5 —Cay kꞌapaj aceitejinaka ¿imaraycutaj mana vendecorkachurí? Uj wata pagopajjina carka. Chayka wajcha runasman koska canman carka, —nispa.

6 Chaytaka nerka mana wajcha runasta qhuyaskanraycuchu, manachayrí suwa caskanraycu. Payka paycuna uqhupi kolketa jallchꞌaj runa carka. Chay jallchꞌaskancumantataj suwacoj. 7 Judas niskanraycutaj Jesús nerka:

—Sakellay. Ama jarcꞌaychu Mariata. Chayta jallchꞌarka pꞌampacunay pꞌunchaypaj. 8 Wajcha runaska kancunawanpuni cashancu. Nokarí mana unaytañachu kancunawan casaj, —nispa.

9 Chay may ashqha Jerusalenman chayamojcuna yacharkancu Jesús Betaniapi cashaskanta. Paycunataj chayman jamorkancu mana Jesusta ricuyta munaspallachu astawanka Lazarota ricuyta munaspa. Payta ricuyta munarkancu wañuskamanta Jesús causarichiskanraycu. 10-11 Ashqhas israelcunamanta curajcunancuta sakerpaspa Jesuspi japꞌicusharkancu. Chayraycu yupaychana-wasimanta curajcuna Lazarota wañuchiyta yuyarkancu.

12 May ashqha runas Jerusalenman rerkancu chay jatun pꞌunchaycunapi Diosta yupaychaj. Jesusri Betaniamanta Jerusalenman risharka. Chay ashqha runastaj Jesús jamushaskanta uyarerkancu. 13 Chayraycu palmasta okharicuspa llajtamanta payta taripaj llojserkancu. Khaparisharkancutaj:

—¡Dios yupaychaska cachun!^a ¡May jatunchaska Israelman Diospa cachamuskanka! ¡Payka Camachejninchej! —nispa.

14 Jesusri uj malton burrota tariytawan llokꞌaycuspa tiyaycucorka. Chaytaj Diospa palabranmanjina carka. Nin:

16 Chaypachapi yachacojcunanka mana entienderkancuchu runas ruwaskancuta. Jesús jatunchaska cajtinrí paycuna yuyaricorkancu paymanta kelkaska caskanta, runas juntꞌaskancupis.

17 Jesuswan Betaniamanta ashqha runas jamusharkancu. Chay ashqha runasmanta waquinri Jesús Lazarota causarichimojta ricojcuna carkancu. Paycunaka tucuyman willasharkancu imaynatachus Lazarota pꞌampana juscꞌumanta wajyaspa payta wañuskamanta causarichimuskanta. 18 Jerusalenmantapis ashqha runas Jesús chay may jatun ricuchinata ruwaskanta uyarerkancu. Chayraycumin paycunaka Jesusta taripaj Jerusalenmanta llojserkancu. 19 Fariseosrí chay imasta ricuspa paycunapura ninacorkancu:

—¡Ni imapajpis ruwaskayquichejka! ¡Khaway, tucuy runas payta khatej ripushancu! —nispa.

20 Waquin griego runas jatun pꞌunchaycunapaj jamoj cancu Diosta yupaychaj. 21 Paycunamanta waquin kayllaycorkancu Felipeman, paypis Betsaida llajtayoj Galileamanta caskanraycu. Nerkancutaj:

—Señor, Jesuswan tincuyta munaycu, —nispa.

22 Felipetaj Andresman chayta nerka Andreswan Felipewantaj rispa Jesusman chayta willamorkancu. 23 Jesustaj nerka:

—Diospa cachaska Runan jatunchaska cananpaj pꞌunchay chayamunña. 24 Chekatapuni niyquichej: Uj trigo muju jallpꞌaman urmaspa mana wañunchu chayka, sapallan cacun. Wañun chayrí ashqhatataj pokon. 25 Ajinallatataj cay pacha causayninta munacojka causaynintaka wiñaypaj chincachin. Cay pacha causayninta mana munacojrí wiñay causaypaj wakaychan. 26 Ruwanasniypi llancꞌananpaj causayninta kojka khatiwachun. Chanta maypichá noka cashani chaypi paypis wiñaypaj nokawan cusca canka. Nokapaj ruwajtarí Tatay sumajpaj khawanka, —nispa.

27 Chaywanpis nerka:

—¡Cunanka may sinchꞌi llaquiska sonkoyka! ¿Imatataj niyta atini? “Tatáy, cay ñacꞌariymanta cacharichiway” ¿nisajchu? Manachayka, cay ñacꞌariyta muchunaypajmin jamorkani. 28 Chayraycu: Tatáy, jatun atiyniyquita ricuchiy runas kanta jatunchasunancupaj, —nispa.

Ajinapitaj Dios janaj pachamanta nimorka:

—Jatun atiyniyta ricucherkani kannejta, watejmantapis ricuchillasajtaj, —nispa.

29 Chaypi caj ashqha runastaj chayta uyarispa nisharkancu, para tronaskanta. Waquintaj nisharkancu, uj angel payman parlaskanta.

30 Jesustaj nerka:

—Mana nokapajchu Dioska parlamuwarka, manachayrí kancunaj allinniyquichejpaj. 31 Cunanri Dios juchachashan cay pacha runasta juchancuraycu. Cunantaj cay pachata sajra camachej supay Satanasta Dios kharkonka. 32 Nokari jallpꞌamanta okhariska caytawan tucuyta nokaman cꞌascachimusaj nokapi japꞌicunancupaj, —nispa.

33 Chayta nerka imaynapichus wañunanta willananpaj. 34 Chayraycu chay ashqha runas payta nerkancu:

—Nokaycoka cayta yacharkaycu camachiskasmanta, Cristoka wiñaypaj caypi tiyacunanta. Kanri ¿imaynataj nishanqui, “Diospa cachaska Runanka okhariska canan tiyan”, nisparí? ¿Imayna runataj chay Diospa cachaska Runanrí?

35 Jesusri paycunaman nerka:

—Noka cani cheka cꞌanchayka. Pisi pꞌunchaycunallatawanña kancunawan casaj. Chayraycu noka caypi cashajtiy cꞌanchaypi puriychej lakha juchawan ama atipaskas canayquichejpaj. Lakhapi purejka mana yachanchu maymanchus rishaskantapis. 36 Noka kancunawan cashajtiy cheka cꞌanchaypi japꞌicuwaychej nokajina canayquichejpaj,^b —nispa.

Jesuska chay imasta parlaytawan ripuspa paycunamanta pacacorka.

37 Jesús chay ashqha ricuchinasta runaspa ñaupakencupi ruwashajtinpis paycuna manapuni paypi japꞌicorkancuchu. 38 Ajinapi juntꞌacusharka Diospa unay willajnin Isaiaspa kelkaskan. Nin:

39-40 Ujtawanpis Isaias kelkaskanpi nillantaj:

42 Chaywanpis curajcunamanta ashqhas Jesuska Cristo caskanta creerkancu. Fariseocunaraycutaj chayta mana willacorkancuchu tantacuna-wasimanta ama kharkoskas canancupaj. 43 Paycunaka astawan munarkancu runas paycunata sumajpaj khawanancuta Diosmanta niskaka.

44 Jesustaj runaspa ñaupakencupi nerka cayta: Nokapi japꞌicojka mana nokallapichu japꞌicushan. Manachayrí cachamuwajniypipis japꞌicushan. 45 Nokata rejsiwajka cachamuwajniytapis rejsillantaj. 46 Noka wiñay causayta koj cꞌanchay caspa cay pacha runasman jamorkani tucuy nokapi japꞌicojka amaña juchapi causananpaj. 47 Pillapis niskasniyta uyarin manataj casunchu chayka, paytaka mana nokachu juchachani. Nokaka mana cay pacha runasta juchachanaypajchu jamorkani. Manachayrí cay pacha runasta juchamanta cacharichinaypaj jamorkani. 48 Pillapis nokata khesachawaspa niskasniyta mana japꞌejka juchachaska canka. Chay niskay payta khepa pꞌunchaypi juchachanka. 49 Nokari mana nokallamantachu parlarkani. Manachayrí cachamuwajniy Tatay niwarka imatachus ninayta parlanaytapis. 50 Yachanitaj chay niwaskanka wiñay causayta koj caskanta. Chayraycu Tatay niwarka chayta quiquillantataj nokapis parlani. Chay imasta nerka Jesús.