Pedro suchu runata thañichin
3
Uj pꞌunchay Pedrowan Juanwan yupaychana-wasiman risharkancu chaupi tardeta. Chaytaj Diosmanta mañacuna hora carka. 2 Yupaychana-wasej Cꞌachitu puncunman uj suchuta sapa pꞌunchay runas apaj cancu. Chay runari nacecuskanmantapacha ajina suchu carka. Chayman yaycojcunamanta limosnasta pay mañacoj. 3 Chay suchu runataj ricorka Pedrota Juantawan yupaychana-wasiman yaycushajta. Paycunamantataj pisichicuskanpi mañacorka. 4 Pedrowan Juanwanka payta allinta khawaycorkancu. Pedrotaj nerka:—Khawariwaycu, —nispa.
—Mana phatayoj cani. Capuwaskantarí koskayqui. Nazaret llajtayoj Jesucristoj atiyninwan camachiyqui: Jatarispa puriy.
7 Chayta nispataj Pedroka suchuta paña maquinmanta aysarispa sayaycucherka. Chaypachataj suchoj chaqui mokosnin callpachaskas caspa thañicaporkancu. 8 Chanta suchu carka, chay runaka phinquirispa sayarerka. Puriyta kallarispataj paycunawan cusca yupaychana-wasiman yaycorka. Paytaj phinquirispa sumajta purispataj Diosta mayta jatuncharka. 9 Tucuytaj ricorkancu purishajta Diosta yupaychashajtawan. 10 Runastaj reparaspa chay runaka unay suchu caskanta rejserkancu. Yacharkancutaj pay yupaychana-wasi Cꞌachitu puncupi tiyaska mañacoj caskantapis. Mayta mancharicuspataj tꞌucorkancu chay suchu runa thañicuskanmanta.
Pedro willaran yupaychana-wasipi
11 Suchu carka, chay runataj Pedromanta Juanmantawan mana cacharicojchu. Tucuy runastaj tꞌucuspa uskhayta paycunata khaterkancu chay Salomón niska yupaychana-wasi yaycunaman. 12 Pedrorí ashqha runasta ricuspa paycunaman parlarka:
—Israel llajta-masis ¿imaraycutaj runa thañicuskanmanta tꞌucushanquichejrí? Ama nokaycuta tꞌucuspa khawawaycuchu. Mana nokaycoj atiyniycuwanchu cay runaka thañicorka. Nitaj chekan runas caskaycuraycuchu cayka ruwacun. 13 Manachayrí Dios ruwarka. Payllata unay tatasninchej Abraham, Isaac, Jacobpis casuspa yupaycharkancu. Dios churarka ajllaska camachin Jesusta may jatunpaj khawaska cananpaj. Paytataj kancuna cay pacha curajcunawan japꞌiycucherkanquichej Pilatoman jaywanancupaj. Chaywanpis paypa ñaupakenpi Jesusta wijchꞌuycorkanquichej. Pilatoka sumajta khawaspa cacharipuyta munashajtinpis kancunaka chacatanantapuni mañarkanquichej. 14 Ajinapi khesacharkanquichej Jesusta. Payka Diosllata casoj, chekan ruwajmin. Astawanpis mañarkanquichej runa wañuchi cachariska cananta. 15 Ajinamanta wañuchicherkanquichej wiñay causayta koj Jesusta. Payta Dios causarichimorka wañuymanta. Nokaycutaj Jesusta causarimuskanmanta khepata ricuspa willaycu payka chekata causarimuskanta. 16 Jesús tucuy atiyniyoj caskanta japꞌicuspa cay runa thañicorka. Payta rejsinquichej ricunquichejtaj. Jesuspi japꞌicuspa cay runa sumajta thañicorka tucuyniyquichej ricushajtiyquichej.
17 ‘Cunanka llajta-masis, yachani kancuna mana reparaspa Jesús Diospa ajllaskan caskanta payta ñacꞌarichiskayquichejta. Curajcunayquichejpis mana repararkancuchu. 18 Astawanrí Dioska ajinapi juntꞌarka unay willajcunannejta niskanta. Chay willajcuna unaymantapacha sutꞌincharkancu Diospa ajllaskan Cristoka ñacꞌarinanta. 19 Chayraycu juchasniyquichejta sakespa Diosman cutiricapuychej juchasniyquichejmanta llimphuchaskas canayquichejpaj. Chanta Señor Dios sonkosniyquichejta callpachasonkachej cusiskas causanayquichejpaj. 20 Chaypaj Dios unay ajllaskan Jesusta cachamusonkachej camachinanpaj. Payka Cristomin. 21 4.27 Janaj pachapeka cacunan tiyana Dios tucuy imata allinyachinan, chay pꞌunchaycama. Tucuy chayta Dios nerka payman tꞌakaska unay willajcunannejta. 22 Chekatapuni Moisés unay tatasninchejman nerka: “Señor Dios cay pachaman cachamusonkachej nokatajina uj willajta. Aylluyquichejmanta canka. Payta nokamanta tucuy nisuskayquichejta casunquichej. 23 Chay willajta mana casoj runarí Diospa cheka runasninmanta wijchꞌuska canka. Wiñaypajtaj wañonka”, nispa nerka Moisés.
24 ‘Ajinata, ari, Diospa unay willajnin Samuelmanta khepaman tucuy willajcuna unayña willarkancu cunan pꞌunchaycunapi ruwacunanmanta. 25 Chay unay sutꞌinchaskancoka kancunapaj carka. Kancunaj allinniyquichejpaj Dioska uj tratota ruwarka tatasninchejwan. Parlaspa Abrahamman nerka: “Khepa caj alchhisniyquinejta cay pacha runas japꞌenkancu sumaj cajta wiñay allinnincupaj”, nispa. 26 Dios ñaupajta kancunaman cachamusorkachej ajllaska Camachin Jesucristota wañuskamanta causarichimuspa. Cachamorka kancunata yanapayta munaspa sajra causayniyquichejmanta payman cutirinayquichejpaj, —nerka Pedro.