoñicusharkaycu, chay kayllapi uj runaj jallpꞌasnin carka. Chay yacu chaupi jallpꞌapitaj payka camachej, Publio sutiyoj. Chay runataj munacuywan wajyaspa wasinpi sumajta khawawarkaycu quinsa pꞌunchayta. 8 Publioj tatanri kꞌoñi onkoywan evacuwantaj onkoska puñunanpi siricusharka. Pablotaj wasinman yaycorka waturicoj. Diosmanta mañacuytawan maquisninta payman churaspa onkoyninmanta thañicherka. 9 Ajinata ruwaskanmanta chay jallpꞌapi waj onkoskaska Pabloman jamoj cancu. Paycunapis thañichiskas caj cancu. 10 Paycunataj may cusiywan sumajpaj khawawarkaycu. Khepata ripushajtiycupis tucuy pisichicuskaycuta churapuwarkaycu.
Pablo Roma llajtaman chayaspa tiyacun
11 Barco phiricuskanmanta quinsa quillanman waj barcopi riporkaycu. Chay barcori Alejandría llajtamanta carka. Chay jallpꞌapi chiri wayra pꞌunchaycunapi khepacorka. Barcoj tꞌicanpitaj iscay quiquincamalla dioscuna carkancu, sutisnincutaj Polux Castor carka. 12 Rispataj Siracusa llajtaman chayarkaycu. Chaypi quinsa pꞌunchayta caricorkaycu. 13 Chay llajtamantari kocha cantonta rispallapuni Regio llajtaman chayarkaycu. Kꞌayantintaj ura wayra wayramorka. Ajinapi iscay caj pꞌunchaypi Puteoli llajtaman chayarkaycu. 14 Chaypi waquin hermanoswan tincorkaycu. Paycuna mayta nicuwarkaycu kanchis pꞌunchayta caricunaycupaj. Chaymanta Roma llajtaman rerkaycu. 15 Romapi tiyacoj hermanoska chayanaycuta uyarispa nokaycuta ñanman taripaj llojsimorkancu. Paycunaka Apio niska khatucuna, Quinsa Tambocamapis jamorkancu. Pablori paycunata ricuspa Diosta agradececorka. Ajinaspataj sonkonpi callpachacaporka. 16 Roma llajtaman chayaskaycutawanka soldadosta camachej runaka japꞌiycuska runasta wakaychajman jaywaycorka. Pablotari uj khawaj soldadotawan wajnejpi payta sapallanta tiyacunanta sakellarka.
17 Quinsa pꞌunchaymanta Pabloka Romapi caj curaj israelcunata wajyachimorka. Paycuna tantacamojtincutaj nerka:
—Llajta-masis, nokaka llajtanchejpa contranpi ni imatapis ruwarkanichu. Nitaj unay tatasninchejpa ruwanasnincoj contrantapis ruwarkanichu. Jerusalenpi waquincunarí romano curajcunaman jaywaycuwarkancu wiskꞌaycuchiwanancupaj. 18 Chay romano curajcunari sumajta tapuwaskancumanta ni ima ruwaskaytapis wañunaypajjina tarerkancuchu. Chayraycu cacharipuwayta munarkancu. 19 Israelcunarí mayta churanacorkancu. Contraypi willaskancuraycu nokaka romano camachej khawawananta mañanay carka. Payka ninmanpuni carka juchayojchus manachus caskayta. Manapunitaj llajtanchejtaka juchachayta munarkanichu. 20 Cunanka chayraycu kancunata ricunaypaj parlanaypajtaj wajyachimorkayquichej. Nokanchej israelcunata juchamanta Cacharichej Jesucristo jamunanta suyashaskanchejta yachachiskayraycu nokapis caypi wataska cashani, —nispa nerka Pablo.
21 Paycunataj payman cuticherkancu:
—Nokaycoka ni uj cartatapis Judea jallpꞌamanta japꞌerkaycuchu kanmanta willajtaka. Nitaj jakaymanta jamoj llajta-masisninchejpis ni ima sajratapis kanmanta parlancuchu. 22 Uyariyta munaycu yuyaskayquita chay Jesuspa tꞌakanmanta, kanpis chay tꞌakanmanta caskayquiraycu. Chay mosoj tꞌakajcunamantaka cunan tucuynejpi contranpi parlashancu, —nispa.
23 Ajinata paycunaka uj pꞌunchayta tantacunancupaj ajllarkancu. Ajllaska pꞌunchaypitaj Pablo tiyacorka, chayman ashqha runas jamorkancu. Pablotaj paycunaman sutꞌita willarka Dios ajllaskan Cristowan tucuyta wiñaypaj camachishaskancuta. Moisespa camachiskasnin unay willajcunaj kelkaskasnincumantawan sumajta sutꞌincharka. Chaywan Jesusmanta paycunaman tucuy atiskanta willarka munaspa paypi japꞌicunancuta. Ajinata yachachisharka tutamantapacha chꞌisiyaycunancama. 24 Waquin runaska Pabloj niskasnin cheka caskanta creerkancu. Waquinrí mana creerkancuchu. 25 Paycunarí chay niskanwan mana uj yuyayllachu caspa ripurasharkancu. Manaraj ripushajtincutaj Pabloka paycunaman nerka:
—Sumaj yuyaywan Santo Espiritoka unay tatasninchejman parlarka. Isaías willajninnejta nerka:
26 Chay runasman rispa willamuy:
Uyarispa chay uyariskayquichejtaka mana entiendenquichejchu.
Khawaspa chay khawaskayquichejtapis mana reparanquichejchu.
27 Imaraycuchus chay runaspa sonkoncu rumiyacapuska manaña munancuchu entiendeyta palabrayta.
Ningrisnincoka niskayta manaña allintachu uyarincu.
Ñawisnincutapis chꞌillmiycapuncu mana ricunancupaj.
Ningrisnincuwanpis nokata mana uyarincuchu mana munaspa entiendewayta.
Chaywanpis sonkoncupi mana reparayta munancuchu.
Chayraycu nokaman mana cutiricamuncuchu juchasnincuta khechuspa paycunata thañichinaypaj. Ajinata nin Dios.
28 ‘Chayraycu sumajta reparaychej Dioska runasta juchamanta cacharichinanpaj Wawanta cachamuskanta. Cay sumaj willanastaj waj llajtayojcunaman willaraska canka. Paycunataj uyarispa casonkancu, —nispa.
29 Pablo chay imasta nejtintaj israelcunaka paycunapura may phiñacuywan tapunacuspa riporkancu.