5 Kꞌayantintaj Jerusalén llajtapi curajcuna^a tantacorkancu. 6 Chay jatun tantacuypi casharkataj yupaychana-wasimanta curaj runa Anaspis, ayllunmanta tucuy cajcunantin, Caifaswan, Juanwan, Alejandrowan. 7 Juanta Pedrotawan chaupincuman pusaycuchispataj taporkancu:

—¿Imaynatataj thañicherkanquichej cay runata? ¿Pejpa atiyninwantaj ruwarkanquichej caytarí?

8 Chanta Santo Espirituwan juntꞌa caspa Pedro sumaj yuyayninwan^b cuticherka:

—Israel llajtapi camachejcuna, curajcunawan, uyariwaychej. 9 Cunan tapuwaycu cay suchu runata allinta ruwaspa thañichiskaycumanta. 10 Chayraycu willaskayquichej tucuy kancunaman tucuy llajta-masisninchejmanpis yachanayquichejpaj pejpa atiyninwanchus ruwaskaycuta. Jesucristopi japꞌicuspa paypa atiyninwantaj cay runata thañichiycu. Jesuska Nazaret llajtapi wiñacorka. Kancunataj payta chacataspa wañuchicherkanquichej. Paytataj Dioska causarichimorka wañuskamanta. Paypa atiyninwanmin cay runaka ñaupakeyquichejpi thañiska cashan. 11 Dioska wiñaypaj churarka Jesucristota sumaj esquina rumitajina runas wiñay causayniyoj canancupaj. Kancuna wasichajcunarí cay rumita khawaspa wijchꞌuporkanquichej. Wasita sayachinanpajri chay wijchꞌuska rumeka aswan sumaj carka tucuy waj rumismanta niskaka. 12 Chekamanta Jesusllata Dios churarka juchamanta cꞌata Cacharichiwajninchej cananpaj. Paynejllata runas wiñay causayniyoj cayta atincu, paypi japꞌicuspa. Manamin wajnejtachu, —nispa.

13 Chay curajcuna repararkancu Pedrowan Juanwan mana manchachicuspa parlaskancuta. Mana escuelapi estudiamoj, khasi runasjinalla caspapis sumajta parlaskancumanta mayta tꞌucorkancu. Rejserkancutaj Jesuswanpuni purejcuna caskancuta. 14 Thañiska runata Pedrowan Juanwan cusca sayashajta ricorkancu. Chayraycu ni imatapis cutichiyta aterkancuchu. 15 Chanta chay curajcunaka paycunata tantacuynincumanta llojsinancuta camacherkancu. Munarkancu yachachinacuyta sapallancupi. 16 Paycunapurataj ninacorkancu:

—¿Imatataj ruwasun cay runaswanrí? Tucuy Jerusalén llajtapi tiyacojcuna yachancuña imaynatachus uj tꞌucunapaj ricuchinawan thañichiskancuta. Nokanchejtaj mana atinchejchu niyta mana ruwaskancutaka. 17 Amaña ni jaycꞌaj pimanpis Jesusmanta willanancupaj ninachej: “Willanquichej chayka, ñacꞌarichisajcu”. Chaywanka manaña runapura willanaconkancuchu, —nispa.

18 Chanta chay quinsa runasta wajyaspa sinchꞌita cꞌamerkancu:

—Jesusmantaka ni imaynamantapis willaranquichejchu. Nitaj paymanta pimanpis yachachinquichejchu, —nispa.

19 Pedrowan Juanwanrí cuticherkancu:

—Tanteyacuychej kancunallapis. Diospa ñaupakenpi ¿kancunatachu astawan casunaycu tiyan? chayrí ¿Diostachu? 20 Nokaycoka manamin chꞌin cacuyta atiycuchu. Manachayrí willanaycu tiyan ricuskaycuta uyariskaycutaka, —nispa.

21 Tantaska curajcunaka ñacꞌarichinancupajjina imaynamantapis paycunata juchachayta mana aterkancuchu. Chayraycu phiñaskas sinchꞌita cꞌamispa cachariporkancu. Imaraycuchus tucuy runasmin Diosta yupaycharkancu Jesuspa cachasninpa ruwaskancumanta. 22 Chay thañicoj runaka tawa chunca curaj watayoj carka. Chayraycu chaymin may tꞌucunapajka.

23 Cachariskas caytawantaj Pedro Juanwan rerkancu Cristopi japꞌicoj hermanospaman. Paycunamantaj willarkancu chay curajcunaj tucuy niskancuta. 24 Chayta uyarispataj tucuynincu cusca uj sonkolla Diosmanta wajyacorkancu:

—Diosniycu, jatun Camachiwajniycu canqui. Cay pachata, janaj pachata, jatun kochasta, chaypi tucuy cajcunatapis ruwarkanqui. 25 Kan parlarkanqui camachiyqui Davidnejta. Pay Santo Espíritoj atiyninwan kanmanta taporkaña:

Mañacuspallapuni nerkancu:

27 —Chekatapuni cay llajtapi ashqha runas tantaycucorkancu ajllaska^c Camachiyqui Jesuspa contranpi. Payka kanllaman tꞌakaskamin tucuyta camachinanpaj. Chekatapuni cay llajtapi Herodeswan Poncio Pilatowan tantaycucorkancu. Llajta-masisniycuwan waj llajtayojcunapiwan cusca Jesuspa contranpi churacorkancu. 28 Kan, atiyniyoj caspataj tucuy chay ruwanancutaka yacharkanquiña. Paycunaj ruwaskancutaj kanpa yuyaskayquimanjina munayniyquimanjina carka. 29 Cunanka tucuy atiyniyoj Señor Diosniycu, “ñacꞌarichiskayquichej” niskancuta khaway, ari. Nokaycu camachisniyqui caycu. Yanapawaycu niskasniyquita tucuy sonkowan willaranaycupaj mana manchachicuspa. 30 5.24 Chaypaj atiyniyquita ricuchiy onkoskasta thañichispa. Chaywan kanman tꞌakaska^d Camachiyqui Jesús willaraypi yanapawasajcu. May tꞌucunapaj ricuchinas jatun ruwanaswan paypa atiyninwan ruwaska cachun, —nispa mañacorkancu Diosmanta.

31 Ajinata Diosmanta wajyacuytawan tantacorkancu, chay waseka qharcatiterka Santo Espíritu chaypi caskanraycu. Tucuy chaypi cajcunataj Espirituwan juntꞌa carkancu. Chanta Jesuspa cachasnenka Diospa niskanta tucuy sonkowan willarkancu.

32 Jesucristopi chay ashqha japꞌicojcunaka uj sonkolla uj yuyaylla tucuy imapi causacorkancu. Paycunamantataj ni uj runapis capuyninta “nokajllata” nejchu. Manachayrí tucuynincu hermanospura capuynincumantapis pisichicuskancumanjina yanapanacoj cancu. 33 Señor Jesuspa cachasnenka paypa causarimpuyninmanta jatun atiyninwan willashallarkancupuni. Diostaj tucuy paycunata munacuywan khawaspa yanaparka. 34 Paycuna uqhupi ni ujpis pisichicojka cajchu. Wasiyojcunapis jallpꞌayojcunapis capuynincuta vendej cancu. Vendeskancu kolketataj apamoj cancu Cristopi hermanospa tantacuynincuman. 35 Jesuspa cachasninman jaywaj cancu. Paycunataj sapa ujman pisichicuskancumanjina kolketa raqꞌicoj cancu. 36 Carkataj Cristopi uj hermano, José sutiyoj. Cachaspis payta Bernabeta suticharkancu. Bernabé niyta munan yuyaychaj runa. Pay Chipre jallpꞌamanta carka, Levij ayllunmantapis. 37 Payka uj jallpꞌanta vendespa kolketa apamorka. Jesuspa cachasninmantaj jaywarka.