6 Chaypitaj soldadosta camachej Julioka tariparka Italia jallpꞌaman rishaj uj jatun barcota. Chay barcotaj Alejandría llajtamanta carka. Nokaycuta chay barcoman Julio yaycuchiwarkaycu, paypis yaycullarkataj. 7 Ajinapi ashqha pꞌunchaycunata allimanta rerkaycu. Ñacꞌaytataj Gnido llajta chimpaman chayarkaycu. Wayra sinchꞌita ñaupakeycumanta wayramuskanraycu Salmón jallpꞌa chimpata pasaspa Creta jallpꞌaj ladonta rerkaycu. 8 Chaymanta cantollantapuni ñacꞌayta rispa Sumaj Chayacuy niska llajtaman chayarkaycu. Chayri Lasea llajta kayllapi carka.

9 Kochapi purispa ancha unaytaña khepacorkaycu. Chay pꞌunchaycuna barcopi puriyka manaña allinchu carka sinchꞌi wayra tiempoña caskanraycu. Ajinata Pabloka paycunata yuyaychaspa 10 nerka:

—Runa-masis, reparani rinanchejka mana allin caskanta. Risunman chayka, cay barcopis cargapis chincaponka. Chaywanpis nokanchejpis wañusunchej, —nispa.

11 Soldadosta camachejrí Pablota mana casorkachu. Astawan barco apaycachajtawan dueñotawan casuspa pusallawarkaycupuni. 12 Chay llajtari wayra tiempopi khepacunapaj mana allinchu carka. Chayraycu yakha tucuy yuyarkancu rinallancutapuni. Paycunataj nerkancu sonkoncupi: “Ichapis imaynamanta Fenice llajtaman chayayta atisunman”, nispa. Chay llajtataj Creta jallpꞌapi sinchꞌi wayrasmanta sumaj jarcꞌaska^b carka. Ajinapi wayra tiempopi chaypi khepacunancu allin cananta yuyarkancu.

13 Uramanta allicituwan wayramojtintaj yuyarkancu yuyaskancumanjina rinancuta. Ajinapi chaymanta llojsispa Creta jallpꞌa kayllanejta risharkancu. 14 Uj pisimantawantaj wayra Creta jallpꞌamanta barcoj contranpi sinchꞌita wayramorka. 15 Manaña wayraj contránta riyta aterkaycuñachu. Chayraycu wayrawan apachicullarkaycuña. 16 Chaynejpi carka uj juchꞌuy jallpꞌa yacuwan muyuska, Clauda niska. Chay jallpꞌa kayllanta rerkaycu. Chaypitaj manaña sinchꞌitachu wayrarka. Juchꞌuy barquitota ñacꞌayta japꞌiyta aterkaycu. 17 Chaymantataj chay barquitota jatun barcoman runas churarkancu. Ajinaspataj wasqhaswan jatun barcota uramanta matꞌerkancu ama pꞌaquicunanpaj. Chantataj barco purichina pꞌachasta uraycuchiporkancu manchachicuspa tꞌiyuman barco satꞌicunanta. Ajinapi wayra barcota apawarkaycu. 18 Kꞌayantinpis sinchꞌita wayrallarkapuni. Chayraycu waquin cargata kochaman wijchꞌuyta kallarerkancu barco mana ancha llasa cananpaj. 19 Quinsa caj pꞌunchaypitaj apaycachajcuna quiquin maquisnincuwan barcomanta waquin purichina imasta wijchꞌuycorkancu. 20 Ashqha pꞌunchaycunata manaña ni intitapis nitaj chꞌascacunatapis ricorkaycuchu. Chayraycu yuyarkaycu manaña causashaj jallpꞌaman chayayta atinaycuta.

21 Unayña mana miqhorkaycuchu. Pablotaj paycuna chaupipi sayaycuspa barcopi cajcunata nerka:

—Runa-masis, allin canman carka uyarinawayquichejka. Amataj Creta jallpꞌamanta llojsimusunmanchu carka. Llojsimuskanchejraycurí tucuy chayta muchushanchej. Chaywanpis ashqha imastawan chincachishanchej. 22 Cunanrí sonkoyquichejpi callpachacapuychej. Chekamanta ni ujpis kancunamanta wañunquichejchu puriyninchejpi. Manachayrí barcolla yacuman chincaycaponka. 23-24 Cunan chꞌisimin cheka Dios uj willaj angelta cachamuwarka. Chay Diospa wawan nokaka cani, paypa camachintaj. Chay willaj angeltaj niwarka: “Pablo, ama manchachicuychu. Romano camachejman Cristomanta willanayqui tiyan. Tucuy kanwan rishajcunatataj Dios qhuyacun. Qhuyacuyninraycutaj mana sakenkachu pitapis kochapi wañojtaka”, nispa. 25 Chayraycu, runa-masis, sumajta callpachacuychej. Allinta yachani niwaskanmanjina Dioska ruwanka. 26 Astawanrí wayra uj jallpꞌaman chayachinawanchej tiyan, —nerka Pablo.

27 Chunca tawayoj caj tutapiña casharkaycu ajina sinchꞌi wayrapi rispa. Chayri carka Adria niska kochapi. Wayrataj chay kochapi caynejta jakaynejta apaycachashawarkaycu. Chaupi tuta chaynejtataj barco apaycachaj runas yuyarkancu jallpꞌaman kayllashaskaycuta. 28 Yacoj uqhunta yachanancupaj llasayniyoj wasqhata yacuman cachaycorkancu. Ajinaspataj yacharkancu yacu uqhuman iscay chunca brazadas caskanta. Uj chhicatawan ñaupajman rispa ujtawan wasqhata yacuman cachaycullarkancutaj. Ajinaspari chunca phishkayoj brazadasjina uqhullanña carka yacoka. 29 Manchachicorkancutaj barco rumisman wajtacunanta. Chayraycu tawa barco japꞌichinasta khepannejta yacuman chokaycorkancu. Ancha phutiywantaj sutꞌiyamunanta suyasharkancu. 30 Barco apaycachaj runaska barcomanta aykecuyta munasharkancu. Chayraycu barco japꞌichinasta ñaupakenta churaj churajlla tucorkancu. Astawanrí juchꞌuy barquitota uraycuchisharkancu chaypi aykecunancupaj. 31 Pablotaj chayta reparaspa camachejman soldadosmanwan nerka:

—Cay barco apaycachajcuna mana barcopi khepaconkancuchu chayka, wañunquichej, —nispa.

32 Soldadostaj barquitoj wasqhasninta qhuchuraspa barquitota yacuman cachaycarpaporkancu.

33 Sutꞌiyamuytañari Pabloka tucuyta yuyaycharka miqhunancuta. Nerkataj:

—Chunca tawayoj pꞌunchaycunaña manchaywan khawaskanchejpi ni imata miqhuspa cashanquichej. 34 Chayraycu niyquichej miqhunayquichejta allinniyquichejpaj. Ajinapi mana ni imanacunquichejpischu.

35 Chayta niytawantaj tꞌantata okharispa Diosta agradececorka tucuypa ñaupakencupi. Chaymantataj tꞌantata partispa miqhuyta kallarerka. 36 Ajinaskanmanta tucuynincu sonkochacapuspa miqhorkancu. 37 Tucuyniycutaj barcopi iscay pachaj kanchis chunca sojtayoj runas carkaycu. 38 Miqhuywan sajsacuskancumantataj trigo cargata kochaman jichꞌaycorkancu barco chꞌusajyananpaj.

39 Pꞌunchayamojtinñataj barco apaycachajcunaka jallpꞌata ricuskancuta mana rejserkancuchu. Astawanrí tꞌiyu patapi uj chhica yacullata ricorkancu. Chay jallpꞌaman barcota orkhoyta yuyarkancu. 40 Barco japꞌichinasta qhuchurparispa kochapi sakerparerkancu. Barco apaycachana cꞌaspistapis phascaporkancu. Barco apaycachana pꞌachastataj wayraman okharejtincu wayra barcota chꞌaquinejman apasharka. 41 Iscay yacus sinchꞌiwan tincushancu, chayman chayarka barcoka. Chaypitaj barco tꞌiyuman satꞌicorka. Barcoj ñaupakentaj satꞌiycucuspa manapuni cuyurerkachu. Khepanrí pꞌaquiracuyta kallarerka yacoj sinchꞌi wajtaskanwan. 42 Soldadostaj japꞌiycuska runasta wañurachinancuta yuyaychanacorkancu ama aykecunancupaj waytꞌaspa. 43 Camachejrí Pablo wañunanta mana munarkachu. Astawanpis payka barco apaycachajcunata jarcꞌarka yuyaskancuta ama ruwanancupaj. Camacherkataj:

—Waytꞌayta yachajcuna ñaupajta yacuman phinquiycuychej jallpꞌaman chayanayquichejpaj. 44 Wajcunataj cꞌaspi patasman ujcunataj barcoj imasninmanpis llojsiychej, —nispa.

Ajinata jallpꞌaman tucuynincu causashaj chayarkancu.